என் புத்தகம்

ஒரு திருடனும், டாக்டரும், போலீசுடன் நடத்தும் யுத்தம் தான் கடாரம் கொண்டான்.

படத்தின் முதல் காட்சியில் மலேசியாவின் டிவின் டவரின் ஒரு மாடியில் இருந்து கண்ணாடியை உடைத்துக்கொண்டு வெளியே குதித்து உயிர் தப்பி ஓடி வருகிறார் விக்ரம். அவரை இரண்டு பேர் விரட்டி வந்து கொல்ல முயற்சிக்கிறார். அப்போது எதிர்பாராத விதமாக அதிவேகத்தில் வரும் பைக் விக்ரம் மீது மோதி தலையில் அடிப்பட்டு மயக்கமடைகிறார். போலீசார் அவரை மருத்துவமனையில் அனுமதிக்கிறார்கள்.

விக்ரம் சிகிச்சை பெறும் மருத்துவமனையில் பயிற்சி மருத்துவராக சேர்கிறார் அபி. அவருடைய மனைவி அக்ஷரா நிறைமாத கர்ப்பிணி. மனைவியை வீட்டில் தனியே விட்டுவிட்டு, இரவில் மருத்துவமனைக்கு வேலைக்கு வருகிறார் அபி. விக்ரம் அனுமதிக்கப்பட்டிருக்கும் வார்டில் தான் அபிக்கு டியூட்டி. யாரோ சிலர் விக்ரமை கொல்லப் பார்க்கிறார்கள். உயிருக்குப் போராடும் விக்ரமை அபி காப்பாற்றுகிறார். போலீஸ் விசாரணையில் விக்ரம் ஒரு திருடன் என்பது தெரியவருகிறது.

காலை வீடு திரும்பிய அபியை தாக்கி, அக்ஷராவை கடத்திச் செல்கிறார் விக்ரமின் தம்பி நந்தா. மருத்துவமனையில் இருந்து விக்ரமை வெளியே கொண்டுவந்தால், அக்ஷராவை ஒப்படைப்பதாக மிரட்டுகிறார். வேறு வழியே இல்லாத நிலையில், போலீசை ஏமாற்றி விக்ரமை வெளியே அழைத்து வருகிறார். இதனால் அபியும் குற்றவாளி லிஸ்டில் சேர்க்கப்படுகிறார். விக்ரம் யார்? அவரை கொல்ல முயற்சிப்பது யார்? அபியும், அக்ஷராவும் என்ன ஆனார்கள்? என்பது உள்ளிட்ட பல கேள்விகளுக்கு விடை தேடி பயணிக்கிறது மீதிப்படம்.

கிட்டத்தட்ட விக்ரம் வேதா படத்தின் கதையும் கடாரம் கொண்டான் கதையும் ஒன்று தான். ஆனால் இது 'பாய்ண்ட் பிளாங்க்' எனும் பிரெஞ்ச் படத்தின் ரீமேக். ஏற்கனவே கொரிய மொழியில் 'தி டார்கெட்' என்ற பெயரில் ரீமேக்காகி இருக்கிறது. தற்போது நெட்பிளிக்சில் 'பாயிண்ட் பிளாங்க்' ஆங்கிலப்பதிப்பும் வெளியாகியுள்ளது.

பாயிண்ட் பிளாக் படத்துக்கும் கடாரம் கொண்டான் படத்துக்கும் பெரிய வித்தியாசம் ஏதும் இல்லை. ஒரிஜினலை கெடுக்காமல் அப்படி எடுத்திருக்கிறார் இயக்குனர் ராஜேஷ் ம.செல்வா. ஹாலிவுட் தரத்தில் இருக்கிறது படத்தின் மேக்கிங். கொஞ்சம் கூட விறுவிறுப்பு குறையாமல் படத்தை நகர்த்தி சென்றிருக்கிறார்.

முதல் பாதி சைலண்டாகவும், இரண்டாம் பாதியில் வைலண்டாகவும் கெத்து காட்டியிருக்கிறார் விக்ரம். கெட்டப்பிலும் சரி, லுக்கிலும் சரி, செம மாஸ், ஸ்டைலிஷ் சீயான். முழு படத்துக்கும் சேர்த்து ஒரு பக்க வசனம் கூட விக்ரமுக்கு இல்லை. சின்ன சின்ன கண்ணசைவுகளால் கொள்ளை கொள்கிறார். குறிப்பாக துப்பாக்கி காட்டி நிற்கும் அபியை, அநாயசமான ஒரு பார்வையில் கடந்து போகும் அந்த காட்சி, வாவ் செம தூள். தில்லாக நெஞ்சம் நிமிர்த்தி, கடாரம் கொண்டானாக மாறியிருக்கிறார்.

அக்ஷராவுக்கு கொஞ்சம் நேரம் மட்டும் தான் படத்தில் வேலை. ஆனால் வரும் ஒவ்வொரு பிரேமிலும் தடம் பதிக்கிறார். க்ளைமாக்ஸ் காட்சியில் அவர் கதறும் போது, நம் உள்ளம் பதறுகிறது. நாசரின் மகன் அபி ஹசனுக்கு படத்தில் நிறைய வேலை இருக்கிறது. நிறைவாக நடித்து கவனம் ஈர்க்கிறார். போலீஸ் அதிகாரிகள் லேனா, வின்சென்ட் ராஜதுரை உள்பட அனைவரும் சரிவிகித நடிப்பை தந்திருக்கிறார்கள்.

ஜிப்ரானின் இசையில் 'தாரமே தாரமே' சாரல் மழையாய் நனைக்கிறது. பின்னணி இசையில் அதிரடியாய் முழங்கியிருக்கிறார். மான்டேஜாய் ஒலிக்கும் 'வேறென்ன வேணும் நீ மட்டும் போதும்' பாடல் சுனாமிக்கு மத்தியில் தென்றலாய் வீசுகிறது.

ஸ்ரீனிவாஸ் குதாவின் கேமரா படத்தை ஹாலிவுட் தரத்திற்கு எடுத்து சென்றிருக்கிறது. ராவான லைட்டிங் டோனில் சண்டைக்காட்சிகளும், கார் சேசிங் ஆக்ஷன் காட்சியும் மிரட்டுகிறது. படத்தை விறுவிறுப்பு குறையாமல், அதேசமயம் எந்த குழப்பமும் இல்லாமல் கட் செய்திருக்கிறார் எடிட்டர் பிரவீன் கே.எல்.

படம் விறுவிறுப்பாக இருக்க வேண்டும் என்பதற்காக வசனங்களை மிகவும் குறைத்திருக்கிறார்கள். அதனால் விக்ரம் உண்மையில் யார் என்பதைக்கூட தெளிவாக புரிந்துகொள்ள முடியவில்லை. அதேபோல் நேட்டிவிட்டிக்காக மலாய் மொழியும் அதிகளவில் பயன்படுத்தப்பட்டுள்ளது. இதுவும் படம் புரியாமல் போகும் நிலையை உருவாக்கியுள்ளது. க்ளைமாக்ஸ் காட்சி சினிமாத்தனமாக மாறிவிடுகிறது. இரண்டாம் பாதியில் துப்பாக்கி சத்தம் காதைக் கிழிக்கிறது.

விறுவிறுப்பு, பரபரப்பு நிறைந்த ஆக்ஷன் விரும்பிகளுக்கு இந்த படம் நிச்சயம் பிடிக்கும். தமிழ் ரசிகர்களுக்கு ஒரு ஹாலிவுட் படம் பார்த்த உணர்வை தருகிறான் 'கடாரம் கொண்டான்'.

ஜோதிகா தொடர்ந்து பெண்களுக்கு முக்கியத்துவம் உள்ள கதைகளாக தேர்ந்தெடுத்து நடித்து வருகின்றார். அந்த வகையில் வெறும் பெண்கள் என்றும் மட்டுமில்லாமல் இந்த முறை வளரும் சமுதாயத்தின் மீது அக்கறை கொண்டு பள்ளி குழந்தைகளுக்காக குறிப்பாக அவர்களின் பெற்றோர்களுக்கான ஒரு கதையை தேர்ந்தெடுத்துள்ளார், இதில் ஜோதிகாவின் மாணவர்கள் மட்டுமின்றி அவரும் பாஸ் செய்தார்களா? பார்ப்போம்.

கதைக்களம்

ஜோதிகா பெரும் பதவியில் இருந்து எத்தனையோ நிறைய சம்பளம் கிடைக்கும் வேலைகள் இருந்தும், இந்த வேலை தான் வேண்டும் என்று வாங்கி வருகின்றார், ஒரு அரசு பள்ளி டீச்சராக.

ஆனால், அந்த பள்ளிக்கூடத்தில் எதுவுமே சரியில்லை, இருக்கின்ற விதிமுறைகளை கூட யாரும் ஒழுங்காக கடைப்பிடிப்பது இல்லை, இதற்கெல்லாம் முக்கிய காரணம் சாட்டை படத்தில் வரும் தம்பி ராமையா போல் ஒரு கதாபாத்திரம் இந்த படத்திலும் வருகின்றது.

இதற்கிடையில் தனியார் பள்ளியின் ஆதிக்கம் வேற, இவை அனைத்தையும் முறியடித்து அரசாங்க பள்ளியில் படிக்கும் மாணவர்களை எப்படி சீர்த்திருத்தி, அவர்களின் தரத்தை உயர்த்தி நல்வழிக்கு கொண்டு வருகின்றார் ஜோதிகா என்பதே மீதிக்கதை.

படத்தை பற்றிய அலசல்

ஜோதிகாவின் திரைப்பயணத்தில் ஆல் டைம் பெஸ்ட் இந்த கதாபாத்திரம் என்று சொல்லி விடலாம், அதை விட அவர் சமீபத்தில் ஹீரோயின்களுக்கு முக்கியத்துவம் உள்ள படங்களில் நடித்ததில் இது தான் நம்பர் 1, பெர்ப்பாமன்ஸாகவே கலக்கியுள்ளார். படத்தில் எந்த ஒரு இடத்திலும் இவர் முகத்தில் ஒரு பெரிய சிரிப்பை பார்த்துவிட முடியாது.

படம் முழுவதும் அட்வைஸ், நீண்ட வசனங்கள் இருந்தாலும் எங்குமே அலுப்புத்தட்டவில்லை, இதில் குறிப்பாக ‘கணக்கு பாடத்தில் ஒரு பையன் 100 மார்க் எடுத்து, சயின்ஸில் தோல்வி பெற்றால், அவன் மக்கு பையனா, கல்வி சிஸ்டம் சரியில்லை’ என யோசிக்க வைக்கும் பல வசனங்கள் கவர்கின்றது.

ஒரு பையன் என்னை பாக்கின்றேன் மிஸ், என கூறும் பெண்ணிடம் ஜோதிகா சொல்லும் கதை, அரசாங்க பள்ளியில் இருக்கிற ரூல்ஸை ஒழுங்காக கடைப்பிடித்தாலே நன்றாக இருக்கும் என்று காட்டிய விதம் என காட்சிக்கு காட்சி கைத்தட்டல் பறக்கின்றது.

அதிலும் ஜோதிகா தன் தந்தை இழப்பில் கூட அழாமல், பள்ளிக்கு சென்று உருகும் காட்சி பார்ப்பவர்களை நெகிழ வைக்கின்றது, சூப்பர் ஜோதிகா. ஜோதிகாவிடம் காதலை சொல்லும் குட்டிப்பையன் கூட, ஓவர் ஆக்டிங் இல்லாமல் யதார்த்தமாக கியூட்டாக கடந்து செல்கின்றார்.

இப்படி பல அழகிய காட்சிகள் படம் முழுவதும் வருகின்றது, இப்படம் வெறும் மாணவர்களுக்காக படம் என்று மட்டுமே சொல்லிவிட முடியாது, ஒவ்வொரு பெற்றோர்களுக்கான படமாகவும் உள்ளது. படத்தின் ஒளிப்பதிவு அப்படியே அரசாங்க பள்ளியை பார்த்த அனுபவம், ஷான் ரோல்டனின் பின்னணி இசையும் படத்திற்கு கூடுதல் பலம்.

க்ளாப்ஸ்

ஜோதிகா மற்றும் நடிகர், நடிகைகள் அனைவரின் நடிப்பு.

எடுத்துக்கொண்ட களம், பெற்றோர்கள் எல்லாம் தனியார் பள்ளியை நோக்கி ஓடும் நேரத்தில், அரசாங்க பள்ளியை பற்றி பேசிய விதம்.

இசை, ஒளிப்பதிவு போன்ற டெக்னிக்கல் விஷயங்கள்.

ஜோதிகா ஒரு காட்சியில் சண்டை எல்லாம் போடுகின்றார், அட என்னடா இது என்று நினைக்க, அதற்கு ஒரு பின்கதை வைத்தது செம்ம.

பல்ப்ஸ்

கண்டிப்பாக சாட்டை படத்தை நியாபகப்படுத்துவதை தவிர்க்க முடியவில்லை.

மொத்தத்தில் குழந்தைகள், பெற்றோர்கள் என அனைவருக்கும் பிடிக்கும் இந்த ராட்சசி கீதா ராணி மேடத்தை.

ஆணவக்கொலையால் ஒரு காதல் ஜோடிக்கு நேரும் கொடுமைகளை பேசுகிறது பிரான்மலை திரைப்படம்.

பிரான்மலை ஊரின் முக்கிய தலைக்கட்டான வேலராமமூர்த்தியின் மகன் வர்மன். அப்பா போல் இல்லாமல் மிகவும் சாதுவானவர், அம்மா இல்லாததால் பாசத்துக்காக ஏங்ககூடிய நபர். ஆதரவற்றோர் ஆசிரமத்தில் வளர்ந்து, எல்லோர் மீதும் அன்பு செலுத்தும் நேகா மீது வர்மனுக்கு காதல் மலர்கிறது. நேகாவும் வர்மனை காதலிக்கிறார். அப்பாவிடம் தன் காதலை சொல்ல தயங்கும் வர்மன், யாருக்கும் தெரியாமல் நேகாவை திருமணம் செய்து கொண்டு குடும்பம் நடத்த தொடங்குகிறார். இந்த விஷயம் சாதி வெறிப்பிடித்த வேலராமமூர்த்தி மற்றும் குடும்பதாருக்கு தெரிந்துவிடுகிறது. இதையடுத்து நடக்கும் அதிரடி சம்பவங்களை அழுத்தமாக பதிவு செய்கிறது பிரான்மலை.

படத்தின் ஹீரோவாக நடித்துள்ள வர்மன், தனது பாத்திரத்தை உணர்ந்து சிறப்பாக செய்திருக்கிறார். ஆக்ஷன், செண்டிமெண்ட், காதல் என தனது கடமையை நிறைவாக செய்திருக்கிறார். அடுத்தடுத்த படங்களில் நடிப்பை மெருகேற்றினால், எதிர்காலம் சிறக்க வாய்ப்புகள் அதிகம்.

புதுமுகம் நேகா தமிழ் சினிமாவுக்கு நல்ல அறிமுகம். கயல் ஆனந்தி சாயலில், பக்கத்து வீட்டு பெண் போல் இருக்கிறார்.

வழக்கம் போல இந்த படத்திலும் தனது நடிப்பால் படத்தை தாங்கிப்பிடித்திருக்கிறார் வேலராமமூர்த்தி. கறிக்குழம்பை அள்ளிக்குடிக்கும் அந்த காட்சியில் உண்மையிலேயே மிரளவைக்கிறார்.

காமெடிக்காக பிளாக் பாண்டி, கஞ்சா கருப்பு என இருவர் இருக்கிறார்கள். ஆனால் படத்தில் காமெடி தான் இல்லை. சிரிக்க வைப்பதற்கு பதிலாக 'கடுப்பேத்துறாங்க மைலார்டு' என புலம்ப வைக்கிறார்கள்.

படத்தின் கதை மிக ஆழமானது. தமிழ்நாட்டில் இப்போது நடக்கும் பல உண்மை சம்பவங்களை அடிப்படையாக கொண்டது. ஆனால் திரைக்கதை என்ற ஒன்று இல்லாததால் படம் ஏனோதானோவென செல்கிறது.

ஒவ்வொரு காட்சியும் நிறுத்தி நிதானமாக செல்வதால் படத்தில் சுவாரஸ்யமே இல்லை. அதுவும் க்ளைமாக்சில் இருந்து தான் படமே ஆரம்பமாகிறது. நல்ல திரைக்கதை அமைத்திருந்தால், கதைக்கு வலு சேர்த்திருக்கும். இதை அடுத்த படத்திலாவது கவனத்தில் வைத்துக்கொள்ளுங்கள் இயக்குனர் அகரம்குமரா.

ஆனால் படத்தில் இரட்டை அர்த்த வசனங்களோ, ஆபாசமான காட்சிகளோ இல்லை. அதற்காக வேண்டுமானால் இயக்குனரை பாராட்டலாம்.

குறைந்த பட்ஜெட் படம் என்பதால், ஒளிப்பதிவு, எடிட்டிங் என சுமாராகவே இருக்கிறது. இசை மட்டும் ஆறுதல் தரக்கூடிய வகையில் இருக்கிறது. குறிப்பாக அந்த ஓபனிங் குத்து பாடலுக்காக இசையமைப்பாளர் பாரதி விஸ்கரை பாராட்டலாம்.

முதல் படம் என்றாலும், அதில் ஆணவக்கொலையை பற்றி பேசியிருப்பதால் 'பிரான்மலை'க்கு சின்னதா ஒரு கைத்தட்டல்.

தமிழ் சினிமாவின் தளத்தை ஒரு சில இயக்குனர்கள் மட்டுமே அடுத்த தளத்திற்கு எடுத்து செல்வார்கள். அப்படி குறும்படம் மூலம் ஒரு குரூப் தமிழ் சினிமாவில் காலடி எடுத்து வைத்து கலக்கி வருகின்றது. அந்த வரிசையில் முண்டாசுப்பட்டியில் காலடி எடுத்து வைத்த ராம்குமாரின் அடுத்தப்படைப்பு தான் ராட்சசன், இதுவும் மக்களை கவர்ந்ததா? பார்ப்போம்.

கதைக்களம்

விஷ்ணு பெரிய இயக்குனர் ஆகவேண்டும் அதுவும் முதல் படம் சைக்கோ படமாக இருக்க வேண்டும் என்று கடுமையாக உழைக்கின்றார். இதற்காக உலகில் உள்ள அனைத்து சைக்கோக்கள் பற்றியும் தகவல்கள் சேகரித்து வைக்கின்றார்.

அந்த சமயத்தில் போலிஸாக இருந்த அவருடைய அப்பா இறக்க, போலிஸ் வேலை இவரை தேடி வருகின்றது. அவரும் குடும்ப வறுமை காரணமாக அந்த வேலையில் சேர்கின்றார்.

சென்னையில் தொடர்ந்து பள்ளி மாணவிகள் கடத்தப்பட்டு கொடூரமாக கொலை செய்யப்படுகின்றனர், இவை தமிழக காவல் துறைக்கு பெரும் தலை வலியாக இருக்க, விஷ்ணு சினிமாவிற்காக எடுத்து வைத்த பல தகவல்கள் இந்த கேஸிற்கு உதவ, அதன் பின் இந்த சைக்கோவை தேடி அலையும் விஷ்ணு எப்படி அவனை கண்டுப்பிடிக்கின்றார் என்பதை சீட்டின் நுனிக்கு வர வைத்து காட்டியுள்ளனர்.

படத்தை பற்றிய அலசல்

முதலில் விஷ்ணுவிற்கு தான் பாராட்டு, வெறுமென கமர்ஷியல் மசாலாவில் மாட்டாமல், முண்டாசுப்பட்டி, நேற்று இன்று நாளை, ராட்சசன் என வித்தியாசமாக கதைகளை தேர்ந்தெடுத்து நடித்து அசத்தி வருகின்றார். இதுவரை நடித்ததில் விஷ்ணுவின் பெஸ்ட் ராட்சசன என்று சொல்லிவிடலாம்.

அவரை தாண்டி முனிஷ்காந்த், அட முண்டாசுப்பட்டியில் காமெடியில் கலக்கியவரா இவர், எமோஷ்னல் காட்சியில் கலங்க வைக்கின்றாரே என ஆச்சரியப்பட வைக்கின்றார். ஒரு த்ரில்லர் படத்திற்கு மிக முக்கியமே அடுத்து என்ன, யார் இதை செய்கின்றார்கள் என்பதை மக்களிடம் பதிய வைப்பது தான்.

படம் கிட்டத்தட்ட 3 மணி நேரம் தான், ஆனால் ஒரு காட்சியில் கூட உங்களை சோர்வாக்காது, பரபரப்பிலேயே உங்களை கட்டிப்போட்டு இருக்கும். அதிலும் பள்ளி ஆசிரியர் ஒருவர் மாணவிகளை எப்படி தன் ஆசைக்கு இணங்க வைக்கின்றார் என்ற காட்சிகளை காட்டிய விதம் எல்லாம், கண்டிப்பாக அனைத்து பெற்றோர்களுக்கும் ஒரு விழிப்புணர்வு தான், நமக்கே அவரை அடிக்க வேண்டும் என்ற உணர்வை இயக்குனர் கடத்தி செல்கின்றார்.

ஒரு சைக்கோ, பழிவாங்கும் கதை என்றாலே ப்ளாஷ்பேக் கண்டிப்பாக இருக்கும். ஹாலிவுட் படங்களுக்கு இது தேவையில்லை என்றாலும், தமிழுக்கு இவை மிகவும் முக்கியம் தான், அந்த விதத்தில் சைக்கோவிற்காக ப்ளாஷ்பேக் காட்சிகள் மிக அழுத்தமாக உள்ளது.

ஆனால், கொஞ்சம் கொரியன் படமான மெமரீஸ் ஆப் மர்டரை நியாபகப்படுத்துகின்றது, அதை தவிர்க்க முடியவில்லை ராம்குமார். அதிலும் குறிப்பாக அந்த ரோடியோவில் இசையை வைத்து சைக்கோ கொலைக்காரனை கண்டுபிடிக்க வைக்க எடுக்கும் முயற்சிகள், கொஞ்சம் மெமரீஸ் ஆப் மர்டரை நியாபகப்படுத்தினாலும், மற்றபடி இது பெஸ்ட் சைக்கோ த்ரில்லர் டாப் லிஸ்டில் இடம்பெறும்.

படத்தின் ரியல் ஹீரோ ஜிப்ரான் தான், காட்சிக்கு காட்சி தன் இசையால் நம்முள் பதட்டத்தை கொண்டு செல்கின்றார். ஒளிப்பதிவாளர் ஷங்கரின் ஒளிப்பதிவு நம்மையும் கூடவே அழைத்து செல்கின்றது.

க்ளாப்ஸ்

படத்தின் திரைக்கதை, எவ்வளவு பெரிய படமாக இருந்தாலும் ஒரு நொடி கூட நம் கவனத்தை திசை திருப்பவில்லை.

படத்தில் வரும் சைக்கோ கொலைக்காரனுக்கான அழுத்தமான ப்ளேஷ்பேக் காட்சிகள். பல இடங்களில் நம்மை அச்சத்தில் உறைய வைக்கின்றார்.

ஒரு சில காட்சிகள் ஹாலிவுட் படம் போல் குறிப்பாக சொல்ல வேண்டுமென்றால் விஷ்ணு தூக்கத்திலிருந்து எழும் காட்சி, ஏதோ துப்பாக்கியில் சுடுவது போல் வந்து உடனே எழுவது தமிழ் சினிமாவில் கொஞ்சம் புதிது.

ஜிப்ரானின் பின்னணி இசை மற்றும் டெக்னிக்கல் விஷயங்கள். கிளைமேக்ஸ் ஸ்டெண்ட் சூப்பர்.

பல்ப்ஸ்

சைக்கோ கொலைக்காரனை ஊர் போலிஸே தேடுகின்றது, அவரும் ரன்னிங்கில் இருப்பார் என்று பார்த்தால் அந்த பதட்டத்தில் அவருக்கு எப்படி விஷ்ணுவின் காதலி(அமலா பால்) வீடு, அவருக்கு உதவி செய்யும் ராதாரவி வீட்டையெல்லாம் கண்டுபிடித்து கொல்ல வருகின்றார் என்று தெரியவில்லை.

மொத்தத்தில் உங்களை சீட்டின் நுனிக்கு கொண்டு வந்து கடைசி வரை பதட்டத்தில் வைத்திருக்கும் ஒரு அனுபவத்தை அடைய கண்டிப்பாக இந்த ராட்சசனை விசிட் அடிக்கலாம்.

பெரிய பட்ஜெட் படங்களுக்கு நடுவில் சில சிறு பட்ஜெட் படங்கள் களத்தில் இறங்கத்தான் செய்கின்றன. அதிலும் நல்ல கதையுள்ள படங்களுக்கு மக்கள் மத்தியில் நல்ல வரவேற்பு கிடைத்து விடுவது நிச்சயம். அந்த வகையில் ராஜா ரங்குஸ்கி என பெயர் தாங்கி வந்துள்ள படம் ராஜா போல நின்று விளையாடுமா என பார்க்கலாம்.

கதைக்களம்

ஊரில் போலிஸ் இளைஞனாக கதையின் ஹீரோ சிரிஷ். இவருக்கு பெரிதாக குடும்ப பின்னணியெல்லாம் இல்லை. வழக்கம் போல தன் காவல் ரோந்து பணிகளை செய்து வருகிறார். அவருக்கு நண்பனாக சக போலிஸ் தோழன் கல்லூரி வினோத் மட்டுமே.

இடையில் ஹீரோயின் சாந்தினியை சந்திக்கிறார். காதல் வயப்படுகிறார். எழுத்துதுறையில் ஆர்வலராக இருக்கும் இவருக்கென ஒரு தனி பாலிசி. ஒரு நாள் அவர் குடியிருப்பில் பெண் ஒருவர் கொல்லப்படுகிறார். ரோந்து பணிக்காக சென்ற ஹீரோ இதை கண்டு அதிர்ச்சியாகிறார்.

தொடர்ந்து அடுத்தடுத்த கொலைகள். சம்மந்தமில்லாமல் இவர் இக்குற்ற வழக்கில் சிக்க, நடப்பது என்ன? பின்னணியில் இருப்பது யார்? என புரியாத புதிராக நகர்வது தான் ராஜா ரங்குஸ்கி.

படத்தை பற்றிய அலசல்

ஹீரோ சிரிஷ் மெட்ரோ படத்தை தொடர்ந்து 2 வது படமாக இந்த ஆக்‌ஷன் கதையை தேர்ந்தெடுத்திருக்கிறார். கதையில் இவர் தான் ராஜா. ஒரு சாதாரண போலிஸ் காவலர். காதல் ஒரு பக்கம். பழி மறுபக்கம் என அமைதியற்று அலைகிறார். பொருத்தமான கதையை தான் அவர் தேர்வு செய்திருக்கிறார். அவர் முன்பு நேர்காணல்களில் சொன்னது போல இப்படம் பலருக்கும் பிடிக்கும்.

ஹீரோயின் சாந்தினி பல படங்களில் நடித்த அனுபவத்தை காட்டியுள்ளார். ரங்குஸ்கியாக அவர் கேரக்டரில் இருந்தாலும் ஹீரோவுக்கு நிகரான இடம் இங்கே அவருக்கு என சொல்லலாம். கிட்டத்தட்ட ஒரு ஹீரோயினை மையப்படுத்திய கதை போல என்றால் மிகையல்ல.

இயக்குனர் தரணி தரண் ஜாக்சன் துரை படத்தை கொடுத்து மற்ற படங்களுக்கு மத்தியில் இடம் பிடித்தது போல இப்படத்திலும் அவர் பிடித்து வைத்திருக்கிறார். முதல் பாதி சற்று மெதுவாக நகர்ந்தாலும் இரண்டாம் பாதியில் நம் கவனத்தை அதிகப்படுத்தியுள்ளார்.

கல்லூரி வினோத் இப்படத்தில் ஒரு சப்போட்டிங் ரோல் என்றாலும் சில இடங்கள் அடிக்கும் காமெடிகள் படம் பார்ப்பவர்களுக்கு கொஞ்சம் புத்துணர்வு கொடுக்கிறார். வாழ்த்துக்கள்.

சுற்றி வளைக்காமல் நேரடியாக விசயத்திற்குள் வரும்படியான காட்சி நகர்வுகளை பார்க்கும் போது பல படங்களை பார்த்து பழகியவர்களுக்கு கொஞ்சம் Uneasy போல தான். ஆனாலும் சம்திங் மிஸ்ஸிங் என சொல்லவைக்கும். அதனால் ஒளிப்பதிவாளருக்கும் இதில் பங்குண்டு.

இசைக்கு யுவன். நாம் சொல்லவா வேண்டும். இந்த படத்திற்கு அவர் பெரிதளவில் சம்பளம் வாங்கவில்லை என்றாலும் தனக்காக இடத்தை ரசிகர்கள் மத்தியில் பிடித்து வைத்துள்ளதோடு, அவர்களின் எதிர்பார்ப்பை இங்கேயும் நிறைவேற்றியுள்ளார். சிம்பு இப்படத்தில் ஒரு பாடலை பாடியுள்ளார்.

இதுமட்டுமல்ல. படத்தில் நாம் எதிர்பாராத விசயங்களும் உண்டு. அதை நாங்கள் இங்கே சொல்லப்போவதில்லை.

கிளாப்ஸ்

படத்தில் கதை நகர்வு சலிப்படையாமல் நம்மை இழுத்து செல்வது தான்.

இயல்பான காமெடிகள் காமெடி நடிகர்கள் இல்லை என்ற குறையை மூடிவிட்டது.

யுவன் சங்கர் ராஜாவின் பின்னணி இசை கதைக்கு பக்க பலம்.

எதிர்பாராத கிளைமாக்ஸ் Interesting Segment.

பல்ப்ஸ்

ஹீரோ இன்னும் கொஞ்சம் எக்ஸ்பிரஷன்களை கூட்டியிருக்கலாம்.

பாடல்கள் மனதில் இடம் பெறுவது கொஞ்சம் கேள்வியாக தான் இருக்கிறது.

மொத்தத்தில் ராஜா ரங்குஸ்கி ஒரு புதிரான விளையாட்டு. தியேட்டரில் பாருங்கள் மக்களே...

கரு:தடை பல கடந்து, இரண்டு ஊர் பகைக்கு இடையே வளரும் காதலும் அந்த காதலரின் வரலாற்று பின்னணியும் தான் இப்படக் கரு.

கதை: திருநெல்வேலி மாவட்டம், அம்பாசமுத்திரம் தாலுகாவில் உள்ள சிங்கம் பட்டிக்கும், புளியம்பட்டிக்கும் இரண்டு ஊருக்கும் பொதுவான ஒரு மார்கெட் சந்தையால் ஆண்டு கணக்கில் பகை. அந்த பகையை சிங்கம்பட்டி சீமராஜா சிவகார்த்திகேயன் எப்படி தன் புத்திசாலிதனத்தால் தீர்த்து, எட்டு வருஷம் நடக்காத கோவில் பரிவட்ட திருவிழாவை நடத்தி காட்டி, தான் உயிருக்கு உயிராய் விரும்பும் புளியம்பட்டி பொண்ணுசுதந்திரதேவி – சமந்தாவை தடை பல கடந்து கரம் பிடிக்கிறார் என்பது தான் "சீமராஜா" படத்தின் கதையும், களமும்.

காட்சிப்படுத்தல்: சிவகார்த்திகேயன் - சமந்தா ஜோடியுடன் சூரி, யோகி பாபு, 'நான் கடவுள்' ராஜேந்திரன், நெப்போலியன், லால், சிம்ரன், மனோபாலா, ரஞ்சனி,"பிச்சைக்காரன்" மூர்த்தி, சூப்பர் குட் சுப்பிரமணி... ஆகியோருடன் கீர்த்தி சுரேஷும் கெஸ்ட் ரோலில் நடிக்க, 24 ஏ எம் பட நிறுவனம் ஆர்டி ராஜா தயாரிப்பில், டி.இமான் இசையில் "வருத்தப்படாத வாலிபர் சங்கம்", "ரஜினி முருகன்" வெற்றிப் படங்களை சிவகார்த்திகேயனுக்கு தந்த இயக்குனர் பொன்ராம் இயக்கத்தில் வெளிவந்திருக்கும் படம் "சீமராஜா. " படத்தில் காமெடி காட்சிகள் காட்சிப்படுத்தப்பட்டிருக்கும் விதம்.... அசத்தல் எனலாம். அப்படி ஒரு செம காமெடி கதையில் கொஞ்சம் அந்த கால ஜமீன் மற்றும் ராஜா காலத்து கதையையும் ப்ளாஷ்பேக்கில் கலந்து ரொம்பவே'பெப்' ஏத்தி மொத்தப் படத்தையும் எத்தனைக்கு எத்தனை காமெடியாகவும், கலர்புல்லாகவும் தரமுடியுமோ..? அத்தனைக்கு அத்தனை அழகாக காட்சிப்படுத்தி தந்திருக்கின்றனர் "சீமராஜா" படக் குழுவினர் என்பது இப்படத்திற்கு பெரிய ப்ளஸ்!

கதாநாயகர்: சீமராஜா எனும் சிங்கம் பட்டி ஜமீனின் ஜாலி இளவரசராகவும், ப்ளாஷ்பேக்கில் சீமராஜாவின் பாட்டனுக்கு பூட்டன், ஓட்டன்... வீரமிகு மன்னர் கடம்ப வேல்ராஜாவாகவும் சிவகார்த்திகேயன், தனக்கு சாலப் பொருத்தமான செம மாஸான கதையிலும், களத்திலும் கலக்கியிருக்கிறார் கலக்கி.

அதிலும், இரண்டு குதிரை பூட்டிய சாரட் வண்டியில் இளவரசர் சீமராஜாவாக, கணக்கு சூரியுடன் சேர்ந்து பண்ணும் அலப்பறையில் ஆகட்டும், அவரது முப்பாட்டன், ஓட்டன் ஜமீன் மன்னர் கடம்ப வேல்ராஜா வாகஒற்றை குதிரையை ஓட்டிச் சென்று வீரத்துடன் போர் புரியும் போது காட்டும் மிடுக்கில் ஆகட்டும் பலே, பலே.... சொல்ல வைக்கிறார்.

'வாழ்றதுக்கு எப்படி நன்பன் முக்கியமா வேணுமோ அதே மாதிரி எதிரியும் கூட இருந்து கிட்டே இருக்கணும்... அப்போதான் மனுஷனுக்கு ஜெயிக்கணுங்கிற வெறி இருக்கும்...", "உழுதவனுக்கு உளுத்துப் போன அரிசி உட்கார்ந்து சாப்பிடுறவனுக்கு பிரியாணி அரிசியா...? " என விவசாயிகளுக்கும், விவசாயத்துக்கும் ஆதரவு குரல் கொடுக்கும் இடங்களில் கூட சிவா செம அசத்தல்.

அதே மாதிரி, "நம்பிக்கை துரோகம் நான் இதுவரை பார்த்திராத ஒன்று... நான் மீண்டும் வருவேன் என் உயிரே போயினும் இந்த மண்னை மீட்க வருவேன் ...." என்றபடி மடியும் இடத்தில் கடம்பராஜா- சிவகார்த்தி, ஏனோ தெரியவில்லை,நம்மையும் கண் கலங்க வைத்து விடுகிறார்.

மேலும், சமந்தா என்ட்ரி காட்சியில் தன் ஆண் புறாக்களைத் தேடி, வளையல் வியாபாரி கெட்-அப்பில் வாட்ச் விற்பனையாளராக அவரிடம் சிக்கும், சிவா, தன்னை அடிக்க கட்டை எடுத்துவரும் சமந்தாவைப் பார்த்து, "தயவு செய்து முதல்ல கட்டையை கீழே போடுங்க, எது கட்டைன்னு தெரியலைன்னு... " கலாய்க்கும் இடம் உள்ளிட்ட பல காட்சிகளில் தன் பாணி குறும்பு கொப்பளிப்புகளிலும் குறை வைக்காதது... படத்திற்கு கூடுதல் பலம்.

கதாநாயகி: புளியம்பட்டி சிலம்பு செல்வி - சுதந்திர செல்வியாக சமந்தா செம. சமத்தா சிலம்பம் எல்லாம் சுற்றும் வீரப்பெண்ணாக மிரட்டியிருக்கிறார்... மிரட்டி. சிவகார்த்தி, படத்தில் ஒரு இடத்தில் சமந்தாவைப் பார்த்து அடிக்கும் "பன்ச்" போன்றே சமந்தா, "சும்மா சாமுத்ரிகா லட்சணுத்துல சலிச்சு எடுத்த சுகர்ல..." அம்மணி அழகு தேவதையாகவும்வசீகரிக்கிறார்.

பள்ளி விழாவில் உடற்பயிற்சி ஆசிரியையான சமந்தாவுக்கு சிவகார்த்தி நல்லாசிரியர் விருது வழங்கி நல் அழகாக இருக்காங்கள்ள... அதான் விருது என்னும் போதும் தியேட்டர் சிரிப்பொலியில் அதிர்கிறது.

மற்றொரு நாயகி: கெஸ்ட் ரோலில் ப்ளாஷ்பேக்கில், மன்னர் கடம்ப வேல்ராஜா - சிவகார்த்தியின் மனைவியாக தலை காட்டியிருக்கும் கீர்த்தி சுரேஷ், எதிர்பார்ப்பை கூட்டுகிறார்.

காமெடியன்: சூரி - சிவகார்த்தி காம்பினேஷன் எத்தனை பிரசித்தி என்பதற்கு "வ.ப. வாலிபர் சங்கம்", "ரஜினி முருகன்" என ஏகப்பட்ட படங்கள்சாட்சி. இந்தப் படமும் அதற்கு சற்றும் சளைத்ததல்ல... "ராஜா நீங்க ஏமாளி ராஜா.. ", "கொன்னுபுடுவீங்க கொன்னு..." என்றெல்லாம் சிவாவையே கலாய்க்கும் அவரது கணக்குப் பிள்ளை மேத்ஸ் - சூரி, செல்பியை சிலேப்பி... என்று பண்ணும் காமெடி கலாட்டாவில் தொடங்கி, ஆம்பளை புறாக்களைத் தேட வந்த இடத்தில், புறாக்களுக்கு, இதுதான் சரவணபவன் என சோள காட்டை காட்டிடுவது எனத் தொடர்ந்து, "பர்ஸ்ட் நைட் பெட்ஷீட்" விற்பது வரை காட்சி காட்சி சிரிப்பு மூட்டுகிறார்…அதிலும், "நான் உள்ள போய் செல்வியை தூக்க போறேன்.... நாலு பேர் அடிச்சு கேட்டாலும் உண்மைய சொல்லாத...i எனும் சிவகார்த்தியிடம் "நாக சைதன்யாவே வந்தாலும் சொல்ல மாட்டேன்..." எனும் இடத்தில், மிரட்டல்.

அதே நேரம், ஜில், ஜங், ஜக் என மூன்று மனைவிகளின் புருஷனான சூரிக்கு நான்காவதாக ஒரு திருமணம் க்ளைமாக்ஸில் இயக்குனர் செய்து வைப்பதும் சில காட்சிகளில் சூரியை சிக்ஸ் பேக்கில் விட்டிருக்கும் துணிச்சலும் கொஞ்சம் ஒவருங்கோ…

உப நாயகர்: சிவாவின், அப்பா கேரக்டரில் அவமானத்தில் சாகும் எட்டுப் பட்டி ராஜாவாக நெப்போலியன், ராஜாவுக்கு உரிய மிடுக்கு காட்டி அடக்கி வாசித்திருக்கிறார்.

வில்லி: சிம்ரன், வில்லன் லாலின் வில்லி மனைவியாக "நக்கத்தரங்கெட்ட நாயி.. நடு ஜாமத்துல எலும்பு கேட்டுச்சாம்.. " , "நீங்கள்ளாம் வேட்டியில தான்டா சண்டியர் கட்டு கட்டுவீங்க..... நான் புடவையிலயே கட்டுவேன் பாக்கறீங்களா? பாக்கறீங்களா...? என புடவையை வரிந்து கட்டி, இந்த ரீ-என்ட்ரியில் விஸ்வரூபம் எடுக்க முயன்றிருக்கிறார். பேஷ், பேஷ்!

வில்லன்: "என்னால ராஜா ஆக முடியாது... ஆனா நான் இருக்கிற ஊர்ல இன்னொரு ராஜா இருந்கக் கூடாது... " என வீம்பு பிடிக்கும் வின்ட் மில் வில்லன் - காத்தாடி கண்ணனாக வில்லன் லால் ஜமாய்த்திருக்கிறார்.

பிற நட்சத்திரங்கள்: யோகி பாபு, 'நான் கடவுள்' ராஜேந்திரன், மனோபாலா, ரஞ்சனி, "பிச்சைக்காரன்" மூர்த்தி, சூப்பர் குட் சுப்பிரமணி... ஆகியோரும் பாத்திரமறிந்து பளிச்சிட்டுள்ளனர்.

தொழில்நுட்பகலைஞர்கள்: படத்தொகுப்பு, பக்கா தொகுப்பு, பாலசுப்ரமணியெத்தின் ஒளிப்பதிவு. ஒவ்வொரு காட்சியிலும் ஒவியப் பதிவாக மிளிர்கிறது. டி.இமானின் இசையில், வாரன் வாரன் சீமராஜா வழிய விடுங்கடா ...", "மச்சக்கன்னி கொஞ்சம் கேட்டுப்பாரேன் என்னைப் பத்தி... ", "பட்டுன்னு ஒட்டுற பொண்ணுங்க .... வரும் ஆனா வராது.... ", "கொடுத்த அடியதிரும்ப திரும்ப கொடுக்கிறான்....", "உன்ன விட்டா எனக்கு யாரும் இல்ல ....", "கொற்றவனே குலக்கொழுந்தே .... ", "எட்டூரு எட்டும் படி ...." உள்ளிட்ட அனைத்துப் பாடல்களும், பின்னணி இசையும் பிரமாதம். கூடவே, படத்திற்கு பெரும் பலம்.

பலம்: பொன்ராம்- சிவகார்த்திகேயன்-சூரி-டி.இமான் கூட்டணியும் , "சீமராஜா" எனும் டைட்டிலும் பலம்.

பலவீனம்: அப்படி, பெரிதாக எதுவுமில்லை…

இயக்கம்: பொன்ராமின் எழுத்து, இயக்கத்தில், பூமாரங்கைக் காட்டிலும் - பெருமை வாய்ந்த பண்டைய ஆயுதமான "வளரி" பற்றிய பெருமை பேசியிருக்கும் விதமும், நாய் டைகரை சிறுத்தையாக்கிய, காமெடி மூலம் செல்பி வாட்ஸ் - அப் மோகிகளுக்கு வைத்திருக்கும்குட்டும் அசத்தல்! இவை எல்லாவற்றையும் காட்டிலும், .." விவசாயி என்னக்குய்யா லாபம் பார்த்துருக்கான்? ", "தமிழனோட நிலம் தமிழன் கிட்டதான் இருக்கணும்...", "நாம என்ன செய்றோங்கறதை விட எதிரிங்க என்ன செய்றாங்குகிறதை பார்க்கிறது தான் முக்கியம்." என்றெல்லாம் விவசாயமும், வீரமும் பேசியிருக்கும் விதமும் ஹைலைட்டோ ஹைலைட்!

" தல'க்கே தலை புள்ள பொம்பள புள்ள தான்.... பொம்பள புள்ளன்னா அவ்வளவு கேவலமா என்ன?" ன்னு காமெடி. படத்தில் கிடைத்த கேப்பில் எல்லாம் "பன்ச் "சும், மெஸேஜும் வைத்திருக்கும் இயக்குனர் பொன்ராமுக்கு ஒரு ஹேட்ஸ் ஆப்சொல்லியே ஆகவேண்டும்.

பைனல் "பன்ச்": "சீமராஜா' சிவகார்த்திகேயன்படங்களில் மற்றும் ஒரு 'சிறப்பு ராஜா!"

தமிழ் சினிமாவில் தற்போது நாயகர்களுக்கு இணையாக நடிகைகளுக்கும் முக்கியத்துவம் உள்ள படங்கள் வெளிவரத்தொடங்கியுள்ளது.

நயன்தாரா, ஜோதிகா, த்ரிஷா வரிசையில் சமந்தா களமிறங்கியிருக்கும் படம் தான் யுடர்ன்.

கன்னடத்தில் வெளியாகி ஹிட்டான இப்படத்தை அப்படத்தின் இயக்குனரான பவன் குமாரே தமிழ், தெலுங்கிலும் இயக்கியுள்ளார்.

இவர் ஏற்கனவே லூசியா என்ற படத்தின் மூலம் அனைவரின் கவனத்தை ஈர்த்தார். இப்படமும் தமிழில் எனக்குள் ஒருவன் என்றபெயரில் வெளியானது.

தொடர்ந்து வெற்றிப்படங்களில் நடித்துவரும் சமந்தாவுக்கு இப்படமும் வெற்றி கொடுத்ததா பார்ப்போம்.

கதைக்களம்

சென்னை வேளச்சேரி மேம்பாலத்தில் தொடர்ந்து பல கொலைகள் நடக்கிறது. இதை பற்றி தொடர்ந்து பத்திரிக்கையாளரான சமந்தா எழுதி வருகிறார்.

இதனால் இவரின் மீது போலிஸ்க்கு சந்தேகப்பார்வை விழுகிறது. போலிசாக ஆதி நடித்துள்ளார்.

இதன் பின் பல பிரச்சனைகளை சந்திக்கிறார் சமந்தா. கடைசியில் அந்த விபத்துக்கான காரணம் என்ன? மரணம் தடுக்கப்பட்டதா? சமந்தா பிரச்சனையிலிருந்து தப்பித்ததா என்பதே மீதி கதை.

பல முடிச்சுகளுடன் சுவாரஸ்யமாக செல்லும் இப்படத்தில் கமெர்ஷியலுக்காக பாடல்கள் என எதையும் சேர்க்கவில்லை.

படத்தை அதிகம் இழுக்காமல் 2 மணிநேரத்தில் முடித்துள்ளனர். யூகிக்க முடியாத பல காட்சிகளை வடிவமைத்துள்ளனர்.

படத்தில் சமந்தா, ஆதியைப்போல மற்ற கதாபாத்திரங்களில் ஆடுகளம் நரேன், ராகுல் ரவீந்திரன், பூமிகா ஆகியோரும் முக்கியமான கதாபாத்திரங்களில் நடித்துள்ளனர்.

பூர்ணசந்திர தேஜஸ்வியின் பின்னணி இசையில் திரில்லரை மெயிண்டெயின் பண்ணியுள்ளார். ஓளிப்பதிவுக்காக மெனக்கெட்டிருக்கிறார் நிகித் பொம்மிரெட்டி.

க்ளாப்ஸ்

சமந்தா உள்ளிட்ட மற்ற நடிகர்களின் நடிப்பு

வலுவான திரைக்கதை, யூகிக்க முடியாத முதல்பாதி காட்சிகள்

பல்ப்ஸ்

இரு மொழிகளில் தயாரானதால் பல இடங்களில் டப்பிங் செட் ஆகவில்லை.

சில இடங்களில் வரும் நாடகத்தன்மையான வசனங்கள்

மொத்தத்தில் வழக்கமான மசாலா படங்களில் இருந்து தப்பித்து புதிய அனுபவத்தை பெற ஒரு யூடர்ன் அடித்து வரலாம்.

ரத்தம் குடிக்கும் காட்டேரிகள் முன், சத்தம் போடாமல் சரிந்து விழும் காதலர்களை பற்றிய கதைதான் ‘தொட்ரா’! தலைப்பில் இருக்கிற கரண்ட், திரையிலும் இருப்பதால் தென்மாவட்டங்களில் தீப்பிடிக்கலாம். வட மாவட்டங்களில் வயிறெரியலாம். ‘நான் சாதிப் பெருமை பேசுகிறவன் தான்டா, அதுக்கென்ன இப்போ?…’ என்று அடித்தொண்டையால் சுவாசிக்கும் அத்தனை பேருக்கும் இந்த படம் சுத்தமாக பிடிக்காது. ஆனால் கட்டுப்பாடுகளை மீறி காதலிக்கும் எல்லாருக்கும் பிடிக்கும். முடிவுதான்… மூளையை சின்னா பின்னமாக்குகிறது. கொஞ்சம் மெனக்கெட்டிருந்தால், ‘காதல்’ பார்ட் 2 வாகக் கூட வந்திருக்க வேண்டிய படம். பட்…?

பழனி அடிவாரத்தில் வசிக்கும் ப்ருத்விராஜுக்கு, அதே ஏரியாவிலிருக்கும் சாதிப் பிரமுகரான எம்.எஸ்.குமாரின் தங்கை வீணா மீது லவ் வருகிறது. கடையில் விற்கும் கை முறுக்கு ரேஞ்சில் காதலை டீல் பண்ணுகிறார்கள் இருவரும். ஒரு எக்குதப்பான நேரத்தில் எஸ்கேப் ஆகிற ஜோடிகளை தேடி, எம்.எஸ்.குமார் அண் கோ அலைகிறது. காதல் ஜோடியை பலவந்தமாக பிரிக்கிற அண்ணன், கோர்ட் உத்தரவின் பேரில் தங்கையை அங்கு கூட்டிவர, கோர்ட்டின் முடிவென்ன? காதல் வென்றதா? இதுதான் க்ளைமாக்ஸ்.

படம் சூடு பிடிப்பதற்கு சுமார் முக்கால் மணி நேரம் ஆகிவிடுகிறது. அதுவரைக்கும் உப்புசப்பில்லாத சீன்களால் தள்ளு வண்டி டிரைவர் ஆகிவிடும் அறிமுக இயக்குனர் மதுராஜ், அதற்கப்புறம் அதே தள்ளு வண்டியை திடீர் பென்ஸ் காராக்கி திகைக்க விடுவது சிறப்பு. அதுவும் காதல் ஜோடிக்கு சங்கர், திவ்யா என்று பெயர் வைத்திருப்பதன் மூலம், அண்மையில் நடந்த ஆணவக்கொலையை கண்முன் கொண்டு வருகிறாரா… பதறுகிறது மனசு. பட்ட பகலில் நட்ட நடு சாலையில் நடந்த அந்தக் கொலை கிளிப்பிங்சை ரெபரென்ஸ் ஆக வைத்துக் கொண்டு படம் பிடித்திருக்கிறார்கள். அந்த நிமிஷக் காட்சிகள் மட்டும் திக் திக்!

ப்ருத்விராஜுக்கு ஏற்பட்ட தொடர் சறுக்கலை இந்தப்படம் முட்டுக் கொடுத்து நிமிர்த்தும் என்பதில் சந்தேகமில்லை. நமது கடைசி துடுப்பு இதுதான் என்பதை உணர்ந்து போராடியிருக்கிறார் இவரும். குறிப்பாக அந்த கல் குவாரியில் அடிபட்டு கதறும் காட்சிகள், பதற வைக்கிறது.

ஹீரோயின் வீணாவுக்கு கதை பேசும் கண்கள். தேவைப்படுகிற அளவுக்கு கவர்ச்சியாகவும் நடித்திருக்கிறார். ஒரு பக்கம் பாசக்கார அண்ணன். இன்னொரு பக்கம் உயிரை கொடுக்கும் லவ்வர். என்ன முடிவெடுப்பது என்று தவியாய் தவிக்கும் வீணா, அடர்த்தியான கதைகளுக்கேற்ற அல்டிமேட் வரவு!

வில்லன் எம்.எஸ்.குமாருக்கு கை கூடி வருகிறது நடிப்பு. அறிமுக நடிகர் என்று சொல்ல முடியாதளவுக்கு பர்பெக்ஷனில் கலக்குகிறார். கடைசிவரைக்கும் இந்த அண்ணன் தன் சாதி மீது தீராத பற்று கொண்டிருந்தால், அந்த கேரக்டர் சறுக்கியிருக்காது. படமும் சறுக்கியிருக்காது. தேவையில்லாத காம்ப்ரமைஸ்!

பணம் பறிக்க என்னென்னவோ வியாபாரம். ஆனால் ஏ.வெங்கடேஷ் செய்யும் காதல் வியாபாரம் புதுசோ புதுசு. (இதெல்லாம் நிஜத்தில் நடப்பதாக இயக்குனர் பிரஸ்மீட்டில் தெரிவித்ததால் மட்டுமே இதை நம்ப வேண்டியிருக்கிறது) பணத்தின் மீது குறி வைப்பவர் திடீரென ஹீரோயினை பயன்படுத்த அலைவதுதான் படு பயங்கர டிராமாவாக இருக்கிறது.

கண்ணழகி சூசன், மைனாவுக்கு பின் இந்தப்படத்தில் முக்கிய ரோலில் நடித்திருக்கிறார். அவரது கோவக்கார இமேஜூக்கு மீண்டும் ஒரு பெருந்தீனி.

ஆர்.என்.உத்தமராஜாவின் இசையில் பாடல்கள் ஈர்ப்பு. புதியவர் என்றாலும், பின்னாளில் தவிர்க்க முடியாத இடத்தை பிடிப்பார் என்று நம்ப வைக்கிற ட்யூன்கள் அத்தனையும்.

ஒளிப்பதிவாளர் செந்திலின் பல்வேறு கோணங்களை விடுங்கள். அந்த கொலைக்காட்சி… அப்படியே கண்முன் வந்து கலங்க விடுகிறது.

தொட்ரா… எலும்பை முறிப்பார்கள் என்று எதிர்பார்த்தால், கொஞ்சம் கொஞ்சம் சுளுக்கி அனுப்புகிறார்கள்!

தமிழ் சினிமாவில் பல தரமான படங்களை கொடுத்தவர் ராதாமோகன். ஆனால், சமீபமாக இவர் ஒரு ஹிட் கொடுத்து ரீஎண்ட்ரி ஆக மிகவும் முயற்சி செய்து வருகின்றார். இப்படி ஒரு நிலைமையில் தான் சில வருடங்களாக விக்ரம் பிரபுவும் உள்ளார். இவர்கள் இருவரும் இணைந்து உருவாக்கியுள்ள படமே 60 வயது மாநிறம், இவர்கள் இருவருக்கும் அந்த வெற்றி கிடைத்ததா? பார்ப்போம்.

கதைக்களம்

விக்ரம் பிரபு தன் அப்பா பிரகாஷ்ராஜை பார்க்க மும்பையில் இருந்து சென்னை வருகின்றார். பிரகாஷ்ராஜுக்கு தன்னையே யார் என்று தெரியாத அளவிற்கு மறதி உள்ளது.

அதை தொடர்ந்து ஹோமில் இருக்கும் தன் அப்பாவை துணி எடுக்க அழைத்து செல்கின்றார் விக்ரம் பிரபு. அப்போது தன் கவனக்குறைவால் அப்பாவை ஹோம் வாசலிலே மிஸ் செய்கின்றார்.

பிறகு தன் அப்பாவை தேடி தெரு தெருவாக விக்ரம் பிரபு அலைய, ஒரு போலிஸை கொலை செய்துவிட்டு வரும் சமுத்திரகனியிடம் பிரகாஷ்ராஜ் சிக்குகின்றார். சமுத்திரக்கனிக்கு எவிடன்ஸ் ஏதும் இருக்க கூடாது அதனால் பிரகாஷ்ராஜை கொலை செய் என பாஸிடம் இருந்து ஆர்டர் வருகின்றது.

இதை தொடர்ந்து விக்ரம் பிரபு தன் அப்பாவை கண்டுபிடித்தாரா, சமுத்திரக்கனி பிரகாஷ்ராஜை என்ன செய்தார்? என்பதே மீதிக்கதை.

படத்தை பற்றிய அலசல்

விக்ரபு பிரபு நீண்ட வருடங்களாக ஒரு ஹிட் படத்திற்கு போராடி வருகின்றார். இந்த படம் அவருக்கு ஹிட் கொடுக்குமா என்று தெரியவில்லை, ஆனால் கண்டிப்பாக நல்ல பெயரை வாங்கி கொடுக்கும்.

பிரகாஷ்ராஜ் நடிக்கவில்லை வாழ்ந்திருக்கின்றார், அனைத்தையும் மறந்து அவர் தன் மகன் பெயர் சிவா மட்டுமே நினைவில் வைத்து சிவா சாப்பிட்டாயா, சைக்கிள் ஓட்டினாயா என்று அவர் கேட்கும் இடம் கண் கலங்க வைக்கின்றது.

சமுத்திரக்கனி ஒரு கொலையை செய்துவிட்டு, அதை மறைக்க குமரவேல் குடும்பம், பிரகாஷ்ராஜ் ஏன் தன் கூடவே இருக்கும் பையனை கூட கொல்லும் நிலைக்கு தள்ளப்படுகின்றார். ஆனால் அவர் எப்படி இதிலிருந்து வெளியே வந்து சாதாரண மனிதனாக மாறத்துடிக்கின்றார் என்பதையும் மிக அழகாக காட்டியுள்ளனர்.

படத்திற்கு மிகவும் பக்க பலமாக இருப்பது விஜியின் வசனமும், இளையராஜாவின் பின்னணி இசையும் தான். அன்பு தான் இந்த உலகம் அதை வெளியில் காட்டாமல் நாம் தான் உள்ளுக்குள்ளே அடக்கி வச்சுகிறோம் போன்ற வசனம் ரசிக்க வைக்கின்றது.

ஆனால், இத்தனை இருந்தும் மிக பொறுமையாக செல்லும் திரைக்கதை, படத்திற்கு இந்த ஸ்லோ தேவை என்றாலும் ஜென்ரல் ஆடியன்ஸ் ஏற்றுக்கொள்வார்களா ராதாமோகன்.

க்ளாப்ஸ்

நடிகர்களின் யதார்த்தமான நடிப்பு, அதிலும் பிரகாஷ்ராஜ் செம்ம ஸ்கோர் செய்கின்றார். விக்ரம் பிரபு- ‘மேயாத மான்’ இந்துஜாவின் காட்சிகள் பிரகாஷ்ராஜ் சொன்ன கதை போல் கிளைமேக்ஸ் வரும் விதம் ரசிக்க வைக்கின்றது.

படத்தின் வசனம் மற்றும் குமரவேல் மதுமிதா தம்பதிகளின் யதார்த்தமான காமெடி.

பிரகாஷ்ராஜ் தன் காதல் கதையை சொல்லும் இடம் கவிதை போல் உள்ளது.

இளையராஜா பின்னணி இசை.

பல்ப்ஸ்

மிக மெதுவாக நகரும் திரைக்கதை.

சமுத்திரக்கனி திருந்தி வாழவேண்டும் என்று நினைக்கும் போது அப்படி ஒரு முடிவு தேவையா...

மொத்தத்தில் கொஞ்சம் பொறுமை இருந்தால் நீங்களும் கண்டிப்பாக இந்த 60 வயது மாநிற மனிதனை தேடலாம்.

கரு : சாலையில் சென்ற பெண்ணிடம், பைக்கில் வந்த மர்ம நபர்கள் செயின் பறிப்பு, என்ற செய்தியை நாம் தினந்தோறும் படிக்கிறோம். அந்த சம்பவத்தில் ஏதோ தங்கம் மட்டும் தான் திருடப்பட்டுவிட்டதாக நாம் நினைக்கிறோம். ஆனால், சில சமயங்களில் பல பெண்களின் உயிர் பறிபோவதோடு, அதனால் பலர் பலவிதத்தில் பாதிக்கப்படுகிறார்கள்.... அது எப்படி ? இதற்கு என்ன தீர்வு ? என்பது தான் இப்படத்தின் கரு.

கதை : சரண்யா பொன்வண்ணனின் ஒரே மகனானநாயகர் துருவா ., ஒரு கேஸ்ஏஜென்சியின்சிலிண்டர் 'டெலிவரிபாய் '. அழகிய டி.வி.காம்பயர் அஞ்சனா பிரேமை பார்த்த மாத்திரத்திலேயே துருவ்வின் அம்மாசரண்யாவுக்கு பிடித்துப் போக ., அவரை விடா பிடியாக பேசி முடித்து., திருமணம் செய்து வைக்கிறார்.

திருமணமான கொஞ்ச நாளிலேயே ., மாமியாரும் , மருமகளும் கடைவீதியில் ஷாப்பிங் முடித்து வீடு திரும்பிய போது அஞ்சனா கழுத்தில் அணிந்திருந்த சங்கிலியை "பைக்"கில் வந்த செயின் பறிப்பு திருடர்கள் பிடித்து இழுக்க ., அதில் அஞ்சனா பிரேமின் தாலி சங்கிலி அவர் கழுத்தை அறுத்து அவர் உயிர் பறிபோகிறது. மருமகளின் செயினை பறித்தவர்களை துரத்திச் சென்ற சரண்யாவும் திருடர்களால் தாக்கப்பட்டுசீரியஸ் கண்டீஷ னில்மருத்துவமனையில் சேர்க்கப்படுகிறார். சிட்டியை உ லுக்கிய இந்த சம்பவத்திற்கு பின்பும் செயின் பறிப்பு சம்பவங்கள் தொடர்கிறது .

இந்த செயின் பறிப்பு வழக்குகளை விசாரிக்க துணிவு மிக்க காவல் அதிகாரி சக்கரவர்த்தி நியமிக்கப்படுகிறார். அவர் செயின் பறிப்பு சம்பவத்தால் பெரிதும் பாதிக்கப்பட்ட துருவாவை அழைத்து ஆறுதல் கூறி ., செயின் பறிப்பு கும்பலுக்கு முடிவு கட்டஅவரது ஒத்துழைப்பை கேட்கிறார்.
சக்ரவர்த்தி என்ன மாதிரி ஒத்துழைப்பு கேட்டார் ? துருவா ஒத்துழைத்தாரா ? செயின் பறிப்பு கும்பலுக்கு முடிவு கட்டப்பட்டதா ..? சரண்யா பிழைத்தாரா ..? ஹீரோ துருவின் கடந்த கால மனைவியாகஅஞ்சனா பிரேமின் கேரக்டர் ஒ.கே .இதில் "பிக்பாஸ்"ஐஸ்வர்யா தத்தா கேரக்டர் தான் என்ன ..? என்பது உள்ளிட்ட இன்னும் பல வினாக்களுக்கு வித்தியாசமாகவும் விடை சொல்கிறது ''மறைந்திருந்து பார்க்கும் மர்மம் என்ன’' மீதிக் கதை மொத்தமும்!

காட்சிப்படுத்தல் : வி. மதியழகன் - ஆர்.ரம்யா இருவரதுஎட்ரிக்டா எண்டர்டெயின்மென்ட் & ,மாஸ்எண்டர்டெயின்மென்ட்தயாரிப்பில், ஆர்.ராகேஷ் எழுத்து , இயக்கத்தில் புதுமுகம் துருவா - "பிக்பாஸ்" ஐஸ்வர்யா தத்தா , அஞ்சனா பிரேம், சக்கரவர்த்தி ,சரண்யா பொன்வண்ணன் ஆகியோர்நடிக்க., "செயின் சினாசிங் கேங் "எனப்படும் பெண்களிடம் சங்கிலி பறிக்கும் கும்பல் பற்றிய திக் திக் கதையம்சத்துடன் வந்திருக்கும் படம் தான்
"மறைந்திருந்து பார்க்கும் மர்மம் என்ன."

கதாநாயகர் : புதுமுக நாயகர்துருவா நல்ல வாட்டசாட்டமாக ஆக்‌ஷன் ஹீரோவாக சங்கிலி பறிக்கும் திருடர்களுக்கே சவாலான திருடராக அறிமுகமாகி அசத்தலாகவலம் வருகிறார்.

செயின் பறிக்கும் கூட்டத்தில் ஒருவராக அவர் வலம் வருவது, வெகுளித்தனமான அம்மாவுக்கு பாசமான பிள்ளையாக இருப்பது , என்று தனது கதாபாத்திரத்தை ரொம்பவே நிறைவாக துருவா செய்திருக்கிறார்.

கதாநாயகியர் :இரண்டு நாயகியரில் ஒருவரான ".பிக் பாஸ்" ஐஸ்வர்யா தத்தா ஆரம்பத்தில் அதிரடியாக அறிமுகமானலும், ஹீரோவின் பிளாஷ்பேக்கை ஓபன் செய்யும் கருவியாகவே அவர் பயன்பட்டிருக்கிறார். பிறகு திடீரென்று வேறு ஒரு பரிணாமத்தில் போலீஸாகக்ளைமாக்ஸில் வந்து நிற்பது அவ்வளவாக எடுபடவில்லை.

அதே நேரம் மற்றொரு நாயகியாக ரியல் எஸ்டேட் நிறுவனத்தின் விளம்பர படத்தில் நடிக்கும் பெண்ணாக வரும் அஞ்சனா பிரேம் ., கொஞ்ச நேரமேகுறைவான காட்சிகளில் ...வந்தாலும் ரசிகர்கள் மனதில் நின்றுவிடுகிறார்.பேஷ் , பேஷ் .

பிற நட்சத்திரங்கள் :பல படங்களில் பாசமான அம்மாவாக பார்த்து வந்த சரண்யா பொண்வன்னனுக்கு இதிலும்அதே ரோல் தான் என்றாலும், அதில் சற்று வித்தியாசத்தை காட்டியிருக்கிறார். சக்ரவர்த்தி , ராதாரவி, அருள்தாஸ், மைம் கோபி, . . ஆகியோரும் எப்போதும் போல தங்களது கதாபாத்திரத்திற்கு ஏற்ப பக்காவாகநடித்திருக்கிறார்கள். மனோபாலா சிரிக்க வைக்க முயன்று கடித்திருக்கிறார்.

பலம் : சினிமா என்பது பொழுது போக்கு அம்சமாக இருந்தாலும், அவ்வபோது சமூக அக்கறையோடும் சில படங்கள் வருவதுண்டு. அந்த வகையிலான ஒரு படம் தான் இந்த ‘மறைந்திருந்து பார்க்கும் மர்மம் என்ன’ என்பது இப்படத்திற்கு பெரும் பலம்.

பலவீனம் : ''மறைந்திருந்து பார்க்கும் மர்மம் என்ன?" எனும் டைட்டில் ஏதோ காதல் பட டைட்டில் மாதிரி இருப்பது , இப்படத்திற்கு பெரும் பலவீனம்.

தொழில்நுட்பகலைஞர்கள் : பி.ஜி.முத்தையாவின் ஒளிப்பதிவில் பைக் சேசிங் காட்சிகள் மிரட்டல், படத்தில் ஏகப்பட்ட பைக் சேசிங் காட்சிகள் வந்தாலும், ஒவ்வொன்றையும் ஒரு விதத்தில் படமாக்கியிருக்கிறார். அச்சு ராஜாமணியின் இசையில் பாடல்களும், பின்னணி இசையும் திரைக்கதைக்கு ஏற்ப ஜீவனோடுபயணித்திருக்கிறது

இயக்கம் :சாலையில் சென்ற பெண்ணிடம், பைக்கில் வந்த மர்ம நபர்கள் செயின் பறிப்பு, என்ற செய்தியை நாம் தினந்தோறும் படிக்கிறோம். அந்த சம்பவத்தில் ஏதோ தங்கம் மட்டும் தான் திருடப்பட்டுவிட்டதாக நாம் நினைக்கிறோம். ஆனால், சில சமயங்களில் பல பெண்களின் உயிர் பறிபோவதோடு, அதனால் பலர் பலவிதத்தில் பாதிக்கப்படுகிறார்கள்.... அது எப்படி ? என்பதை சஸ்பென்ஸ் த்ரில்லராக சொல்லியிருப்பதோடு, செண்டிமெண்ட், காதல் என்று கமர்ஷியலாகவும் சொல்லியிருக்கிறார் இப்பட இயக்குநர் ஆர்.ராகேஷ்.

பொதுவாக இதுபோன்ற படங்களில் வில்லன்கள் தான் செயின் பறிப்பு திருடர்களாக இருப்பார்கள், ஆனால் இந்த படத்தில் ஹீரோவே செயின் திருடர்களின் கூட்டத்தில் ஒருவராக இருக்க, ஹீரோவா! ஏன்? என்ற ஆச்சரியம் கலந்த கேள்வி படம் பார்க்கும் அனைவருக்கும் ஆரம்பத்திலேயே ஏற்படுத்திவிடும் . , பிறகு அதற்கான காரணத்தை இயக்குநர் சஸ்பென்ஸோடு சொல்லியுள்ள விதம்தான் இப்படத்தின் பாராட்டிற்குரிய அம்சமாகும்.

அதே மாதிரி ,"இந்த உலகத்துல முதல்ல வந்தவன் திருடன் தான் அவன கண்டுபிடிக்க ரெண்டாவதா வந்தவன் தான் போலீஸ் ... " ,"பொருள் அடிக்கிறவன் பொண்ணுங்களை பார்க்கக் கூடாது...." உள்ளிட்ட வசனங்கள் மூலமும் திரும்பி பார்க்க வைத்திருக்கும் இயக்குநர் ராகேஷ்., செயின் கொள்ளை சம்பவத்தை பற்றி படம் எடுத்தாலும், அதை பெண்கள் சார்பில் இருந்துதிரைக்கதை அமைத்திருக்கிறார்.

”பெண்களுக்கு பிடித்தமான விஷயமே தங்கம் தான், ஆனால் அந்த தங்கத்தின் மீதே அவர்களுக்கு பயம் ஏற்பட வைத்துவிட்டார்களே” என்று பெண்களின் நிலையில் இருந்து இப்படத்தின் ஒவ்வொரு காட்சியையும் கையாண்டிருக்கும் இயக்குநர் ராகேஷ், செயின் பறிப்பு குற்றத்தை பொருத்தவரை வழிப்பறி மற்றும் திருட்டு வழக்காக பதிவு செய்யும் காவல் துறை, அதை கொலை முயற்சியாக பதிவு செய்ய வேண்டும் என்ற கருத்தை ரொம்ப அழுத்தமாக பதிவு செய்திருப்பதோடு, அவர்களுக்கு எந்த மாதிரியான தண்டனை கொடுக்க வேண்டும் என்பதையும் தைரியமாக சொல்லியிருக்கிறார்.

இயக்குநர் ராகேஷ் சொல்வது போல, செயின் பறிப்பு திருடர்களுக்கு காவல்துறை தண்டனை கொடுத்தால், நிச்சயம் இந்த குற்றங்கள் நடைபெறாது என்பது உறுதி.

மற்றபடி .,படத்தில் ஒருசில இடங்களில் சில வாஜிக் குறைகள் இருந்தாலும், சமூகத்திற்கு தேவையான ஒரு படமாகவும், மக்களை குறிப்பாக பெண்களை உஷார்ப்படுத்தும் பாடமாகவும் இப்படம் இருக்கிறது... என் பது கவனிக்கத்தக்க விஷயமாகும்.

மொத்தத்தில்., ''மறைந்திருந்து பார்க்கும் மர்மம் என்ன' - 'திரையரங்கம் சென்று தாராளமாக பார்க்கலாம் என்பதில்சந்தேகம் வேண்டாம் என்ன?!

ஒரு மாஸ் ஹீரோவிற்கு எத்தனை மாஸ் வருமோ, அந்த அளவிற்கு லேடி சூப்பர் ஸ்டார் நயன்தாராவிற்கும் ஒரு மாஸ் பேன் பாலோயிங் உள்ளது. அதற்கு காரணம் அவர் தொடர்ந்து தரமான கதையாக தேர்ந்தெடுத்து நடிப்பது தான். அந்த வகையில் இந்த கோலமாவு கோகிலாவும் தரமான படங்களின் லிஸ்டில் சேர்ந்ததா? பார்ப்போம்.

கதைக்களம்

நயன்தாரா மிடில் கிளாஸ் குடும்பம். அன்றாட வாழ்க்கையை நகர்த்தவே கஷ்டத்தில் இருக்கும் போது அவருடைய அம்மா சரண்யாவிற்கு கேன்சர் வருகின்றது.

அதை குணப்படுத்த நிறைய பணம் தேவைப்படுகின்றது. அந்த சமயத்தில் யதார்த்தமாக ஒரு போதைப்பொருள் கும்பலிடம் நயன்தாரா சிக்குகின்றார்.

அந்த கும்பலும் நயன்தாரா அப்பாவியாக இருக்கின்றார், யாருக்கும் சந்தேகம் வராது, இவரை வைத்தே கடத்தல் செய்யலாம் என்று நினைக்க, இவை நயன்தாராவிற்கு பெரும் பிரச்சனையில் போய் முடிகின்றது.

இந்த பிரச்சனை எல்லாம் கோகிலா எப்படி முறியடிக்கின்றார், தன் அம்மாவை எப்படி காப்பாற்றுகின்றார் என்பதே மீதிக்கதை.

படத்தை பற்றிய அலசல்

நயன்தாரா ஒன் Women ஷோ என்று சொல்லலாம், இவருக்கு மட்டும் எப்படி ஹீரோயினுக்கு முக்கியத்துவம் கொடுக்கும் கதாபாத்திரம் இத்தனை நன்றாக கிடைக்கின்றதோ என எண்ண வைக்கின்றார். கொஞ்சம் நானும் ரவுடி தான் காதம்பரி ஸ்டைல், அமைதி மற்றும் பதட்டத்துடனே படம் முழுவதும் அசத்துகின்றார். அதிலும் ‘சார் நீங்க அவன சுட்டா தான் இங்க இருந்து போவேன், கொலை பார்க்க பயமா இருக்கு நான் திரும்பி காதை மூடிக்கொள்கின்றேன்’ என சொல்லும் இடமெல்லாம் செம்ம அப்லாஸ்.

அவருக்கு அடுத்து படத்தில் ஸ்கோர் செய்வது சொல்லி தெரிய வேண்டியது இல்லை யோகிபாபு தான். படத்தின் முதல் பாதி ஒரு பாடலுடன் எஸ்கேப் ஆகின்றார், அட எங்கடா போனார் என்று தேடும் நிலையில் இரண்டாம் பாதியில் நயன்தாராவுடனே ட்ராவல் செய்து கலக்குகின்றார்.

படத்தில் சின்ன சின்ன கதாபாத்திரங்களும் நம்மை கவர்கின்றனர், நயன்தாரா தங்கை ஜாக்லீன், யோகிபாபு கடையில் வேலை பார்க்கும் பையன், மொட்டை ராஜேந்திரன், இவர்களை எல்லாம் விட டோனி என்று ஒரு கதாபாத்திரம் வருகின்றது. அவருடைய மேனரிசம் சிரிப்பு சரவெடி. அதே நேரத்தில் ஜாக்லினை காதலிக்கும் இளைஞர் ஏற்கனவே மீசைய முறுக்கு படத்தில் எப்படி பதட்டமாக பேசுவாரோ, அதேபோல் தான் இதிலும், ஆனால் கொஞ்சம் ஓவர் ஆக்டிங்.

விறுவிறுப்பாக சொல்ல வேண்டிய கதையை இயக்குனர் நெல்சன் கொஞ்சம் மெதுவாகவே நகர்த்தி செல்கின்றார். இடைவேளைக்கு முன்பு வரும் படத்தின் எதிர்ப்பார்ப்பு, அதன் பிறகு காமெடி ஒர்க் அவுட் ஆனாலும் திரைக்கதை கொஞ்சம் மெதுவாகவே செல்கின்றது, அதிலும் கிளைமேக்ஸ் அட என்னப்பா இப்படி என்று தான் நினைக்க வைக்கின்றது.

சிவகுமாரின் ஒளிப்பதிவு ரசிக்க வைக்கின்றது, அனிருத் பாடல்கள் ஏற்கனவே ஹிட் செய்து விட்டார், பின்னணியிலும் நல்ல இசையை கொடுத்தாலும், கொஞ்சம் டயலாக் கேட்க விடுங்க சார் என்று சொல்ல தோன்றுகின்றது.

க்ளாப்ஸ்

நயன்தாரா, யோகிபாபு காட்சிகள் கைத்தட்டல் பறக்கின்றது.

படத்தின் வசனம் டார்க் ஹியூமர் நன்றாக ஒர்க் ஆகியுள்ளது, அதிலும் மொட்டை ராஜேந்திரன் ‘பச்சையப்பாவில் படித்தாலும் பச்சை பச்சையாக பேசுவேன், எட்டுக்கால் பூச்சிக்கு எட்டுக்கால் இருந்தாலும், 10வது மாடி போக 8 வருஷம் ஆகும், ஆனா 10 ரூ ராக்கேட் உடனே போகும், நீ ராக்கேட் மாதிரி போகனும்’ என்று பல வசனங்கள் பேசி இப்படி ஸ்கோர் செய்கின்றார்.

கதாபாத்திரங்கள் வடிவமைப்பு, அதிலும் டோனி செம்ம.

பல்ப்ஸ்

நல்ல விறுவிறுப்பாக செல்லவேண்டிய கதையை கொஞ்சம் மெதுவாக நகர்த்தி சென்றது.

கிளைமேக்ஸ் இன்னும் கொஞ்சம் கூட அழுத்தமாக இருந்திருக்கலாம்.

மொத்தத்தில் நயன்தாரா, யோகிபாபுவை நம்பி கோகிலா சரக்கை வாங்கலாம்.

ஒட்டு போட்ட ஓவர் கோட், பனிரெண்டு கலர்களிலும் பல் இளிக்கிறது! பின்னே என்னவாம்? முந்தைய படத்தில் கழித்ததையெல்லாம் இந்தப்படத்தில் கொட்டிக் குமித்தால், பளபளப்பில்லாத பார்ட் 2 ரெடி! ஏரியல் ஷாட் இல்லாத லண்டன், எக்குதப்பான சி.ஜி காட்சிகள் என கமல்ஹாசனின் பர்பெக்ஷனில் கண்டமேனிக்கு சறுக்கல்!

தீவிரவாதிகளை அடக்கக் கிளம்பிய ரா உளவுப் பிரிவை சேர்ந்த மேஜர் ஒருவரின் சாகசம்தான் ‘விஸ்வரூபம்2’. மேஜர் சுந்தர்ராஜனுக்கு நயன்தாராவை ‘ப்பேர்’ பண்ணிய மாதிரியிருக்கிறது அநேக காட்சிகள். கடைசியாக வெளியே வரும் ரசிகன், “யாருக்காவது கதை புரிஞ்சா சொல்லிட்டு போங்களேன்டா…” என்று படிக்கட்டிலேயே தர்ணா பண்ணாமலிருந்தால் ஆச்சர்யம்!

கமல் தன் பேமிலிகளோடு(?) எங்கெங்கோ போகிறார். அங்கெல்லாம் அவரை துரத்திக் கொண்டு வருகிறார்கள் துஷ்டர்கள். நாக்கை துருத்தி முகத்தை ஒரு மாதிரியாக வைத்துக் கொண்டு அவர்களையெல்லாம் போட்டுத்தள்ளுகிறார் மேஜர் கமல். அந்த ஆபரேஷனில் அநியாயத்துக்கு செத்துப்போகிற ஆன்ட்ரியா, கமலின் லவ்வரா? இல்ல லுல்லுலாயா? என்பதையெல்லாம் புரிந்து கொள்ள முயற்சிக்கிறோம். பட்…? தலை கிர்ரென்கிறது. ஆமாம்… கடலின் ஆழத்தில் கிடக்கும் அந்த வெடிகுண்டை பார்க்க எதுக்குங்க அப்பாவி பெண்டாட்டியான பூஜா குமாரை அனுப்பணும்? மிலிட்டரிக்கும் அவருக்கும் ஏதேனும் ஸ்நான பிராப்தி இருக்கா?

சரி விடுங்கள். கமலின் வழக்கமான ‘அட… மற்றும் அடடே’க்கள் இருக்குமே! இல்லாமலா? எங்கோ மின்னல் போல வந்துவிட்டு மின்னல் போல மறைந்துவிடுகின்றன அவையெல்லாம். பல வருடங்கள் கழித்து தன் அம்மாவை சந்திக்கும் அவர், ‘எதிர்ல இருக்கிற நான்தான்மா உன் புள்ள…’ என்று உதடு வரை வந்து முழுங்குகிற காட்சி ஒன்று சாம்பிள். அப்புறம் வழக்கமாக அவருக்கென இருக்கும் பிரான்டட் முத்தங்கள். ரொமான்சுகள்…! ஆனால் அவையெல்லாம் அரசாங்க ஆஸ்பத்திரியின் ஆக்சிடென்ட் வார்டை கடப்பது போல அத்தனை கொடுமை! (இனிமே எதுக்கு சார் இந்த ரொமான்செல்லாம்?)

பிராமணர்களை வச்சு செய்ய வேண்டும் என்று நினைத்திருக்கிறார் கமல். இந்திய பாதுகாப்பு பிரிவில் இருக்கும் எல்லா ஆபிசர்களும் ‘அவாள்’களாகவே இருக்கிறார்கள். ‘எதிரி சாகறதை என் கண்ணால பார்த்துண்டே சாகணும்…’ என்கிறார் ஒரு அதிகாரி. ‘நான் சொன்னனேனோல்யோ…’ என்கிறார் இன்னொருத்தர். ‘வர வர நீ நம்மாளாங்கறதே சந்தேகமா இருக்கு’ என்கிற அந்த பிராம்ணாள் ஆபிசரிடம், ‘சத்தியமா இல்ல’ என்று கூர்மையாக மறுக்கிற காட்சியில் மட்டும் நாத்திக கமல் பளிச்சிடுகிறார்.

பூஜா குமாருக்கு சினிமா ஆசை போக வேண்டி கும்பகோணம் மகாமகம் கரையோரம் உட்கார்ந்து யாராச்சும் சிறப்பு யாகம் பண்ணினால் தேவலை! விஸ்வரூபம் பார்ட் 3 வர்ற நேரத்தில் பூஜா குமாருக்கு தவிர்க்க முடியாத குடும்ப வேலைகள் அமைய குடும்பம் குடும்பமாய் கூட்டம் கூட்டமாய் வேண்ண்ண்ண்டுகிறோம் ஆன்ட்டவரே….!

அவ்வளவு கொடுமையிலும் சிறகசைத்து பறக்கிற திடீர் பட்டாம்பூச்சியாய் ஆன்ட்ரியா. சடக்கென கண் சிமிட்டி, அவர் பேசும் டயலாக்குகள் அப்படியே அள்ளுகிறது நம்மை. ஆச்சர்யமாக சில பைட்டுகளும் இருக்கிறது. பின்னுகிறார்.

அதென்ன…? நார்த் மெட்ராஸ் அழுக்கு குப்பையில் ரவுடிகள் பற்றி கதைகள் எடுத்தாலும் குடும்ப பெண்களை கடத்தி வைத்துக் கொண்டு மிரட்டுகிறான் வில்லன். இன்டர்நேஷனல் லெவல் டெரரிசம் பற்றி எடுத்தாலும் அதே பார்முலாவை கடைபிடிக்கிறான் வில்லன்? எம்.ஜி.ஆர் நம்பியார் காலத்து ஃபார்முலாவை தயவு செய்து மாற்றுங்கப்பா!

ஜிப்ரானின் இசையில் பின்னணி அபாரம். ஒளிப்பதிவாளரை அடக்கி வாசிக்க விட்டிருக்கிறார்கள். வெளிநாட்டில் கதை நடக்கும் போது ஒரு காட்சியாவது வெளி உலகத்தை காட்ட வேண்டாமா? மேட்ச் பண்ணுவதில் பிக்சிங் இருக்குமோ என்னவோ?

கமல் கட்சி 234 தொகுதியிலும் நிற்பதாகவே வைத்துக் கொள்வோம். அந்த நேரத்தில் எதிர்கட்சிகள் தொகுதி வாரியாக விஸ்வரூபம் 2 ஐ வேஷ்டியோ, வெள்ளை துணியோ கட்டி திரையிட்டால் போதும். கமலின் கட்சியே காலியாகும் வாய்ப்பு நிச்சயம். ஒரு யோசனைதான்…!

மற்றபடி விஸ்வரூபம், கஷ்டகாலம்!

கமல்ஹாசனின் 'விஸ்வரூபம்' திரைப்படம் கடந்த 2013ஆம் ஆண்டு வெளிவந்த நிலையில் ஐந்து வருடங்கள் கழித்து இன்று இந்த படத்தின் இரண்டாம் பாகம் வெளிவந்துள்ளது. இந்த படத்தின் புரமோஷன் முதல் பாகம் அளவுக்கு இல்லை. மேலும் முதல் பாகம் போல் இந்த படத்திற்கு எதிர்ப்பும் இல்லாததால் இலவச விளமபரங்களும் கிடைக்கவில்லை. இந்த நிலையில் இன்று வெளியாகியிருக்கும் 'விஸ்வரூபம் 2' திரைப்படம் ரசிகர்களை கவருமா? என்பதை பார்ப்போம்

உளவுத்துறையான 'ரா' என்ற அமைப்பின் அதிகாரிகளான கமல்ஹாசன், சேகர் கபூர், பூஜா குமார், ஆண்ட்ரியா ஆகியோர் அமெரிக்காவில் இருந்து தப்பியோடிய உமர் என்ற தீவிரவாதியை தேடி வருகின்றனர். உமர், கமல் குழுவினர்களை கொலை செய்ய பலவித முயற்சி செய்கிறார். இந்த நிலையில் பிரிட்டன் தலைநகர் லண்டன் கடலில் செயற்கையாக பூகம்பம் மற்றும் சுனாமி
ஏற்படுத்தி லண்டன் முழுவதையும் அழிக்க உமர் திட்டமிடுகிறார். இதனை கண்டுபிடிக்கும் ரா உளவாளிகள் எப்படி தடுக்கின்றனர். அதன்பின்னர் என்ன ஆகின்றது என்பதுதான் கதை.

கமல்ஹாசனின் நடிப்பை விமர்சனம் செய்ய வேண்டும் என்றால் அதற்கு ஒரு நாள் போதாது. இண்டர்நெட்டில் பல ஜிபிகளுக்கு அவருடைய நடிப்பை விவரித்து கொண்டே செல்லலாம். இந்த படத்தில் கமல் வளவள என பேசாமல் சின்ன சின்ன வசனங்களில் பெரிய பெரிய விஷயங்களை கூறியுள்ளார். அதை எழுத்தால் எழுதினால் புரியாது. காட்சியுடன் சேர்ந்து பார்த்தால்தான் புரியும். கமல் ஒரு மாபெரும் சினிமா ஞானி என்பதை மீண்டும் ஒருமுறை நிரூபித்துள்ளார்.

குறிப்பாக 'தூங்காதே தம்பி தூங்காதே' படத்திற்கு பின்னர் கமல்ஹாசன் படத்தில் நீளமான அம்மா செண்டிமெண்ட் காட்சி இந்த படத்தில் தான் உள்ளது. ஒரு தீவிரவாத ஆக்சன் படத்தில் அம்மா செண்டிமெண்டா? என்று கேட்பவர்கள் படத்தை பார்த்தால் வாயடைத்து போய்விடுவார்கள். அதேசமயம் கமர்ஷியலுக்காக லிப்கிஸ் முத்தகாட்சியும், டூயட் பாடலும், படுக்கையறை காட்சிகளும் இந்த படத்தில் உண்டு

பூஜாகுமாருக்கு பெரிதாக நடிக்க வாய்ப்பு இல்லை. ஆனால் ஆண்ட்ரியாவுக்கு கொஞ்சம் அழுத்தமான காட்சிகளும், ஆக்சன் காட்சிகளும் உண்டு. ரா உயரதிகாரியான சேகர் கபூரின் நடிப்பும், உமர் என்ற கேரக்டரில் நடித்துள்ள ராகுல் போஸ் நடிப்பும் சூப்பர். அனந்த் மகாதேவன் சில காட்சிகளே வந்தாலும் கைதட்டல் பெறுகிறார்.

ஜிப்ரானின் இசையில் இந்த படத்தில் மூன்று பாடல்கள் உள்ளன. மூன்றுமே சூப்பர். குறிப்பாக 'நானாகிய நதிமூலமே' பாடல் படமாக்கப்பட்ட விதம் மிக அருமை. மேலும் ஜிப்ரான் பின்னணி இசையிலும் ஹாலிவுட் தரத்தில் கொடுத்து கலக்கியுள்ளார்.
இதுவரை தமிழ்ப் படங்களில் வந்ததில்லை என்று கூறலாம்.

கமல்ஹாசனின் கூர்மையான திரைக்கதையும் வசனங்களும் படத்தின் மிகப்பெரிய பலம். ஆனால் எத்தனை பேர்களுக்கு இந்த படத்தின் கதையும் காட்சிகளும் புரியும் என்பது சந்தேகம். குறிப்பாக பி மற்றும் சி செண்டர் ரசிகர்களுக்கு இந்த படம் போரடிக்க வாய்ப்புண்டு. ஒருசில ஏ செண்டர் ரசிகர்களுக்கும்தான்.

ஆனால் ஹாலிவுட் தரத்தில் ஒரு தமிழ்ப்படம் வராதா? என்று ஏங்கியவர்களை திருப்தி செய்துள்ள படம்தான் 'விஸ்வரூபம் 2'

விஸ்வரூபம் 2013ம் ஆண்டு பல தடைகளை உடைத்து வெளிவந்த கமல்ஹாசன் படம். ஹாலிவுட் தரம் என்று பேச்சுக்கு இல்லாமல் உண்மையாகவே ஒரு ஹாலிவுட் படத்தை பார்த்த அனுபவத்தை கொடுத்த கமல், முதல் பாகத்தில் பல கேள்விகளுக்கு விடை தராமல் முடித்திருப்பார், குறிப்பாக இந்த போர் நிற்க வேண்டும் என்றால் நான் சாக வேண்டும் அல்லது உமர் சாக வேண்டும் என்பார், போர் நின்றதா? பார்ப்போம்.

கதைக்களம்

படம் முதல் பாகத்தின் சில காட்சிகளை காட்டிவிட்டு படம் முழுவதும் முதல்பாகத்துக்கு முந்தைய காட்சிகளும், தற்போதைய காட்சிகளும் மாறி மாறி வருகின்றன.

முதல்பாதியில் கமல் எப்படி தீவிரவாதிகள் குருப்பில் இணைந்தார் என்பது தெளிவாக இருக்காது.

படம் தொடங்கியதுமே கமல், பூஜாகுமார், ஆண்ட்ரியா அனைவரும் லண்டன் புறப்பட்டு செல்கின்றனர். அப்போது கமல் முன்பு நடந்ததை நினைத்து பார்க்கிறார். ராணுவத்தில் ஆண்ட்ரியாவுக்கு உயர் அதிகாரியாக பணியாற்றுகிறார் கமல். அப்போது அவருடன் காதல் செய்கிறார். அவருடன் தனியறைக்கு போவதுபோல நடிக்க இதனால் ராணுவத்திலிருந்து நீக்கப்பட்டு சிறைக்கு அனுப்பப்படுகிறார்.

இதனையடுத்து அங்கிருந்து தப்புவதுபோல ஆப்கானிஸ்தானுக்கு தேடப்படும் குற்றவாளியாக செல்கிறார். அதன்பின் அங்கு வில்லன் உமருடன் அவர் செய்வதை முதல்பாகத்திலேயே பார்த்திருப்போம்.

பின்னர் உமர்க்கு உண்மை தெரிந்து அவர் அங்கிருந்து தப்பிய கதை எல்லாம் வருகிறது. நிகழ்காலத்தில் லண்டனுக்கு நேரவிருக்கும் பெரிய பேராபத்தை தடுக்கிறார். இதையடுத்து உமரின் மற்ற சதியை முறியடித்து அவரை கொன்றாரா என்பதே மீதிகதை.

படத்தை பற்றிய அலசல்

படம் முழுவதும் தேசப்பற்றை வெவ்வேறு வடிவங்களில் காட்டுகிறது. படத்தில் முதல் பாடலே ராணுவத்தில் நடக்கும் பயற்சியுடன் கமல் செய்யும் ரொமான்ஸும் தான். பல இடங்களில் குறிப்பிட்ட சாதியினர் தான் உயர்ந்த பதவிகளில் இருக்கிறார்கள் என்பதை சுட்டிக்காட்டுகிறார். அவாளை கலாய்க்கவும் செய்கிறார்.

சண்டைக்காட்சிகளுக்கு குறைவேயில்லை. முழுவதும் நிரம்பியிருக்கிறது. முதல் பாகத்தில் வந்த டிரான்ஸ்பமேஸன் சண்டையை மீண்டும் முயற்சி செய்துள்ளனர். டெக்னிக்கலாகவும் பல இடங்களில் Freezing Shot, ரிவர்ஸில் சென்று ஸ்லோமோஷனில் காட்டுவது என அசத்தியுள்ளனர்.

கமர்சியல் விஷயங்கள் அதிகமாக இல்லை. பாடல்களும் பெரியளவில் தொந்தரவாக அமையவில்லை. ஓரளவு சரியான இடத்திலேயே பொருந்துகிறது. அம்மாவாக நடித்தவர் பிரமாதம். நானாகிய நதிமூலமே என்ற அந்த பாடல் கொஞ்சம் எமோஷ்னலாகவே இருந்தது.

பாடல்கள் மனதில் நிற்கவில்லையென்றாலும் பின்னணி இசையில் அசத்தியுள்ளார் ஜிப்ரான். ஆனாலும் ஞாபகம் வருவதால் முதல் பாகத்திலிருந்த விறுவிறுப்பு ஏனோ மிஸ்ஸிங்.

நடிப்பை பொறுத்தவரையில் கமலைப்பற்றி சொல்லவே தேவையில்லை. மனுஷன் எல்லாகாட்சிகளிலும் பின்னுகிறார். ஆண்ட்ரியாவும் சண்டைக்காட்சியிலும் அசத்துகிறார். கடைசியில் இவரின் முடிவு கொஞ்சம் சோகத்தை ஏற்படுத்துகிறது. பூஜாகுமார் முதல் பாகத்தைவிட இதில் படம் முழுவதும் டிராவல் ஆகிறார். ரொமான்ஸ் காட்சியில் ஸ்கோர் செய்கிறார்.

வில்லனாக வந்த ராகுல்போஸ் இரண்டாம் பாதியில் தான் அவரின் காட்சி அதிகமாக வருகிறது. வில்லத்தனமும் புதுமையாக இருக்கிறது.

வசனத்திலும் உலகநாயகன் அசத்துகிறார். எதிரியின் கண்ணை பார்த்து அவன் சாவதை பார்த்துக்கொண்டே தான் சாகனும். எந்த மதமாக இருந்தாலும் தேசப்பற்று இருப்பது தான் முக்கியம் என்கிறார்.

மேலும் உயர் அதிகாரியாக வரும் சேகர் கபூர், லண்டன் ஆசாமி, சில நிமிடங்களே வரும் ஆண்ட்ரியாவின் அப்பா கதாபாத்திரம் என மற்ற கதாபாத்திரங்களும் சிறப்பாகவே செய்துள்ளனர்.

க்ளாப்ஸ்

படத்தில் சண்டைக்காட்சிகள் அசத்தலாக உள்ளது. ஹாலிவுட் தரத்திலான பல காட்சிகள்.

பின்னணி இசையும், ஒளிப்பதிவும் மிரட்டல்

கமல், ஆண்ட்ரியா, பூஜாகுமார், ராகுல் போஸ் என ஒவ்வொருவரின் நடிப்பும்

லண்டனில் டெல்லியை சேர்ந்த ஷேஷாத்திரியுடனான உரையாடல்

பல்ப்ஸ்

படத்தில் சில காட்சிகளில் கிராபிக்ஸ் இன்னும் கொஞ்சம் நன்றாக இருந்திருக்கலாம். 5 வருட இடைவெளியும் ஒரு காரணமாக இருக்கலாம்.

அடித்தட்டு மக்களுக்கு இன்னும் ஒரு சில காட்சிகள் புரியாமல் இருக்குமோ என்று தோன்றுகிறது.

மொத்தத்தில் முதல் பாகத்தை எதிர்பார்த்து வந்தவர்களை கொஞ்சமும் ஏமாற்றாமல் இரண்டாம் பாகத்திலும் விஸ்வரூபம் எடுத்திருக்கிறார்.

வாழ்ந்த வாழ்க்கையை நினைத்தபடியும் , சூதி லும் .. வாழ்க்கையை கோட்டை விட்ட அப்பா ., காதலியின் தூண்டுதலால் அப்பாவிட்ட தையும் சேர்த்து பிடிக்க போராடும் மகன் ... இவர்களே கரு.

கதை: அந்த கிராமமே போற்றும் மணியார் குடும்பம் ஹீரோ உமாபதி ராமைய்யாவின் குடும்பம். அப்பா தம்பி இராமைய்யாவின் பழம் பெருமை பேசியபடியே காலம் தள்ளும் சோம்பேறித்தனத்தால் அவர்கள் வசிக்கும் பெரிய வீட்டின் கதவு, ஜன்னல் கதவை எல்லாம் விற்று தின்று வரும் சூழல் .ஹீரோ குட்டி மணியார் - உமாபதி ராமைய்யாவும் குடி, கும்மாளம் ...என ஜாலி மைனராகவே ஊரைச் சுற்றி வருகிறார்.

இந்நிலையில், நிறைய படித்து விட்டு,கை நிறைய சம்பதிக்கும் தம்பி இராமைய்யாவின் சகோதரியின் மகள் மிருதுளா முரளி முறைப்பையன் குட்டி மணி - உமாபதி ராமைய்யாவை தீவிரமாக காதலிப்பதுடன், அவரை தொழில் அதிபராக உயர்த்தவும் முயற்சி எடுக்கிறார். ஆனால் மிருதுளாவின் முயற்சிக்கு அவரது அப்பா ஜெயப்பிரகாஷே கடும் தடையாக இருப்பதுடன் மிருதுளாவை உமாபதிக்கு கொடுப்பதிலும் விருப்பம் இல்லாமல் இருக்கிறார். காரணம் சோம்பேறிமச் சானின் மகனும் சோம்பேறியாகத்தான் இருப்பான் .... அசைக்க முடியா நம்பிக்கை தான். அவரது எண்ணத்தை தவிடு பொடியாக்கி, தடைபல கடந்து உமாபதி உயர்ந்தாரா? மிருதுளாவின் கரம் பற்றினாரா? இல்லையா ..? என்பது தான்
மணியார் குடும்பம் படத்தின் கதைக்களம் மொத்தமும்.

காட்சிப்படுத்தல்: இயக்குனர், நடிகர் ஜெ.தம்பி இராமையாவின் கதை, திரைக்கதை, வசனம் பாடல்கள், இசை மற்றும் இயக்கத்தில் அவரது கலையுலக வாரிசு உமாபதி ராமைய்யா கதாநாயகராக நடித்துள்ள "மணியார் குடும்பம்" திரைப்படத்தை கருத்தாழமிக்க காமெடி படமாக காட்சிப்படுத்தி இருப்பதில் ஜெயித்திருக்கிறார் தம்பி இராமையா.

கதா நாயகர்: உமாபதி ராமைய்யா, குட்டிமணியாக வாழ்ந்து கெட்ட பெரிய குடும்பத்து கிராமத்து இளைஞராக நடிக்கவில்லை.... வாழ்ந்திருக்கிறார். இந்த தம்பி இராமையாவின் வாரிசு தம்பிக்கு டான்ஸ், பைட் ... இரண்டும் சர்வ சாதாரணமாக வருகிறது. நடிப்பிலும் குறை சொல்வதற்கில்லை விறுவிறுப்பான பேச்சு, துறு துறு நடை, நல்ல நிறம், உயரம், அழகிய பாவனை ....எனக்கூடிய விரைவில் தமிழ் சினிமாவை ஆளப்போகும் இளம் ஹீரோக்களில், இந்த தம்பி இராமைய்யாவின் வாரிசும் இடம் பிடிக்கப் போவது நிச்சயம் ... என கட்டியம் கூறுகிறது இத்திரைப்படம்!

கதாநாயகி: நாயகரை நல் வழிக்கு கொண்டு வரும் அத்தை மகளாக கிராமத்து நாயகியாக மிருதுளா முரளி, இப்படக் கதைக்கும், பாத்திரத்திற்கும் ஏற்ற பக்கா தேர்வு என்பதை காட்சிக்கு காட்சி மெய்பித்திருக்கிறார். வாரே வா !

அப்பா நாயகர்: வாழ்ந்து கெட்ட குடும்ப தலைவனாக நாயகரின் அப்பாவாக தம்பி இராமைய்யா, செம கெத்து காட்டியிருக்கிறார். அதிலும் காலையிலேயே எழுந்து பரபரப்பாக குளித்து மூழ்கி, சலவை வேஷ்டி சகிதமாக ஏதோ வேலைக்கு போவது போல் கிளம்பி வீட்டு முற்றத்தில் சாய்வு நாற்காலியில் அமர்த்து பேப்பர் படித்த படி பொண்டாட்டியை நாட்டாமை பண்ணும் தம்பி இராமைய்யாவின் அழகோ அழகு.வெத்து, கெத்து காட்டும் கேரக்டர்களில் தம்பி இராமைய்யாவை அடித்துக் கொள்ள ஆளே கிடையாது .... என்பதை மீண்டும் ஒருமுறை இப்படத்தின் மூலம் நிரூபித்திருக்கிறார். வாவ்!

பிற நட்சத்திரங்கள்: மிடுக்கான நேர்மையான போலீஸ் அதிகாரியாக சமுத்திரகனி, நாயகியின் அப்பாவாக நாயகர் முன்னேறிவிடக் கூடாது எனும் வரட்டு கெளரவ பிடிவாதக்காரராக ஜெயப்பிரகாஷ், நொடிந்த தொழில் அதிபராக ராதாரவி, திருட்டு தனம் மிக்க கார் டிரைவராக மெட்டை ராஜேந்திரன், நாயகரின் மாமா பொட்டலமாக விவேக் பிரசன்னா, நாயகருக்கு இடையூறு செய்து பின் திருந்தும் இளம் வில்லனாக பவன், நாயகி ரிஜக்ட் செய்ததால் அவரை சமயம் பார்த்து பழிக்கு பழிவாங்கும் மற்றொரு வில்லன் ராகுல், தம்பி ராமைய்யாவின் குடும்ப குத்து விளக்கு சம்சாரமாக ஸ்ரீரஞ்சனி, பாசக்கார பாட்டி ஸ்ரீஜா ரவி.ஒத்த பாட்டுக்கு செமகுத்துப் போட்டு பின் காணாமல் போகும்"பிக்பாஸ்" யாஷிகா ஆனந்த், நாயகியின் அம்மா மீராகிருஷ்ணன், மியூசெ(சி)க்ஸ் சிங்கம் புலி, மற்றொரு வில்லன் ராகுலின் முரட்டு மீசை அப்பா சிங்கமுத்து, வைரபாலன், ஜெ.பி வீட்டு காமெடி வேலையாட்கள்ராமர், தங்கதுரை, ராதாரவி காரில் குடும்பத்தோடு லிப்ட் கேட்டு ஏறி கழுத்தில் கத்தியை வைத்து மிரட்டி நகை பறிக்கும் சரவணசக்தி, ஹலோ கிருஷ்ணமூர்த்தி .... உள்ளிட்ட பெரும் நட்சத்திர பட்டாளம் மொத்தமும் படத்திற்கும் தங்கள் பாத்திரங்களுக்கும் கூடுதல் பலம் சேர்த்திருக்கின்றனர். பலே, பலே!

தொழில்நுட்பகலைஞர்கள்: ஹரி தினேஷ், பிரதீப் தினேஷ் இருவரது சண்டை பயிற்சியும், தினேஷ் மற்றும் ராபர்ட் மாஸ்டரின் நடன பயிற்சியும் இப்படத்தை ஒரு படி உயர்த்தி பிடிக்கின்றன. வைர பாலனின் கலை இயக்கம், கோபி கிருஷ்ணாவின் படத்தொகுப்பு, பி.கே .வர்மாவின் ஒளிப்பதிவு உள்ளிட்டவைகளில் கோபி கிருஷ்ணாவின் கத்திரி மட்டும் பின் பாதி நீளத்தை சற்று குறைத்திருக்கலாம். மற்றபடி மூவரும், அவர்களது வேலை பாடு களும் படத்திற்கு பெரிய ப்ளஸ்.

பலம்: அப்பா தம்பி இராமைய்யாவின் இசை மற்றும் இதம்,பதமான பாடல்களும், முன் பாதி படமும், மகன் உமாபதியின் பைட் & டான்ஸ் மூவ்மென்ட்ஸும் படத்திற்கு பெரும் பலம்.

பலவீனம்: பின் பாதி படத்தில் இடம் பெறும் சில இழுவையான காட்சிகளும், தம்பி இராமையா மகனை தேடி வந்த இடத்தில் மொட்டை ராஜேந்திரனை பாலோ பண்ணிப் போய் அடி உதைப்பட்டு வாமிட் வாயுடன் 20 பது நிமிடங்களுக்கு மேல் டயலாக் பேசும் இடங்களும் சற்று ரசிகனை முகம் சுளிக்க வைக்கின்றன.

இசை & இயக்கம்: இயக்குனர், நடிகர் J. தம்பி இராமையாவின் கதை, திரைக்கதை, வசனம் பாடல்கள், இசை மற்றும் இயக்கத்தில், "அடி பப்பாளி பழமே என் தக்காளி ரசமே ... " , " யேன் மனசுக்குள்ள ...." உள்ளிட்ட பரவசமூட்டும்,பளபள பாடல்களும், "காய்ச்சின பால் பிடிக்காது. பீய்ச்சுன்ன பால் தான் பிடிக்கும்...." ,"ஒரு பொண்ணுக்கு கிடைச்ச வாழ்க்கைய வாழறதை விட நினைச்ச வாழ்க்கை வாழறது தான் ரொம்ப பிடிக்கும் .... " , "நாம உயர ணும்னா நாம தான் குட்டிமணி சிந்திக்கணும் உழைக்கணும் ... " ஆகிய அர்த்தம் தொனிக்கும் வசனங்களும்., °வம்சவிருத்தி இல்லாது பேசுவது." , "கிளம்பலை கிளம்பிட்டா ..." ஆகிய இலைமறை காய் இரட்டை அர்த்த காட்சிகளும் படத்தில் ஆங்காங்கே தென்படும் லாஜிக் மிஸ்டேக்குகளை மேஜிக்காக ரசிகனின் கண்களுக்கு தெரியாது மறைத்து விடுவது சிறப்போ சிறப்பு!

அதே போன்று, குதிரை ரேஸ் உள்ளிட்ட சூது வெறி பிடித்தவர்களாலும் "குந்தி தின்று குன்றையும் கரைக்கும் " சோம்பேறிகளாலும் பெரிய வசதியான குடும்பம் கூட எப்படி நிலை குலையும்? என்பதை காட்டியிருக்கும் விதம் அசத்தல்! இவை எல்லாவற்றுக்கும் மேல் படித்து விட்டும், படிக்காமல் விட்டும் ... அடுத்து என்ன செய்வது எனத் தெரியாது குழப்பத்தில் வேலை வெட்டி இல்லாது சும்மா திரியும் இளைஞர்களுக்கு இப்படத்தில் காட்டப்படும் "வின்ட் மில் "மாதிரி எத்தனையோ தொழில்கள் இருக்கிறது... அவற்றை ஊரோடும், உறவோடும் செய்து பெரிதாய் பிழைத்துக் கொள்ளப் பாருங்கள் ... எனகாமெடி படத்தில், நல்ல கருத்தையும் சொல்லி வழிகாட்டியிருக்கும் இயக்குனர் ஜெ. தம்பி இராமைய்யாவை கட்டிப்பிடித்து பாராட்டலாம்.

பைனல்" பன்ச் " : மொத்தத்தில், சில நிறை, குறைகள் இருந்தாலும் கருத்தாழமிக்க காமெடி திரைப்படமாக வந்துள்ள "மணியார் குடும்பம்' - 'மணியான குடும்பம்' ரசிகனுக்கு 'மகிழ்வான திரைப்படம் !" 

கடிகார மனிதர்கள் தலைப்பை பார்த்ததும் புரிந்திருக்கும் படத்தின் கதை காலத்தின் பின்னால் ஓடும் ஏழை மனிதர்களை பற்றியது என்று.

நடிகர் கிஷோர், கருணாகரன் மற்றும் லதா ராவ் ஆகியோர் நடிப்பில் உருவாகியுள்ள இந்த படம் வாடகை வீட்டில் உள்ளவர்கள் படும் இன்னல்களை காட்டியுள்ளது.

கதை:

வறுமை காரணமாக சென்னையை தேடி வருகிறது கிஷோர் மற்றும் லதா ராவ் குடும்பம். அவர்களுக்கு மூன்று குழந்தைகள். வண்டியில் வீட்டு சாமான்களை ஏற்றிக்கொண்டு புரோக்கர் உதவியுடன் தெருத்தெருவாக வீடு தேடுகின்றனர்.

5 பேர் கொண்ட குடும்பம் என்பதால் எந்த வீட்டு ஓனரும் இவர்களுக்கு வீடு தர முன்வரவில்லை. 3500 ரூபாய்க்கு மேல் இவராலும் வாடகை கொடுக்க முடியாது.பின்னர் இறுதியாக இவர்களுக்கு ஒருவர் மட்டும் வீடு தர முன்வருகிறார். ஆனால் 4 பேர் மட்டுமே இருக்க வேண்டும் என அவர் கூற புரோக்கர் இவருக்கு இரண்டு குழந்தைகள் மட்டும் தான் இருக்கிறார்கள் என பொய் கூறிவிடுகிறார்.

இந்த பொய்யை மறைக்க கிஷோர் அவரின் கடைசி பையனை ஒரு பெட்டியில் போட்டு தினமும் வீட்டுக்குள் கொண்டுவந்து மீண்டும் காலையில் அதே பெட்டியில் ஸ்கூலுக்கு கொண்டு சென்று விடுவார்.

அதே காம்பவுன்டுக்குள் குடிவரும் கருணாகரனுக்கும் ஹவுஸ் ஓனர் மகளுக்கும் காதல் - அது தனி ட்ராக்கில் செல்கிறது.

இப்படியே தொடரும் வாடகை வீடு வாழ்க்கையில் காலம் கடக்க கடக்க அவர்கள் சொன்ன பொய்யால் அதிக பிரச்சனைகள் வருகிறது.

அதையெல்லாம் எப்படி சமாளித்தார்கள், அவர்களால் சொந்த வீடு வாங்கமுடிந்ததா என்பது தான் மீதி கதை

க்ளாப்ஸ் & பல்ப்ஸ்:

வாடகை வீடு கஷ்டங்களையும், வீடு உரிமையாளர்களின் அராஜகத்தையும் வெட்ட வெளிச்சமாக காட்டியதற்கும், பொய் சொல்லாமல் பலருக்கும் வீடு கிடைக்காது என தற்போதைய சமூக பிரச்சனையை காட்டியதற்கும் அறிமுக இயக்குனர் வைகறை பாலன் அவர்களை பாராட்டலாம். கிஷோர், லதா ராவ் நடிப்பு பர்ப்பெக்ட். கருணாகரனின் காதல் சீன்களை சாம்.C.S மியூசிக் தூக்கி நிறுத்துகிறது.

ஆனால் மெதுவாக செல்லும் திரைக்கதை பார்ப்பவர்களை கொஞ்சம் அதிகமே சோதிக்கிறது. ஒரு சைக்கிள் ரேசை எதோ F1 ரேஸ் அளவுக்கு பில்டப் கொடுத்ததெல்லாம் டூமச்.

மொத்தத்தில் கடிகார மனிதர்கள் 2 மணி நேர வாடகை வீடு சீரியல். எதார்த்த சினிமாவை ரசிப்பவர்கள், அதிக பொறுமை இருப்பவர்கள் பார்க்கலாம்.

 தமிழ் சினிமாவில் பலவருடங்களாக கனவுக்கன்னியாக இருந்த த்ரிஷா நாயகி படத்தையடுத்து மீண்டும் சோலோ ஹீரோயினாக பேயாக மாறி மிரட்ட முயற்சித்துள்ளார். மோகினி ரசிகர்களை கவர்ந்தாரா என்பதை பார்ப்போம்.

கதைக்களம்

தமிழ்நாட்டிலிருந்து லண்டனுக்கு யோகிபாபுவின் திருமணத்திற்கு உதவி செய்ய போகிறார். அங்கு அவர் பங்களாவில் தங்குகிறார்.

அப்போது தேம்ஸ் நதியில் படகு சவாரி செய்யும் திரிஷாவின் உடம்பில் மோகினி இறங்குகிறது. அதிலிருந்து தமிழ் சினிமாவின் வழக்கமான பேய் கதைக்களம் ஆரம்பமாகிறது.

படத்தை பற்றிய அலசல்

த்ரிஷா நாயகி படத்திற்கு பிறகு மீண்டும் பேய்க்கதைக்களத்தில் சோலோ ஹீரோயினாக இறங்கியுள்ளார். படம் முழுவதும் இவரைச் சுற்றித்தான் நகர்கிறது.

சமீபகாலமாக யோகிபாபுவின் காமெடி அதிகமாக ரசிக்கப்படுகிறது. இந்தப்படத்தில் இவரின் காமெடியால் படத்தை காப்பாற்ற முயன்றுள்ளார்.

பேய் வந்ததும் வழக்கமாக சாமியாரை கூட்டி வந்து விரட்ட முயற்சிக்கும் காட்சிகள், காமெடியன்கள் பேயிடம் அடிவாங்குவது என பல படங்களில் பார்த்த அதே காட்சியைத்தான் மீண்டும் படமாக்கியுள்ளனர்.

எப்போதும் தமிழ்நாட்டுக்குள்ளேயே நடக்கும் பேய்க்கதை இதில் லண்டனில் நடப்பதால் பார்ப்பதற்கு படத்தில் கொஞ்சம் புதுமையான அனுபவமாக இருக்கும்.

படத்தின் ஒளிப்பதிவு சிறப்பாகவே உள்ளது. பாடல்களும் ரசிக்கும் வண்ணம் உள்ளது. அடுத்தடுத்த காட்சிகள் என்ன என யூகிக்கும்படியான திரைக்கதை படத்துக்கு தொய்வாக அமைந்துள்ளது.

ப்ளாஷ்பேக் காட்சிகளும் படத்திற்கு தேவையான வலு சேர்க்கவில்லை. வைஷ்ணவி, மோகினி என இரு வேடங்களில் நடித்தும் எந்த வித்தியாசத்தையும் வெளிப்படுத்தவில்லை

க்ளாப்ஸ்

த்ரிஷாவின் நடிப்பு. யோகிபாபுவின் காமெடி

கலர்புல்லான படத்தின் காட்சிகள், கேட்கும்படியான பாடல்கள்

பல்ப்ஸ்

பழைய கதை, திரைக்கதை

மற்ற கதாபாத்திரங்களுக்கும் இன்னும் வலுவான காட்சிகள் இருந்திருக்கலாம்.

யூகிக்கும்படியான காட்சிகள்

மொத்தத்தில் த்ரிஷாவையும், பேய்ப்படத்தையும் ரசிப்பவர்கள் மட்டும் போய் பார்த்துவரலாம். 

நீதிமன்றத்தின் நியாயத் தராசு… நடமாடும் பீரங்கி… நட்டு வைத்த வெட்டருவா… என்றெல்லாம் நாடு போற்றும் ஒரு மனுஷனை, தேடிப் போய் சிறுமை படுத்தியிருக்கிறார்கள். ‘டிராபிக் ராமசாமி’ என்கிற பிடறி சிங்கம், சினிமா என்கிற சின்ன பொறிக்குள் இடறி விழுந்திருக்கிறது. இ.பி.கோ வில் என்னனென்ன அபாயம் இருக்கோ, அவ்வளவும் போய் சேரட்டும் அவர்களை!

கடந்த சில வாரங்களுக்கு முன்தான் சாவித்ரியின் பயோபிக் வந்து நாட்டையே தாலாட்டிவிட்டு போனது. கிட்டதட்ட அப்படியொரு பயோபிக்தான் இதுவும். ஆனால் பயோ ‘சிக்’ என்று சொல்லும்படியான திரைக்கதை. காட்சியமைப்பு. இன்னபிற இம்சைகள்…!

கண்ணெதிரே நடக்கும் சமூக விரோத செயல்களையெல்லாம் தட்டிக் கேட்கும் பழக்கமுள்ள ராமசாமி, மீன் பாடி வண்டிகளால் செய்யப்படும் திட்டமிட்ட கொலைகளை அம்பலப்படுத்த கிளம்புகிறார். அவருக்கு தரப்படும் பிரம்படி பிரசாதங்களும், நரம்படி தாக்குதல்களுமே படத்தை பாதிக்கும் மேல் ஆக்ரமித்துவிட, கதையை கோர்வையாக ஒட்டவே முடியாமல் திணறியிருக்கிறார் அறிமுக இயக்குனர் விக்கி. ஏதோ நானும் படம் எடுத்தேன் என்று சொம்பை கச்சேரி செய்ய உங்களுக்கு டிராபிக் ராமசாமிதான் அகப்பட்டாரா தம்பி?

விஜய் சேதுபதி தன் சொந்த கண்களால்(?) டிராபிக் ராமசாமியின் வாழ்க்கை வரலாற்றை படிப்பதாக துவங்குகிறது படம். ஒரே மூச்சில் அவர் படித்து முடிக்கிறார். நமக்குதான் மூச்சு வாங்குகிறது. இந்த படத்திற்கு ஏன் விஜய் சேதுபதி? அப்புறம் சீமான், குஷ்பு, விஜய் ஆன்ட்டனியெல்லாம் ஒரு காட்சியில் தோன்றி உரம் போட்டிருக்கிறார்கள்.

நாலா புறமும் சுற்றி வளைத்துத் தாக்கப்படும் எஸ்.ஏ.சி யை விஜய் ஆன்ட்டனி காப்பாற்றும் அந்த அரை நிமிஷ சீனில் கூட, நடிப்பேனா என்கிறார் எஸ்.ஏ.சி யின் சிஷ்யர் வி.ஆ!

படத்தின் ஒரே ஆறுதல் எஸ்.ஏ.சி தான். அவ்வளவு பெரிய மனுஷன்… முதியவர்… நிஜமாகவே சேற்றில் விழுந்து சில்லரைகளால் மிதிபட்டு பரிதாபத்தை அள்ளிக் கொள்கிறார். நீதிமன்றத்தில் சாதகமான தீர்ப்பு வாங்கி விட்டோம் என்கிற சந்தோஷத்தில் ஒரு வெற்றி நடை நடக்கிறாரே… செம ஸ்மார்ட்! மற்றபடி அவரது குடும்ப பின்னணி, வசதியான வாழ்க்கை முறை இவையெல்லாம் ஒட்டவே இல்லை.

நாலைந்து காட்சிகள் வந்தாலும் நறுக் தெறிக்கிறார் ஆர்.கே.சுரேஷ். ஒரு ரவுடி ராமசாமிக்கு உதவுவதும், அதே ரவுடியின் தனக்கான கொலைகளை அதே ராமசாமி கண்டுகொள்ளாமல் இருப்பதும் திரைக்கதை அழுக்கு.

நீதிமன்றத்தையும், பெண் நீதிபதிகளையும் இவ்வளவு துச்சமாக வேறெந்த சினிமாவும் காட்டியிருக்கிறதா? டவுட்…

பாலமுரளியின் இசையில் பெரிய ஈர்ப்பு இல்லை.

ஒரு காலத்தில் சட்டத்தை கதையாக எழுதி தமிழ்நாட்டையே புரட்டிப் போட்ட எஸ்.ஏ.சி மறுபடியும் சட்டத்தை கையில் எடுத்திருக்கிறார். ஒரு வாரம் கழித்து அதே சட்டத்தால், செய்வியா? செய்வியா? என்று தலையிலடித்துக் கொண்டால் கூட ஆச்சர்யமில்லை!

தமிழ் சினிமாவில் தவிர்க்க முடியாத இயக்குனராக வரவேண்டியவர் சசிக்குமார். ஆனால், ஹீரோ வேஷமிட்டு இன்று வரை தான் இயக்குனர் என்பதையே மறந்து முழு நேர ஹீரோவாகிவிட்டார், ஆனால், ஆரம்பித்தில் இவரின் ஹீரோ அவதாரத்தை ரசிகர்கள் ரசித்தாலும், ஒரே டெம்ப்ளேட் கதையால் கொஞ்சம் ரசிகர்களை சோதித்தார், இந்நிலையில் தற்போது முற்றிலும் வேறு தளத்தில் மருதுபாண்டியன் இயக்கத்தில் சசிக்குமார் நடித்த அசுரவதம் அவருக்கு கைக்கொடுத்ததா? பார்ப்போம்.

கதைக்களம்

படத்தின் முதல் காட்சியில் இருந்தே ஒருவரை கொல்ல சசி முயற்சி செய்துக்கொண்டே இருக்கின்றார். அவருக்கு அவ்வபோது சாவு பயத்தை காட்டி வருகின்றார் சசி.

ஆனால், அவர் எதற்காக அவரை கொல்ல முயற்சிக்கின்றார் என்பதை படத்தின் கடைசி வரை சொல்லாமல், கிளைமேக்ஸ் டுவிஸ்ட்டாக இயக்குனர் ஓபன் செய்கின்றார். இது தான் அசுரவதம் படத்தின் கதை.

படத்தை பற்றிய அலசல்

சசிக்குமார் படம் என்றாலே வெட்டு, குத்து, இரத்தம் என தெறிக்கும், அதற்கு எந்த விதத்திலும் இந்த படம் குறை போகவில்லை, படம் முழுவதும் ஒருவரை கொலை செய்ய போய், பல பேரை வெட்டி கொல்கின்றார், எப்போதும் சசிக்குமாரிடம் ரசிகர்கள் என்ன எதிர்ப்பார்ப்பார்களோ அதே நடிப்பை தான் இதிலும் வெளிப்படுத்தியுள்ளார்.

படத்தின் வில்லனாக வரும் வசுமித்ரா இவர் தான் படத்தின் மொத்த பலமும், ஏனெனில் அவரை சுற்றி தான் கதையே நகர்கின்றது, வில்லன் என்றாலே 10 பேரை அடிப்பது, 20 பேரை கொல்வது என்றில்லாமல் தன்னை ஒருவன் கொல்ல வருகின்றான் என தெரிந்து பயந்து ஓடுவது என கொஞ்சம் வித்தியாசப்படுத்தியுள்ளனர்.

படத்தின் டுவிஸ்ட் மிகவும் பாதிக்கின்றது, நாட்டில் நடக்கும் கொடூர விஷயங்களை இயக்குனர் கண்முன் கொண்டு வந்துள்ளார், அதே நேரத்தில் இப்படி ஒரு தவறு செய்பவன் இனி அந்த தவறை நினைத்துக்கூட அவன் பார்க்க கூடாது, அல்லது மற்றவர்கள் செய்ய பயப்பட வேண்டும் என்பது போல் ஒரு கிளைமேக்ஸ் இருந்திருக்க வேண்டும் அல்லவா, இதில் இப்படி செய்வதற்கு ஏன் இவ்வளவு மெனக்கெட வேண்டும் சசி என்று தான் கேட்க தோன்றுகின்றது.

படத்தின் மற்றொரு மிகப்பெரும் பலம் கதிரின் ஒளிப்பதிவு தான், நம்மை காட்சியில் ஒன்றி பார்க்க வைக்கின்றார், அதே போல் ஸ்டெண்ட் காட்சிகளும் ரசிக்க வைக்கின்றது, கோவிந்த் மேனன் பின்னணி இசையில் காட்சிக்கு வலு சேர்த்துள்ளார்.

க்ளாப்ஸ்

படத்தின் கதைக்களம், நாட்டில் நடக்கும் அதுவும் அன்றாட நாம் செய்தியில் பார்க்கும் விஷயத்தை தைரியமாக சொன்ன விதம். நமக்கே கொஞ்சம் மனம் பதறுகின்றது.

வில்லனாக நடித்த வசுமித்ரா

டெக்னிக்கலாக ஒளிப்பதிவு, ஸ்டெண்ட் என ரசிக்க வைக்கின்றது. படத்தின் முதல் மணி நேர விறுவிறுப்பு.

பல்ப்ஸ்

படத்தின் கதை தற்போதைய சமூகத்திற்கு தேவையானது என்றாலும், அதை முழுவதும் விறுவிறுப்பாக கொண்டு செல்லாதது.

அதிலும் கிளைமேக்ஸ் இப்படியான கதைக்கு எத்தனை அழுத்தமாக இருந்திருக்க வேண்டும் அது மிஸ்ஸிங்.

மொத்தத்தில் படத்தின் ஆரம்பத்திலிருந்த விறுவிறுப்பு படம் முழுவதும் இருந்திருந்தால் அசுரவதம் தமிழ் சினிமாவில் அழுத்தமான இடம் பிடித்திருக்கும்.

நிலம் எங்கள் உரிமை எனப் போராட வைக்கும் மக்கள் தலைவனின் கதையே 'காலா'.

தாராவி பகுதியில் இருக்கும் குடிசைப் பகுதிகளை அப்புறப்படுத்திவிட்டு சொகுசான கட்டிடங்கள் கட்டித் தருவதாக ஆசை வார்த்தை கூறுகிறது ஒரு கார்ப்பரேட் கும்பல். அதற்கும் சிலர் இணங்க, அதன் ஆபத்தை அறிந்து முட்டுக்கட்டை போடுகிறார் ரஜினி. இதனால் எம்.எல்.ஏவாக தேர்தலில் நின்று தோல்வியைத் தழுவிய சம்பத் சில வில்லங்க வேலைகளைச் செய்ய எந்தத் தப்பும் செய்யாத ஓர் இளைஞனின் உயிர் பறிபோகிறது. ரஜினி இதற்கான விலையாக சம்பத்துக்கு பெரும் தண்டனையை அளிக்கிறார். இந்த சூழலில் தாராவியைக் கைப்பற்றத் துடிக்கும் கார்ப்பரேட் மூளையாக இருக்கும் நானா படேகர் ரஜினியை சந்தித்து எச்சரிக்கிறார். அந்த மோதல் வலுக்க, ஒரு பிடி மண் கூட இந்த தாராவி மண்ணில் இருந்து எடுத்துக்கொண்டு போக முடியாது என்று ரஜினி சவால் விடுகிறார். இதனிடையே ரஜினியைத் தீர்த்துக் கட்ட சதித் திட்டங்கள் தீட்டப்படுகின்றன. இதில் தாராவி என்ன ஆனது, நானா படேகரின் கனவு நனவாகிறதா, ரஜினி என்ன ஆகிறார் என்ற கேள்விகளுக்குப் பதில் சொல்கிறது திரைக்கதை.
 

தலித் அரசியல், சுவர் அரசியல், புலம்பெயர் தமிழர்களின் பிரச்சினைகள் பேசிய இயக்குநர் பா.இரஞ்சித் இதில் நிலம் சார் அரசியலை அழுத்தமாகப் பதிவு செய்திருக்கிறார். துணிச்சலான அவரது முயற்சிக்கு வாழ்த்துகள். ஆனால், படம் ஆவணப்படத்துக்கான அம்சங்களுடனேயே இருப்பது அலுப்பைத் தருகிறது.

கமர்ஷியல் படம் என்றாலும் அதில் ரஜினி மாஸ் நடிகர் என்பதைக் காட்டிலும் ஃபெர்பாமன்ஸ் நடிகர் என்பதை இரஞ்சித் முன்னிலைப்படுத்து திரையில் வெளிப்படுத்திய விதம் ரசிக்க வைக்கிறது. ஸ்டைலிஷ் ரஜினி படம் முழுக்க வசீகரிக்கிறார். உடல் மொழியிலும், பழைய காதலின் கதகதப்பை கண்களிலேயே காட்டும் நடிப்பிலும் அசர வைக்கிறார். 'என்னைக் கேட்காம நீ வந்துட்ட, என் பெர்மிஷன் இல்லாம நீ போக முடியாது' என்று நானா படேகருக்கு தாராவியின் சூழலை உணர்த்தும்போதும், யாரு இவரு என காவல் நிலையத்தில் ரிப்பீட்டாகக் கேட்டு பதிலடி கொடுக்கும்போதும் 'நான் நடிகன்டா' என்பதை நிரூபிக்கிறார்.

ஈஸ்வரி ராவ் இயல்பான நடிப்பை அள்ளி வழங்கி இருக்கிறார். 'நீங்க மட்டும்தான் உங்க முன்னாள் காதலியைப் பார்த்துட்டு வருவீங்களா? இப்போ திருநெல்வேலிக்கு டிக்கெட் போடுங்க. என்னைக் காதலிச்ச பெருமாளை நான் போய் பார்த்துட்டு வர்றேன்' என்று ரஜினியிடம் ஊடல் கொள்ளும் காட்சிகளிலும், ரஜினி மீதான காதலையும், மகன்கள் மீதான பாசத்தையும் வெளிப்படுத்தும் காட்சிகளில் தேர்ந்த நடிப்பை வழங்கியிருக்கிறார்.

சமுத்திரக்கனி படம் முழுக்க முக்கிய வரும் முக்கியக் கதாபாத்திரத்தில் அதகளப்படுத்தி இருக்கிறார். படத்தின் நகைச்சுவைக்கு கனியே காரணம். இடையிடையே அவர் பேசும் வசனங்களால் தியேட்டரில் அப்ளாஸ் அள்ளுகிறது.

ஆர்ப்பாட்டமில்லாத அழுத்தமான நடிப்பால் நானா படேகர் கவனத்தை ஈர்க்கிறார். ரஜினியுடன் பேசும் காட்சியில் அவரைத் தாண்டியும் வசனத்திலும், நடிப்பிலும் மிரட்டுகிறார்.


ரஜினியின் மகனாக விழித்தெழு இயக்கத்தின் தோழராக வரும் மணிகண்டனின் நடிப்பு செம்ம. இவருக்கு பிரகாசமான வாய்ப்பு வெளிச்சம் இனிவரும் காலங்களில் கிடைக்கும் என நம்பலாம். திலீபன் கொடுக்கப்பட்ட வாய்ப்பை மிகச் சரியாகப் பயன்படுத்தி ரஜினியின் தளபதியாகவே மாறியிருக்கிறார்.

தைரியமான பெண்ணாக உரிமைக்குரல் எழுப்பும் அஞ்சலி பாட்டீல், முன்னாள் காதலியாக மனதில் அன்பைச் சுமக்கும் ஹீமா குரேஷி, போலீஸாக வரும் அரவிந்த் ஆகாஷ், கலவரத்தைத் தூண்டிவிடும் பங்கஜ் திரிபாதி ஆகியோர் பொருத்தமான பாத்திர வார்ப்புகள்.

சம்பத் ராம், அருள்தாஸ், அருந்ததி, சாக்‌ஷி அகர்வால், சாயாஜி ஷிண்டே ஆகியோரும் படத்தில் வந்து போயிருக்கிறார்கள்.

முரளியின் கேமரா தாராவியின் ஒட்டுமொத்த அழகையும் சூழலையும் கண்களுக்குள் கடத்துகிறது. ஆக்‌ஷன் காட்சிகள், ரொமான்ஸ் காட்சிகள், குடிசைப் பகுதிகள் என எல்லாவற்றிலும் முரளியின் உழைப்பு பளிச்சிடுகிறது. சந்தோஷ் நாராயணன் பின்னணி இசையில் தி பெஸ்ட் கொடுத்திருக்கிறார். கண்ணம்மா பாடலில் காதலின் மகோன்னத்தை இசைத்தவர் கற்றவை பற்றவை பாடலில் போராட்ட உணர்வைப் பாய்ச்சுகிறார்.

நீட்டி முழக்க வேண்டிய காட்சிகளை கத்தரி போட்டு கச்சிதமாகக் கொடுத்த விதத்தில் ஸ்ரீகர் பிரசாத்தின் பங்கு அளப்பரியது. தாராவி பகுதியை அச்சு அசலாகக் காட்டியதில் கலை இயக்குநர் ராமலிங்கத்தின் பணி பாராட்டுக்குரியது. மகிழ்நன், ஆதவன் தீட்சண்யா, பா.இரஞ்சித்தின் வசனங்கள் படம் சார்ந்த அரசியலை மட்டும் நேர்மையாகவும் உண்மையாகவும் பேசுகின்றன.

குடும்பம், அரசியல் என எதற்கு முக்கியத்துவம் கொடுப்பது என முதல் பாதியில் இரஞ்சித் குழம்பியிருக்கிறார். அந்தக் குழப்பம் காட்சிகளின் இழுவையாக எதிரொலிக்கிறது. படத்தில் 'மெட்ராஸ்', 'கபாலி' என அவரது முந்தைய படங்களின் சாயல் இருப்பதும் கவனிக்கத்தக்கது. குறிப்பாகச் சொல்ல வேண்டுமென்றால் 'மெட்ராஸ்' படத்தில் சுவரில் பெயிண்ட்டைத் தூக்கி வீசுவார்கள். 'காலா'வில் வெண்மையையே ஆடையாகக் கொண்டு அதுதான் தூய்மை என்று இருக்கும் நபர் மீது கலர் சாயங்களை வீசி எறிந்து எதிர்ப்பை வெளிப்படுத்துவார்கள்.

 'கபாலி'யில் ரஜினி தன் மனைவியைத் தேடி வருவார். 'காலா'வில் ஹீமா குரேஷி தன் முன்னாள் காதலனைப் பார்க்க வருகிறார். அவர் வருவதற்கான நோக்கம் வெறொன்றாக இருந்தாலும் இதுவும் ஒரு முக்கியக் காரணமாக அமைந்துவிடுகிறது. 'மெட்ராஸ்' படத்தில் வருவதைப் போல இதிலும் கானா பாடல் பாடி, திடீரென்று டான்ஸ் ஆடி கவனம் ஈர்க்கும் ஹிப்- ஹாப் இளைஞர்கள் இருக்கிறார்கள். ஆனால், அது 'காலா'வில் பொருந்தாமல் துருத்தி நிற்கிறது.

படத்தின் முக்கியமான காட்சிகளில் ரஜினி நடந்துகொண்டே இருப்பதும், ஸ்லோமோஷன் காட்சிகளின் பில்டப்பும் படத்தின் தீவிரத் தன்மையக் குறைக்கின்றன. இன்னும் சொல்லப்போனால் ரஜினியின் பில்டப் காட்சிகள் முழுமையடையாமல் தொக்கி நிற்கிறது. எந்த இடத்திலும், காட்சியிலும் நாயகனின் புத்திசாலித்தனமோ, ஒப்புயர்வில்லாத வீரமோ வெளிப்படவே இல்லை. 'வேங்கை மகன் ஒத்தையில நிக்கேன், மொத்தமா வாங்கலே' என்று ரஜினி மாஸ் பன்ச் வசனம் பேசுகிறார். ஆனால், அதற்குப் பிறகான காட்சியில் அவருக்கு முக்கியத்துவமே இல்லாமல் போகிறது.

ரஜினி- நானா படேகருக்கான மோதலோ, எதிர்ப்போ, உரசலோ வலுவாக இல்லை. குடும்பத்தின் இரு ஜீவன்களை இழந்த பிறகும் ரஜினி எந்த வித எதிர்ப்பையும் இல்லாமல் சாதாரணமாகவே பேசிவிட்டுச் செல்வது நம்பும்படியாக இல்லை. படத்தின் மையப் புள்ளியான தாராவிக்கும் ரஜினிக்குமான உறவும், பிணைப்பும் சொல்லப்பட்ட விதத்தில் போதாமையே மிஞ்சுகிறது.

சுத்தம் - தூய்மையை ஆதரிக்கும் திட்டங்கள், அதை எதிர்ப்பவர்கள் தேசத் துரோகிகள் என்று கட்டமைக்கப்படும் அரசியல், ராம காதை, ராவண காவியம், ராவணன் தலை துண்டிக்கப்பட்டால் ஆயிரம் தலைகள் முளைக்கும் என்று சொல்லப்படும் கதாகாலட்சேபம், பெரியார் சிலை என இரஞ்சித் சொல்லியிருக்கும் குறியீடு சார் அரசியல் தெளிவாகக் காட்சிப்படுத்தப்பட்டுள்ளது. அது நம்பகத்தன்மையோடும் ஏற்புடையதாகவும் உள்ளது. கல்விதான் முக்கியம் என்று ரஞ்சித் படத்தில் முன்னெடுக்கும் இயக்கத்தின் மாற்று வடிவமும் வரவேற்கத்தக்கது.