என் புத்தகம்

ஒரு திருடனும், டாக்டரும், போலீசுடன் நடத்தும் யுத்தம் தான் கடாரம் கொண்டான்.

படத்தின் முதல் காட்சியில் மலேசியாவின் டிவின் டவரின் ஒரு மாடியில் இருந்து கண்ணாடியை உடைத்துக்கொண்டு வெளியே குதித்து உயிர் தப்பி ஓடி வருகிறார் விக்ரம். அவரை இரண்டு பேர் விரட்டி வந்து கொல்ல முயற்சிக்கிறார். அப்போது எதிர்பாராத விதமாக அதிவேகத்தில் வரும் பைக் விக்ரம் மீது மோதி தலையில் அடிப்பட்டு மயக்கமடைகிறார். போலீசார் அவரை மருத்துவமனையில் அனுமதிக்கிறார்கள்.

விக்ரம் சிகிச்சை பெறும் மருத்துவமனையில் பயிற்சி மருத்துவராக சேர்கிறார் அபி. அவருடைய மனைவி அக்ஷரா நிறைமாத கர்ப்பிணி. மனைவியை வீட்டில் தனியே விட்டுவிட்டு, இரவில் மருத்துவமனைக்கு வேலைக்கு வருகிறார் அபி. விக்ரம் அனுமதிக்கப்பட்டிருக்கும் வார்டில் தான் அபிக்கு டியூட்டி. யாரோ சிலர் விக்ரமை கொல்லப் பார்க்கிறார்கள். உயிருக்குப் போராடும் விக்ரமை அபி காப்பாற்றுகிறார். போலீஸ் விசாரணையில் விக்ரம் ஒரு திருடன் என்பது தெரியவருகிறது.

காலை வீடு திரும்பிய அபியை தாக்கி, அக்ஷராவை கடத்திச் செல்கிறார் விக்ரமின் தம்பி நந்தா. மருத்துவமனையில் இருந்து விக்ரமை வெளியே கொண்டுவந்தால், அக்ஷராவை ஒப்படைப்பதாக மிரட்டுகிறார். வேறு வழியே இல்லாத நிலையில், போலீசை ஏமாற்றி விக்ரமை வெளியே அழைத்து வருகிறார். இதனால் அபியும் குற்றவாளி லிஸ்டில் சேர்க்கப்படுகிறார். விக்ரம் யார்? அவரை கொல்ல முயற்சிப்பது யார்? அபியும், அக்ஷராவும் என்ன ஆனார்கள்? என்பது உள்ளிட்ட பல கேள்விகளுக்கு விடை தேடி பயணிக்கிறது மீதிப்படம்.

கிட்டத்தட்ட விக்ரம் வேதா படத்தின் கதையும் கடாரம் கொண்டான் கதையும் ஒன்று தான். ஆனால் இது 'பாய்ண்ட் பிளாங்க்' எனும் பிரெஞ்ச் படத்தின் ரீமேக். ஏற்கனவே கொரிய மொழியில் 'தி டார்கெட்' என்ற பெயரில் ரீமேக்காகி இருக்கிறது. தற்போது நெட்பிளிக்சில் 'பாயிண்ட் பிளாங்க்' ஆங்கிலப்பதிப்பும் வெளியாகியுள்ளது.

பாயிண்ட் பிளாக் படத்துக்கும் கடாரம் கொண்டான் படத்துக்கும் பெரிய வித்தியாசம் ஏதும் இல்லை. ஒரிஜினலை கெடுக்காமல் அப்படி எடுத்திருக்கிறார் இயக்குனர் ராஜேஷ் ம.செல்வா. ஹாலிவுட் தரத்தில் இருக்கிறது படத்தின் மேக்கிங். கொஞ்சம் கூட விறுவிறுப்பு குறையாமல் படத்தை நகர்த்தி சென்றிருக்கிறார்.

முதல் பாதி சைலண்டாகவும், இரண்டாம் பாதியில் வைலண்டாகவும் கெத்து காட்டியிருக்கிறார் விக்ரம். கெட்டப்பிலும் சரி, லுக்கிலும் சரி, செம மாஸ், ஸ்டைலிஷ் சீயான். முழு படத்துக்கும் சேர்த்து ஒரு பக்க வசனம் கூட விக்ரமுக்கு இல்லை. சின்ன சின்ன கண்ணசைவுகளால் கொள்ளை கொள்கிறார். குறிப்பாக துப்பாக்கி காட்டி நிற்கும் அபியை, அநாயசமான ஒரு பார்வையில் கடந்து போகும் அந்த காட்சி, வாவ் செம தூள். தில்லாக நெஞ்சம் நிமிர்த்தி, கடாரம் கொண்டானாக மாறியிருக்கிறார்.

அக்ஷராவுக்கு கொஞ்சம் நேரம் மட்டும் தான் படத்தில் வேலை. ஆனால் வரும் ஒவ்வொரு பிரேமிலும் தடம் பதிக்கிறார். க்ளைமாக்ஸ் காட்சியில் அவர் கதறும் போது, நம் உள்ளம் பதறுகிறது. நாசரின் மகன் அபி ஹசனுக்கு படத்தில் நிறைய வேலை இருக்கிறது. நிறைவாக நடித்து கவனம் ஈர்க்கிறார். போலீஸ் அதிகாரிகள் லேனா, வின்சென்ட் ராஜதுரை உள்பட அனைவரும் சரிவிகித நடிப்பை தந்திருக்கிறார்கள்.

ஜிப்ரானின் இசையில் 'தாரமே தாரமே' சாரல் மழையாய் நனைக்கிறது. பின்னணி இசையில் அதிரடியாய் முழங்கியிருக்கிறார். மான்டேஜாய் ஒலிக்கும் 'வேறென்ன வேணும் நீ மட்டும் போதும்' பாடல் சுனாமிக்கு மத்தியில் தென்றலாய் வீசுகிறது.

ஸ்ரீனிவாஸ் குதாவின் கேமரா படத்தை ஹாலிவுட் தரத்திற்கு எடுத்து சென்றிருக்கிறது. ராவான லைட்டிங் டோனில் சண்டைக்காட்சிகளும், கார் சேசிங் ஆக்ஷன் காட்சியும் மிரட்டுகிறது. படத்தை விறுவிறுப்பு குறையாமல், அதேசமயம் எந்த குழப்பமும் இல்லாமல் கட் செய்திருக்கிறார் எடிட்டர் பிரவீன் கே.எல்.

படம் விறுவிறுப்பாக இருக்க வேண்டும் என்பதற்காக வசனங்களை மிகவும் குறைத்திருக்கிறார்கள். அதனால் விக்ரம் உண்மையில் யார் என்பதைக்கூட தெளிவாக புரிந்துகொள்ள முடியவில்லை. அதேபோல் நேட்டிவிட்டிக்காக மலாய் மொழியும் அதிகளவில் பயன்படுத்தப்பட்டுள்ளது. இதுவும் படம் புரியாமல் போகும் நிலையை உருவாக்கியுள்ளது. க்ளைமாக்ஸ் காட்சி சினிமாத்தனமாக மாறிவிடுகிறது. இரண்டாம் பாதியில் துப்பாக்கி சத்தம் காதைக் கிழிக்கிறது.

விறுவிறுப்பு, பரபரப்பு நிறைந்த ஆக்ஷன் விரும்பிகளுக்கு இந்த படம் நிச்சயம் பிடிக்கும். தமிழ் ரசிகர்களுக்கு ஒரு ஹாலிவுட் படம் பார்த்த உணர்வை தருகிறான் 'கடாரம் கொண்டான்'.

ஜோதிகா தொடர்ந்து பெண்களுக்கு முக்கியத்துவம் உள்ள கதைகளாக தேர்ந்தெடுத்து நடித்து வருகின்றார். அந்த வகையில் வெறும் பெண்கள் என்றும் மட்டுமில்லாமல் இந்த முறை வளரும் சமுதாயத்தின் மீது அக்கறை கொண்டு பள்ளி குழந்தைகளுக்காக குறிப்பாக அவர்களின் பெற்றோர்களுக்கான ஒரு கதையை தேர்ந்தெடுத்துள்ளார், இதில் ஜோதிகாவின் மாணவர்கள் மட்டுமின்றி அவரும் பாஸ் செய்தார்களா? பார்ப்போம்.

கதைக்களம்

ஜோதிகா பெரும் பதவியில் இருந்து எத்தனையோ நிறைய சம்பளம் கிடைக்கும் வேலைகள் இருந்தும், இந்த வேலை தான் வேண்டும் என்று வாங்கி வருகின்றார், ஒரு அரசு பள்ளி டீச்சராக.

ஆனால், அந்த பள்ளிக்கூடத்தில் எதுவுமே சரியில்லை, இருக்கின்ற விதிமுறைகளை கூட யாரும் ஒழுங்காக கடைப்பிடிப்பது இல்லை, இதற்கெல்லாம் முக்கிய காரணம் சாட்டை படத்தில் வரும் தம்பி ராமையா போல் ஒரு கதாபாத்திரம் இந்த படத்திலும் வருகின்றது.

இதற்கிடையில் தனியார் பள்ளியின் ஆதிக்கம் வேற, இவை அனைத்தையும் முறியடித்து அரசாங்க பள்ளியில் படிக்கும் மாணவர்களை எப்படி சீர்த்திருத்தி, அவர்களின் தரத்தை உயர்த்தி நல்வழிக்கு கொண்டு வருகின்றார் ஜோதிகா என்பதே மீதிக்கதை.

படத்தை பற்றிய அலசல்

ஜோதிகாவின் திரைப்பயணத்தில் ஆல் டைம் பெஸ்ட் இந்த கதாபாத்திரம் என்று சொல்லி விடலாம், அதை விட அவர் சமீபத்தில் ஹீரோயின்களுக்கு முக்கியத்துவம் உள்ள படங்களில் நடித்ததில் இது தான் நம்பர் 1, பெர்ப்பாமன்ஸாகவே கலக்கியுள்ளார். படத்தில் எந்த ஒரு இடத்திலும் இவர் முகத்தில் ஒரு பெரிய சிரிப்பை பார்த்துவிட முடியாது.

படம் முழுவதும் அட்வைஸ், நீண்ட வசனங்கள் இருந்தாலும் எங்குமே அலுப்புத்தட்டவில்லை, இதில் குறிப்பாக ‘கணக்கு பாடத்தில் ஒரு பையன் 100 மார்க் எடுத்து, சயின்ஸில் தோல்வி பெற்றால், அவன் மக்கு பையனா, கல்வி சிஸ்டம் சரியில்லை’ என யோசிக்க வைக்கும் பல வசனங்கள் கவர்கின்றது.

ஒரு பையன் என்னை பாக்கின்றேன் மிஸ், என கூறும் பெண்ணிடம் ஜோதிகா சொல்லும் கதை, அரசாங்க பள்ளியில் இருக்கிற ரூல்ஸை ஒழுங்காக கடைப்பிடித்தாலே நன்றாக இருக்கும் என்று காட்டிய விதம் என காட்சிக்கு காட்சி கைத்தட்டல் பறக்கின்றது.

அதிலும் ஜோதிகா தன் தந்தை இழப்பில் கூட அழாமல், பள்ளிக்கு சென்று உருகும் காட்சி பார்ப்பவர்களை நெகிழ வைக்கின்றது, சூப்பர் ஜோதிகா. ஜோதிகாவிடம் காதலை சொல்லும் குட்டிப்பையன் கூட, ஓவர் ஆக்டிங் இல்லாமல் யதார்த்தமாக கியூட்டாக கடந்து செல்கின்றார்.

இப்படி பல அழகிய காட்சிகள் படம் முழுவதும் வருகின்றது, இப்படம் வெறும் மாணவர்களுக்காக படம் என்று மட்டுமே சொல்லிவிட முடியாது, ஒவ்வொரு பெற்றோர்களுக்கான படமாகவும் உள்ளது. படத்தின் ஒளிப்பதிவு அப்படியே அரசாங்க பள்ளியை பார்த்த அனுபவம், ஷான் ரோல்டனின் பின்னணி இசையும் படத்திற்கு கூடுதல் பலம்.

க்ளாப்ஸ்

ஜோதிகா மற்றும் நடிகர், நடிகைகள் அனைவரின் நடிப்பு.

எடுத்துக்கொண்ட களம், பெற்றோர்கள் எல்லாம் தனியார் பள்ளியை நோக்கி ஓடும் நேரத்தில், அரசாங்க பள்ளியை பற்றி பேசிய விதம்.

இசை, ஒளிப்பதிவு போன்ற டெக்னிக்கல் விஷயங்கள்.

ஜோதிகா ஒரு காட்சியில் சண்டை எல்லாம் போடுகின்றார், அட என்னடா இது என்று நினைக்க, அதற்கு ஒரு பின்கதை வைத்தது செம்ம.

பல்ப்ஸ்

கண்டிப்பாக சாட்டை படத்தை நியாபகப்படுத்துவதை தவிர்க்க முடியவில்லை.

மொத்தத்தில் குழந்தைகள், பெற்றோர்கள் என அனைவருக்கும் பிடிக்கும் இந்த ராட்சசி கீதா ராணி மேடத்தை.

சிந்துபாத் விஜய் சேதுபதி நடிப்பில் நாளை உலகம் முழுவதும் வெளிவரவுள்ளது. இப்படம் பல தடைகளை தாண்டி நாளை வரவுள்ளது அனைவரும் அறிந்ததே.

இந்நிலையில் சிந்துபாத் படம் எப்படியிருக்கும் என்ற ஆவல் ரசிகர்களிடம் தற்போதே இருந்து வருகின்றது.

ஆடை படத்தை இயக்கியுள்ள இயக்குனர் ரத்னகுமார் தன் டுவிட்டர் பக்கத்தில் சிந்துபாத் படம் குறித்து சில கருத்துக்களை கூறியுள்ளார்.

இதில் ‘மனைவியை தேடி கடல் கடந்து, தடைகள் தாண்டி எதிரிகளை துவம்சம் செய்யும் மரண மாஸ் படமே சிந்துபாத்’ என அவர் குறிப்பிட்டுள்ளார்.

உலகம் முழுவதும் கோடிக்கணக்கான ரசிகர்களை கொண்ட ஹீரோக்களில் தளபதியும் ஒருவர். இவரது படம் என்றாலே ரசிகர்களுக்கு திருவிழா தான். படம் மட்டுமில்ல, பிறந்தநாளும் தான். ஆம், வரும் 22ம் தேதி 45 வயது முடிந்து 46ஆவது வயதில் அடியெடுத்து வருகிறார். இதனை முன்னிட்டு நாளை மாலை 6 மணிக்கு தளபதி63 ஆவது படத்தின் டைட்டில் லுக் போஸ்டர் வெளியாகிறது. 22ம் தேதி நள்ளிரவில் 2ஆவது லுக் போஸ்டர் வெளியாகிறது என்று அறிவிக்கப்பட்டுள்ளது.

இந்த நிலையில், இதுவரை 62 படங்களில் நடித்து முடித்துள்ள தளபதி விஜய்யின் நடிப்பில் வந்த சூப்பர் ஹிட் படங்களைப் பற்றி இங்கு பார்ப்போம்…

நாளைய தீர்ப்பு

தனது அப்பா எஸ்.ஏ.சந்திரசேகர் இயக்கத்தில் விஜய் ஹீரோவாக அறிமுகமான முதல் படம் நாளைய தீர்ப்பு. இப்படத்தில் நடிக்கும் போது விஜய்க்கு வயது 18. இந்தப் படத்தை விஜய்யின் அம்மா ஷோபா சந்திரசேகர் தயாரித்திருந்தார். இப்படி குடும்பமே ஒரு படத்தில் பணியாற்றியது என்றால், அது இந்தப் படம் தான். ஆனால், இந்தப் படம் வணீக ரீதியாக தோல்வியை தழுவியது.

செந்தூரபாண்டி

விஜய்க்கு ஹிட் கொடுத்த படம் என்றால் அது காதல் கதையை மையப்படுத்திய செந்தூரபாண்டி படம் தான். தனது தந்தை எஸ்.ஏ.சந்திரசேகர் இயக்கிய இப்படத்தில், விஜயகாந்த், கௌதமி, யுவராணி, மனோரமா, பொன்னம்பலம், எஸ்.ஏ.சந்திரசேகர் ஆகியோர் பலர் நடித்திருந்தனர். இது விஜய் ஹீரோவாக நடித்த 2ஆவது படம் என்பது குறிப்பிடத்தக்கது. 1993ம் ஆண்டு வெளியான இப்படம் 2007ல் ஹிந்தியில் டப்பிங் செய்யப்பட்டு தாகூர் பவானி சிங் என்ற டைட்டிலில் வெளியானது.

பூவே உனக்காக – சில்வர் ஜூபிலி (250 நாட்கள்)

விஜய்க்கு திருப்பு முனையாக அமைந்த படங்களில் பூவே உனக்காக படமும் ஒன்று. காதலுக்கு முக்கியத்துவம் கொடுக்கப்பட படம் என்றே சொல்லலாம். விக்ரமன் இயக்கத்தில் வந்த இப்படத்தில், விஜய், சங்கீதா, அஞ்சு அரவிந்த், சார்லி, நம்பியார், சிஆர் விஜயகுமாரி, நாகேஷ், மலேசியா வாசுதேவன் என்று ஒரு நட்சத்திர பட்டாளமே நடித்திருந்தனர். 250 நாட்கள் வரை திரையரங்கில் வெற்றி கொடுத்த இப்படம் பாக்ஸ் ஆபிஸிலும் வசூல் மழை கொட்டியது. இப்படம் விஜய்யின் வரலாற்றில் சில்வர் ஜூபிலி படமாக அமைந்தது.

இந்தப் படம் தெலுங்கு, கன்னடம் மற்றும் ஹிந்தி ஆகிய மொழிகளில் டப்பிங் செய்யப்பட்டது.

கிளைமேக்ஸ் சீன் டயலாக்ஸ்:

நான் லவ் பண்ணுணதே காதலித்த பொண்ணுக்கு தெரியாது. தோல்வியடைவதற்கு காதல் ஒன்னும் பரீட்சை இல்லைங்க. அது ஒரு பீலிங். அந்த பீலிங் ஒரு முறை வந்துவிட்டால் மறுபடியும் மறுபடியும் மாற்றிக்கிட்டே இருக்க முடியாது. காதல் சிலருக்கு செடி மாதிரி, ஒன்று போச்சுன்னு இன்னொன்னு. ஆனால், சிலருக்கு அந்த செடியில் இருக்கும் பூ மாதிரி. மறுபடியும் எடுத்து ஒட்ட வைக்க முடியாது. அது போலத்தான் எனது காதலும் என்று கூறி விஜய் சென்றுவிடுவார்.

நேருக்கு நேர்

இயக்குனர் வசந்த் இயக்கத்தில் விஜய், சூர்யா, சிம்ரன், கௌசல்யா ஆகியோர் பலர் நடித்த படம் நேருக்கு நேர். 100 நாட்களுக்கு மேல் ஓடிய படங்களில் இதுவும் ஒன்று. இப்படம் வணிக ரீதியாக ஹிட் கொடுத்த படமாக அறிவிக்கப்பட்டது.

காதலுக்கு மரியாதை

மலையாள இயக்குனர் பாசில் இயக்கத்தில் விஜய், ஷாலினி ஆகியோர் முன்னணி ரோலில் நடித்த காதல் படம் காதலுக்கு மரியாதை. 1997ல் வெளியான இப்படம் அப்போதே ரூ.38 கோடி வரையில் வசூல் குவித்ததாக விக்கிப்பீடியா பக்கத்தில் தெரிவிக்கப்பட்டுள்ளது. இப்படம் பாசிலின் மலையாள படமான அனியதிபிரவு என்ற படத்தின் தமிழ் ரீமேக் என்பது குறிப்பிடத்தக்கது.

முதலில் இப்படம் நடிகர் அப்பாஸ்க்கு சென்றுள்ளது. ஆனால், அவருடைய் கால்சீட் பிரச்சனை காரணமாக விஜய்க்கு இந்த வாய்ப்பு கிடைத்துள்ளது.

துள்ளாத மனமும் துள்ளும்

அறிமுக இயக்குனர் எழில் இயக்கத்தில் விஜய், சிம்ரன் முன்னணி ரோலில் நடித்த படம் துள்ளாத மனமும் துள்ளும். முதலில் இப்படத்திற்கு ருக்மணிக்காக என்று டைட்டில் வைக்கப்பட்டுள்ளது. பின்னர், படத்தை தயாரித்த தயாரிப்பாளர் ஆர்பி சௌதரி பார்த்தால் பசி தீரும் என்ற மாற்ற சொல்லியிருக்கிறார். ஆனால், இறுதியில் துள்ளாத மனமும் துள்ளும் என்று டைட்டில் வைக்கப்பட்டு ஹிட் கொடுத்துள்ளது.

இப்படம் நகைச்சுவை நடிகர் சார்லி சாப்ளினின் நடிப்பில் வந்த சிட்டி லைட்ஸ் படத்தின் தழுவல் என்பது குறிப்பிடத்தக்கது.

குஷி

எஸ்.ஜே.சூர்யா இயக்கிய படம். விஜய், ஜோதிகா ஆகியோர் முன்னணி ரோலில் நடித்திருந்தனர். முதலில் இந்த ரோலுக்கு சிம்ரன் தான் தேர்வு செய்யப்பட்டுள்ளார். பின்னர் ஜோதிகாவிற்கு அந்த வாய்ப்பு சென்றுள்ளது. அலைபாயுதே, கண்டுகொண்டேன் கண்டுகொண்டேன் ஆகிய படங்களுக்கு போட்டியாக வெளியாக இருந்த நிலையில், இந்தப் படம் ரிலீஸ் தேதியிலிந்து தள்ளி வைக்கப்பட்டு வெளியானது என்பது குறிப்பிடத்தக்கது.

இப்படத்திற்கு ஜோதிகாவிற்கு சிறந்த நடிகைக்கான பிலிம்பேர் விருது வழங்கப்பட்டது என்பது குறிப்பிடத்தக்கது.

திருமலை

இயக்குனர் ரமணா இப்படத்தை இயக்கினார். இதில், குஷி வெற்றிக்கூட்டணி விஜய் மற்றும் சிம்ரன் இருவரும் முன்னணி ரோலில் நடித்திருந்தனர். 150 வரை ஓடிய படங்களில் இதுவும் ஒன்று. பாக்ஸ் ஆபிஸ் வசூலில் சூப்பர் ஹிட் படமாக அமைந்துள்ளது. 2003ம் ஆண்டு தீபாவளி பண்டிகைக்கு இப்படம் வெளியானது குறிப்பிடத்தக்கது. இப்படம் தெலுங்கு மற்றும் ஹிந்தியில் டப்பிங் செய்யப்பட்டு வெளியானது.

திருப்பாச்சி

ஊர் பேர்களை படத்திற்கு டைட்டிலாக வைப்பதில் வித்தைக்காரரான இயக்குனர் பேரரசு இயக்கத்தில் விஜய், த்ரிஷா ஆகியோர் முன்னணி ரோலில் நடித்த ஆக்‌ஷன் படம் திருப்பாச்சி. 200 நாட்களுக்கு மேல் ஓடிய படங்களில் இப்படமும் ஒன்று. இப்படம் ஹிந்தி, தெலுங்கு மற்றும் கன்னடம் ஆகிய மொழிகளில் ரீமேக் செய்யப்பட்டது.

வேலாயுதம்

இயக்குனர் மோகன் ராஜா இயக்கத்தில் விஜய், ஹன்சிகா, ஜெனீலியா ஆகியோர் பலர் நடிப்பில் கடந்த 2011ல் வெளியான படம் வேலாயுதம், 2000ல் வெளியான தெலுங்கு படமான ஆசாத் படத்தின் தூண்டுதலில் இப்படம் வெளிவந்தது என்பது குறிப்பிடத்தக்கது. ரூ.45 கோடி பட்ஜெட்டில் உருவாக்கப்பட்ட இப்படம் ரூ.85 கோடி வரையில் வசூல் கொடுத்ததாக தெரிவிக்கப்பட்டுள்ளது.

துப்பாக்கி

ஏ.ஆர்.முருகதாஸ் இயக்கத்தில் ஆக்‌ஷன் த்ரில்லர் பாணியில் விஜய் நடிப்பில் வெளியான படம் துப்பாக்கி. காஜல் அகர்வால் விஜய்க்கு ஜோடியாக நடித்திருந்தார். இப்படம் தமிழ் மற்றும் ஹிந்தியில் ரீமேக் செய்யப்பட்டது. இப்படம் 6 விஜய் விருதுகளை கைப்பற்றியது. பாக்ஸ் ஆபிஸில் வசூல் மழை பொழிந்த படங்களில் இதுவும் ஒன்று. உலகம் முழுவதும் இப்படம் ரூ.1.25 பில்லியன் வரை வசூல் குவித்துள்ளது.

கத்தி

துப்பாக்கியைத் தொடர்ந்து முருகதாஸ் கத்தி படத்தை இயக்கினார். விஜய் மற்றும் சமந்தா கூட்டணியில் வந்த இப்படம் ரூ.130 கோடி வரையில் பாக்ஸ் ஆபிஸில் வசூல் குவித்துள்ளது. விவசாயிகளின் பிரச்சனையை மையப்படுத்தி இப்படம் வெளிவந்திருந்தது. 100 நாட்களுக்கு மேல் ஓடி படங்களில் இதுவும் ஒன்று.

மீஞ்சூர் கோபி நயினார் என்பவர் இயக்குனர் முருகதாஸ்க்கு எதிராக காப்புரிமை கோரி வழக்கு தொடர்ந்தார். மூத குடி என்ற தனது நாவலின் தழுவல் தான் இப்படம் என்று கூறி அவர் தொடர்ந்த வழக்கு முருகதாஸ்க்கு சாதகமாக வந்தது.

தெறி

இயக்குனர் அட்லி இயக்கத்தில் விஜய், சமந்தா கூட்டணியில் வந்த படம் தெறி. இப்படம் ரூ.1 பில்லியன் வரை பாக்ஸ் ஆபிஸில் வசூல் கொடுத்தது. ஹிந்தியில் இப்படம் டப் செய்யப்பட்டு வெளியிடப்பட்டது.

சர்கார்

விஜய் – ஏ.ஆர்.முருகதாஸ் கூட்டணியில் வந்த 3ஆவது முக்கிய படம் சர்கார். அரசியல் கதையை மையப்படுத்திய இப்படம் ரூ.260 கோடி வரையில் பாக்ஸ் ஆபிஸில் வசூல் கொடுத்துள்ளது.

திருட்டுக்கதை

சர்கார் படத்தின் எழுத்தாளர் வருண் ராஜேந்திரனுடையது. கடந்த 2007ல் தென்னிந்திய திரைப்பட எழுத்தாளர் சங்கத்தில் வருண் ராஜேந்திரன் தனது செங்கோல் கதையை பதிவு செய்து வைத்திருந்தார். இதன் காரணமாக இப்படத்தின் கதை விவகாரம் தொடர்பாக வருண் ராஜேந்திரன் சென்னை உயர்நீதிமன்றத்தில் படத்திற்கு தடை கோரி மனு தாக்கல் செய்தார்.

இதன் விசாரணையில், தயாரிப்பாளர் சன் பிக்சர் நிறுவனம், முருகதாஸ் மற்றும் வருண் ராஜேந்திரன் ஆகியோருக்கு இடையில் சமரச உடன்பாடு ஏற்பட்டதைத் தொடர்ந்து, சர்கார் பட டைட்டில் கார்டில் வருண் ராஜேந்திரனுக்கு நன்றி தெரிவிக்கவும், அவருக்கு ரூ.30 லட்சம் கொடுக்கவும் ஒப்புக்கொண்டதைத் தொடர்ந்து படம் வெளியானது என்பது குறிப்பிடத்தக்கது. முதலில் இந்த விவகாரத்தில் தென்னிந்திய திரைப்பட எழுத்தாளர் சங்கத் தலைவராக இருந்த பாக்யராஜ் செங்கோல் கதை மற்றும் சர்கார் கதை இரண்டும் வெவ்வேறு என்று கூறவே இந்த விவகாரம் நீதிமன்றத்திற்கு சென்றது என்பது குறிப்பிடத்தக்கது.

49பி

சர்கார் படத்தின் மூலம் 49பி குறித்து வாக்களர்களுக்கு விழிப்புணர்வு ஏற்படுத்தப்பட்டது. அதாவது, ஒருவரது வாக்கு கள்ள ஓட்டாக போடப்பட்டிருந்தால் தேர்தல் அலுவலரிடம் 49பி-ன் கீழ் வாக்களிக்க விரும்புவதாக தெரிவிக்கலாம்.

அந்த வாக்காளருக்கு தனியாக ஒரு சீட்டு வழங்கப்படும், அந்தச் சீட்டில் வேட்பாளர்களின் பெயர்கள் இருக்கும். அதில் இருந்து தனக்கு விருப்பமான வேட்பாளருக்கு அவர் வாக்களிக்கலாம். ஆனால், இந்த வாக்குச்சீட்டு தனியே வைக்கப்படும். கள்ள ஓட்டு தான் கணக்கில் எடுத்துக் கொள்ளப்படும் என்பது குறிப்பிடத்தக்கது. இதே போன்று பலரும் 49பி-ன் கீழ் வாக்களித்தால் தேர்தலுக்கு பிரச்சனை ஏற்படும் என்பது குறிப்பிடத்தக்கது.

இந்த வரிசையில், மெர்சல், கில்லி, ஃப்ரண்ட்ஸ், போக்கிரி, நண்பன், காவலன், சச்சின், ஷாஜகான், ப்ரியமானவளே, மாண்புமிகு மாணவன், பத்ரி, சிவகாசி, தலைவா ஆகிய படங்களும் அடங்கும் என்பது குறிப்பிடத்தக்கது.

ரஜினிகாந்த் இந்திய சினிமாவின் ஈடு இணையில்லா நடிகர். இவர் 69 வயது நெருங்கியும் இன்றும் இந்தியாவின் முன்னணி நடிகர்கள் லிஸ்டில் உள்ளார்.

இந்நிலையில் ரஜினிகாந்த் வாழ்க்கை வரலாறை மையமாக கொண்டு ஒரு படத்தை உருவாக்க ஒரு சிலர் முடிவு செய்துள்ளார்களாம்.

இப்படத்தை மிகப்பிரமாண்டமாக எடுக்க ப்ளான் செய்து வருகின்றார்களாம், மேலும், ரஜினி கதாபாத்திரத்தில் நடிக்க வைக்க எந்த ஹீரோவை கமிட் செய்யலாம் என்ற பேச்சு வார்த்தையும் நடந்து வருகின்றதாம்.

ஆணவக்கொலையால் ஒரு காதல் ஜோடிக்கு நேரும் கொடுமைகளை பேசுகிறது பிரான்மலை திரைப்படம்.

பிரான்மலை ஊரின் முக்கிய தலைக்கட்டான வேலராமமூர்த்தியின் மகன் வர்மன். அப்பா போல் இல்லாமல் மிகவும் சாதுவானவர், அம்மா இல்லாததால் பாசத்துக்காக ஏங்ககூடிய நபர். ஆதரவற்றோர் ஆசிரமத்தில் வளர்ந்து, எல்லோர் மீதும் அன்பு செலுத்தும் நேகா மீது வர்மனுக்கு காதல் மலர்கிறது. நேகாவும் வர்மனை காதலிக்கிறார். அப்பாவிடம் தன் காதலை சொல்ல தயங்கும் வர்மன், யாருக்கும் தெரியாமல் நேகாவை திருமணம் செய்து கொண்டு குடும்பம் நடத்த தொடங்குகிறார். இந்த விஷயம் சாதி வெறிப்பிடித்த வேலராமமூர்த்தி மற்றும் குடும்பதாருக்கு தெரிந்துவிடுகிறது. இதையடுத்து நடக்கும் அதிரடி சம்பவங்களை அழுத்தமாக பதிவு செய்கிறது பிரான்மலை.

படத்தின் ஹீரோவாக நடித்துள்ள வர்மன், தனது பாத்திரத்தை உணர்ந்து சிறப்பாக செய்திருக்கிறார். ஆக்ஷன், செண்டிமெண்ட், காதல் என தனது கடமையை நிறைவாக செய்திருக்கிறார். அடுத்தடுத்த படங்களில் நடிப்பை மெருகேற்றினால், எதிர்காலம் சிறக்க வாய்ப்புகள் அதிகம்.

புதுமுகம் நேகா தமிழ் சினிமாவுக்கு நல்ல அறிமுகம். கயல் ஆனந்தி சாயலில், பக்கத்து வீட்டு பெண் போல் இருக்கிறார்.

வழக்கம் போல இந்த படத்திலும் தனது நடிப்பால் படத்தை தாங்கிப்பிடித்திருக்கிறார் வேலராமமூர்த்தி. கறிக்குழம்பை அள்ளிக்குடிக்கும் அந்த காட்சியில் உண்மையிலேயே மிரளவைக்கிறார்.

காமெடிக்காக பிளாக் பாண்டி, கஞ்சா கருப்பு என இருவர் இருக்கிறார்கள். ஆனால் படத்தில் காமெடி தான் இல்லை. சிரிக்க வைப்பதற்கு பதிலாக 'கடுப்பேத்துறாங்க மைலார்டு' என புலம்ப வைக்கிறார்கள்.

படத்தின் கதை மிக ஆழமானது. தமிழ்நாட்டில் இப்போது நடக்கும் பல உண்மை சம்பவங்களை அடிப்படையாக கொண்டது. ஆனால் திரைக்கதை என்ற ஒன்று இல்லாததால் படம் ஏனோதானோவென செல்கிறது.

ஒவ்வொரு காட்சியும் நிறுத்தி நிதானமாக செல்வதால் படத்தில் சுவாரஸ்யமே இல்லை. அதுவும் க்ளைமாக்சில் இருந்து தான் படமே ஆரம்பமாகிறது. நல்ல திரைக்கதை அமைத்திருந்தால், கதைக்கு வலு சேர்த்திருக்கும். இதை அடுத்த படத்திலாவது கவனத்தில் வைத்துக்கொள்ளுங்கள் இயக்குனர் அகரம்குமரா.

ஆனால் படத்தில் இரட்டை அர்த்த வசனங்களோ, ஆபாசமான காட்சிகளோ இல்லை. அதற்காக வேண்டுமானால் இயக்குனரை பாராட்டலாம்.

குறைந்த பட்ஜெட் படம் என்பதால், ஒளிப்பதிவு, எடிட்டிங் என சுமாராகவே இருக்கிறது. இசை மட்டும் ஆறுதல் தரக்கூடிய வகையில் இருக்கிறது. குறிப்பாக அந்த ஓபனிங் குத்து பாடலுக்காக இசையமைப்பாளர் பாரதி விஸ்கரை பாராட்டலாம்.

முதல் படம் என்றாலும், அதில் ஆணவக்கொலையை பற்றி பேசியிருப்பதால் 'பிரான்மலை'க்கு சின்னதா ஒரு கைத்தட்டல்.

சர்கார் படத்தை அடுத்து முன்னணி இயக்குனர் முருகதாஸ் தற்போது ரஜினி படத்தை இயக்க முதற்கட்ட பணிகளில் ஈடுபட்டு வருகிறார்.

இந்நிலையில் அவர் சமீபத்தில் வெளிவந்த கனா படத்தை ட்விட்டரில் புகழ்ந்து தள்ளியுள்ளார். சிவகார்த்திகேயன் தயாரிப்பில் அருண்ராஜா கமராஜ் இயக்கியுள்ள இந்த படத்தில் ஐஸ்வர்யா ராஜேஷ் ஹீரோயினாக நடித்துள்ளார்.

விவசாயத்தையும் கிரிக்கெட்டையும் இணைந்து இப்படிஒரு ஐடியா பிடித்திருந்தது என கூறியுள்ள அவர், கிளைமாக்ஸ் காட்சி மனதை தொட்டுவிட்டதாக கூறியுள்ளார்.

இந்தியன் 2 படத்தை முடித்த பிறகு மாஸ் கூட்டணி அமைக்கப் போகிறாராம் இயக்குனர் ஷங்கர்.

2.0 படத்தை அடுத்து ஷங்கர் கமல் ஹாஸனை வைத்து இந்தியன் 2 படத்தை இயக்குகிறார். படப்பிடிப்பு இந்த மாதம் துவங்க உள்ளது. செட் போடும் பணியால் படப்பிடிப்பு தள்ளிப் போயுள்ளது.

இந்நிலையில் அடுத்த படம் குறித்த வேலையிலும் இறங்கியுள்ளாராம் ஷங்கர்.

புதுப்படம்

இந்தியன் 2 படத்தை முடித்த பிறகு சயின்ஸ் ஃபிக்ஷன் படத்தை இயக்க திட்டமிட்டுள்ளாராம் ஷங்கர். அந்த படத்தில் பாலிவுட் நடிகர் ரித்திக் ரோஷனை ஹீரோவாக நடிக்க வைக்க விரும்புகிறார் ஷங்கர் என்று தகவல் வெளியாகியுள்ளது.

ரித்திக்

சயின்ஸ் ஃபிக்ஷன் படம் தொடர்பாக ஷங்கர் தற்போது ரித்திக் ரோஷனுடன் பேச்சுவார்த்தை நடத்தி வருவதாக இந்தி ஊடகங்கள் தெரிவித்துள்ளனர். ஷங்கர் சொன்ன கதை ரித்திக்கிற்கு மிகவும் பிடித்துள்ளதாம். இருப்பினும் ஒப்பந்தம் எதிலும் ரித்திக்கிடம் ஷங்கர் இன்னும் கையெழுத்து வாங்கவில்லையாம்.

வில்லன்

2.0 படத்தில் பக்ஷி ராஜனாக நடிக்குமாறு ஷங்கர் முதலில் ரித்திக் ரோஷனிடம் கேட்டாராம். அவரால் நடிக்க முடியாமல் போகவே அந்த கதாபாத்திரத்தில் அக்ஷய் குமார் நடித்தாராம். தன்னால் நடிக்க முடியாமல் போனாலும் 2.0 படத்தை பாராட்டி ட்வீட் போட்டார் ரித்திக் என்பது குறிப்பிடத்தக்கது.

உக்ரைன்

இந்தியன் 2 படத்தின் முதல்கட்ட படப்பிடிப்பு பொள்ளாச்சியில் துவங்க உள்ளது. அதன் பிறகு படக்குழு உக்ரைன் செல்கிறது. ஷங்கருக்கு 3.0 எடுக்கும் திட்டமும் உள்ளது. ஆனால் ரஜினி நடித்தால் மட்டுமே 3.0 படத்தை எடுப்பாராம்.

நடிகை நயன்தாரா திரைத்துறைக்கு வந்து 15 ஆண்டுகள் நிறைவடைவதை அவரது ரசிகர்கள் கொண்டாடி மகிழ்கின்றனர்.

இன்றைய தேதிக்கு தமிழ் சினிமாவின் உச்ச நடிகை யார் என்று கேட்டால் சற்றும் யோசிக்காமல் நயன்தாரா என பதில் கூறிவிடலாம். இப்போது எல்லாம் நாயகனை மனதில் வைத்து கதை எழுதும் இயக்குனர்களைவிட, நயன்தாராவை மனதில் வைத்து கதை எழுதும் இயக்குனர்கள் தான் அதிகம்.

அந்த அளவுக்கு தனது சினிமா கேரியரில் கோலாச்சி நிற்கிறார் நயன். அதன்காரணமாகவே அவரை லேடி சூப்பர் ஸ்டார் என அவரது ரசிகர்கள் கொண்டாடி மகிழ்கிறார்கள்.

2018ம் ஆண்டின் சூப்பர் "ஸ்டார்ஸ்" யாரு.. வாங்க.. ஓட்டுப் போடுங்க!

நயன்தாராவின் முதல் படம்

நயன்தாராவின் இந்த அசுர வளர்ச்சி, ஏதோ ஒரே நாளில் வந்துவிட்டது அல்ல. 2003ம் ஆண்டு கிறிஸ்துமுஸ் நாளில் 'மனசினக்கரே' மலையாள படம் மூலம் அறிமுகமானது டயானா மரியம் குரியன் எனும் நயன்தாராவின் திரை வாழ்க்கை. தமிழில் வெளிவந்த அவரது முதல் படம் சரத்குமாரின் ஐயா. அதைத்தொடர்ந்து ரஜினியின் சந்திரமுகி.

இளம் ஹீரோக்களின் படங்கள்

இந்த படங்களில் நடித்தது நயன்தாராவுக்கு நல்ல பெயரை வாங்கி கொடுத்தாலும், இளம் ஹீரோக்கள் அவரை ஒப்பந்தம் செய்த தயங்கினர். ஆனால் தன்னால் எல்லா நடிகர்களுடனும் நடிக்க முடியும் என நிரூபித்துக்காட்டினார். சிம்புடன் வல்லவன், தனுஷுடன் யாரடி நீ மோகினி, அஜித்துடன் பில்லா, விஜய்யுடன் வில்லு என எல்லா ஹீரோக்களுடனும் நடித்தார்.

ஆசைப்படும் நடிகர்கள்

சூர்யா, ஜெயம் ரவி, ஆர்யா, சிவகார்த்திகேயன், விஜய் சேதுபதி என நயன்தாராவுடன் நடிக்காத ஹீரோக்களே இல்லை என்ற நிலைதான் இன்று. நயன்தாராவுடன் ஒரு படமானாலும் நடித்துவிட வேண்டும் என்ற போட்டி தான் இப்போது இங்கு நிகழ்கிறது.

சராசரி ஹீரோயின்

தொடக்க காலத்தில் எல்லா ஹீரோயின்களையும் போல, சராசரி கிளாமர் ரோல்களில் தான் நடித்து வந்தார் நயன்தாரா. அதுவும் பில்லா படத்தில் பிகினி உடையில் நயன்தாராவை பார்த்து, ஜொள்ளுவிடாத ஆட்களே இங்கில்லை எனக் கூறலாம்.

இமேஜை மாற்றிய ராஜா ராணி

இப்படிப்பட்ட நிலையில் இருந்த நயன்தாராவின் இமேஜை மாற்றியது ராஜா ராணி திரைப்படம் தான். அட்லி இயக்கத்தில் வெளிவந்த அந்த படத்தில், குறுப்புக்கார பெண்ணாகவும், மெச்சூர்டான மனைவி ரோலிலும் மிகச்சிறப்பாக நடித்திருப்பார் நயன்தாரா. இதேபோல் தனி ஒருவன் படமும் நயன்தாராவின் நடிப்பு திறனுக்கு தீனிபோட்டது.

ஹீரோயின் படங்கள்

இந்த படத்தை தொடர்ந்து , அறம், கோலமாவு கோகிலா, இமைக்கா நோடிகள் போன்ற ஹீரோயினுக்கு முக்கியத்துவம் உள்ள படங்களில் நடித்த நயன்தாராவுக்கு கை மேல் பலன் கிடைத்தது. இந்த படங்களை அவரது ரசிகர்கள் கொண்டாடி மகிழ்ந்தார்கள். வசூல் ரீதியாக நல்ல ரிசல்ட்டை தந்தன இப்படங்கள்.

பேர் சொல்லும் படங்கள்

இதனை தொடர்ந்து தான் ஹீரோயினுக்கு முக்கியத்துவம் உள்ள படங்களில் அதிக கவனம் செலுத்தி வருகிறார் அவர். ஐரா, கொலையுதிர் காலம் என நயன்தாராவின் பேர் சொல்லும் படங்கள் ரிலீசுக்கு தயாராகி வருகின்றன. இதில் அஜித்தின் விஸ்வாசமும் ஒன்று.
நயன்தாரா மீதான குற்றச்சாட்டு
நயன்தாரா மீதான குற்றச்சாட்டு

அதேசமயம் நயன்தாரா மீது ஏராளமான புகார்கள் வாசிக்கப்படுவதும் உண்டு. அவர் நடிக்கும் படத்தின் புரோமோஷன் நிகழ்ச்சிக்கு கூட வருவதில்லை என்பது முக்கியமான புலம்பல். ஆனால் கடந்த காலங்களில் ஏற்பட்ட கசப்பான அனுபவங்களால் பட புரோமோஷன்களை அவர் தவிர்த்தே வருகிறார். குறிப்பாக பத்திரிகையாளர்களை சந்திப்பதே இல்லை அவர். இருப்பினும் அவரை பற்றி எழுதாத நாட்களே பத்திரிகைகளுக்கு இல்லை.

சறுக்கல்கள்

தனிப்பட்ட வாழ்க்கையில் பல சறுக்கல்களை சந்தித்தவர் நயன். காதல் விவகாரங்களில் கிசுகிசுக்கப்பட்டு பெறும் ஏற்றத்தாழ்வுகளை சந்தித்தவர். வேறொருவராக இருந்திருந்தால், இந்த மனஉளைச்சலில் இருந்து மீண்டு வருவதற்கே ஆண்டுகள் பல பிடித்திருக்கும்.

ரேஸில் ஓடும் குதிரை

ஆனால் நயன்தாராவோ ரேஸில் ஓடும் குதிரை கீழே விழுந்தமாத்திரத்தில் சட்டென எழுந்து ஓடுவது போல், சினிமா ரேஸில் முன்பைவிட அதிவேகமாக ஓடிக்கொண்டிருக்கிறார். தனிப்பட்ட வாழ்வில் ஏற்பட்ட பிரச்சினைகள், அவரை பட்டை தீட்டிய வைரமாக மாற்றியிருக்கின்றன. இன்றைய சினிமாவில் நயன்தாரா ஒரு சகாப்தம்.... தொடரட்டும் அவரது வெற்றிப் பயணம்...

தமிழ் சினிமாவின் தளத்தை ஒரு சில இயக்குனர்கள் மட்டுமே அடுத்த தளத்திற்கு எடுத்து செல்வார்கள். அப்படி குறும்படம் மூலம் ஒரு குரூப் தமிழ் சினிமாவில் காலடி எடுத்து வைத்து கலக்கி வருகின்றது. அந்த வரிசையில் முண்டாசுப்பட்டியில் காலடி எடுத்து வைத்த ராம்குமாரின் அடுத்தப்படைப்பு தான் ராட்சசன், இதுவும் மக்களை கவர்ந்ததா? பார்ப்போம்.

கதைக்களம்

விஷ்ணு பெரிய இயக்குனர் ஆகவேண்டும் அதுவும் முதல் படம் சைக்கோ படமாக இருக்க வேண்டும் என்று கடுமையாக உழைக்கின்றார். இதற்காக உலகில் உள்ள அனைத்து சைக்கோக்கள் பற்றியும் தகவல்கள் சேகரித்து வைக்கின்றார்.

அந்த சமயத்தில் போலிஸாக இருந்த அவருடைய அப்பா இறக்க, போலிஸ் வேலை இவரை தேடி வருகின்றது. அவரும் குடும்ப வறுமை காரணமாக அந்த வேலையில் சேர்கின்றார்.

சென்னையில் தொடர்ந்து பள்ளி மாணவிகள் கடத்தப்பட்டு கொடூரமாக கொலை செய்யப்படுகின்றனர், இவை தமிழக காவல் துறைக்கு பெரும் தலை வலியாக இருக்க, விஷ்ணு சினிமாவிற்காக எடுத்து வைத்த பல தகவல்கள் இந்த கேஸிற்கு உதவ, அதன் பின் இந்த சைக்கோவை தேடி அலையும் விஷ்ணு எப்படி அவனை கண்டுப்பிடிக்கின்றார் என்பதை சீட்டின் நுனிக்கு வர வைத்து காட்டியுள்ளனர்.

படத்தை பற்றிய அலசல்

முதலில் விஷ்ணுவிற்கு தான் பாராட்டு, வெறுமென கமர்ஷியல் மசாலாவில் மாட்டாமல், முண்டாசுப்பட்டி, நேற்று இன்று நாளை, ராட்சசன் என வித்தியாசமாக கதைகளை தேர்ந்தெடுத்து நடித்து அசத்தி வருகின்றார். இதுவரை நடித்ததில் விஷ்ணுவின் பெஸ்ட் ராட்சசன என்று சொல்லிவிடலாம்.

அவரை தாண்டி முனிஷ்காந்த், அட முண்டாசுப்பட்டியில் காமெடியில் கலக்கியவரா இவர், எமோஷ்னல் காட்சியில் கலங்க வைக்கின்றாரே என ஆச்சரியப்பட வைக்கின்றார். ஒரு த்ரில்லர் படத்திற்கு மிக முக்கியமே அடுத்து என்ன, யார் இதை செய்கின்றார்கள் என்பதை மக்களிடம் பதிய வைப்பது தான்.

படம் கிட்டத்தட்ட 3 மணி நேரம் தான், ஆனால் ஒரு காட்சியில் கூட உங்களை சோர்வாக்காது, பரபரப்பிலேயே உங்களை கட்டிப்போட்டு இருக்கும். அதிலும் பள்ளி ஆசிரியர் ஒருவர் மாணவிகளை எப்படி தன் ஆசைக்கு இணங்க வைக்கின்றார் என்ற காட்சிகளை காட்டிய விதம் எல்லாம், கண்டிப்பாக அனைத்து பெற்றோர்களுக்கும் ஒரு விழிப்புணர்வு தான், நமக்கே அவரை அடிக்க வேண்டும் என்ற உணர்வை இயக்குனர் கடத்தி செல்கின்றார்.

ஒரு சைக்கோ, பழிவாங்கும் கதை என்றாலே ப்ளாஷ்பேக் கண்டிப்பாக இருக்கும். ஹாலிவுட் படங்களுக்கு இது தேவையில்லை என்றாலும், தமிழுக்கு இவை மிகவும் முக்கியம் தான், அந்த விதத்தில் சைக்கோவிற்காக ப்ளாஷ்பேக் காட்சிகள் மிக அழுத்தமாக உள்ளது.

ஆனால், கொஞ்சம் கொரியன் படமான மெமரீஸ் ஆப் மர்டரை நியாபகப்படுத்துகின்றது, அதை தவிர்க்க முடியவில்லை ராம்குமார். அதிலும் குறிப்பாக அந்த ரோடியோவில் இசையை வைத்து சைக்கோ கொலைக்காரனை கண்டுபிடிக்க வைக்க எடுக்கும் முயற்சிகள், கொஞ்சம் மெமரீஸ் ஆப் மர்டரை நியாபகப்படுத்தினாலும், மற்றபடி இது பெஸ்ட் சைக்கோ த்ரில்லர் டாப் லிஸ்டில் இடம்பெறும்.

படத்தின் ரியல் ஹீரோ ஜிப்ரான் தான், காட்சிக்கு காட்சி தன் இசையால் நம்முள் பதட்டத்தை கொண்டு செல்கின்றார். ஒளிப்பதிவாளர் ஷங்கரின் ஒளிப்பதிவு நம்மையும் கூடவே அழைத்து செல்கின்றது.

க்ளாப்ஸ்

படத்தின் திரைக்கதை, எவ்வளவு பெரிய படமாக இருந்தாலும் ஒரு நொடி கூட நம் கவனத்தை திசை திருப்பவில்லை.

படத்தில் வரும் சைக்கோ கொலைக்காரனுக்கான அழுத்தமான ப்ளேஷ்பேக் காட்சிகள். பல இடங்களில் நம்மை அச்சத்தில் உறைய வைக்கின்றார்.

ஒரு சில காட்சிகள் ஹாலிவுட் படம் போல் குறிப்பாக சொல்ல வேண்டுமென்றால் விஷ்ணு தூக்கத்திலிருந்து எழும் காட்சி, ஏதோ துப்பாக்கியில் சுடுவது போல் வந்து உடனே எழுவது தமிழ் சினிமாவில் கொஞ்சம் புதிது.

ஜிப்ரானின் பின்னணி இசை மற்றும் டெக்னிக்கல் விஷயங்கள். கிளைமேக்ஸ் ஸ்டெண்ட் சூப்பர்.

பல்ப்ஸ்

சைக்கோ கொலைக்காரனை ஊர் போலிஸே தேடுகின்றது, அவரும் ரன்னிங்கில் இருப்பார் என்று பார்த்தால் அந்த பதட்டத்தில் அவருக்கு எப்படி விஷ்ணுவின் காதலி(அமலா பால்) வீடு, அவருக்கு உதவி செய்யும் ராதாரவி வீட்டையெல்லாம் கண்டுபிடித்து கொல்ல வருகின்றார் என்று தெரியவில்லை.

மொத்தத்தில் உங்களை சீட்டின் நுனிக்கு கொண்டு வந்து கடைசி வரை பதட்டத்தில் வைத்திருக்கும் ஒரு அனுபவத்தை அடைய கண்டிப்பாக இந்த ராட்சசனை விசிட் அடிக்கலாம்.

கோலிவுட், பாலிவுட் என இந்திய சினிமாக்களை எல்லாம் தாண்டி ஹாலிவுட்டில் கதைகளில் எல்லாம் நடித்தவர்களில் முக்கியமானவர் கமல். இவர் நடித்த தூங்கவனம், ஸ்லீப்லெஸ் நைட் என்ற ஹாலிவுட் படத்தில் இருந்து தான் எடுக்கப்பட்டது.

தற்போது அதே போல் டோண்ட் பிரீத் என்ற ஹாலிவுட் படத்தை ரீமேக் செய்யும் படத்தில் விக்ரம் நடிக்க இருக்கிறார். இந்த படத்தை தூங்கவனத்தை இயக்கிய ராஜேஷ் எம்.செல்வா தான் இயக்கவுள்ளார்.

இந்த படத்தில் விக்ரமுக்கு ஜோடியாக கமலின் மகள் அக்‌ஷராஹாசன் நடிக்க உள்ளார்.

பெரிய பட்ஜெட் படங்களுக்கு நடுவில் சில சிறு பட்ஜெட் படங்கள் களத்தில் இறங்கத்தான் செய்கின்றன. அதிலும் நல்ல கதையுள்ள படங்களுக்கு மக்கள் மத்தியில் நல்ல வரவேற்பு கிடைத்து விடுவது நிச்சயம். அந்த வகையில் ராஜா ரங்குஸ்கி என பெயர் தாங்கி வந்துள்ள படம் ராஜா போல நின்று விளையாடுமா என பார்க்கலாம்.

கதைக்களம்

ஊரில் போலிஸ் இளைஞனாக கதையின் ஹீரோ சிரிஷ். இவருக்கு பெரிதாக குடும்ப பின்னணியெல்லாம் இல்லை. வழக்கம் போல தன் காவல் ரோந்து பணிகளை செய்து வருகிறார். அவருக்கு நண்பனாக சக போலிஸ் தோழன் கல்லூரி வினோத் மட்டுமே.

இடையில் ஹீரோயின் சாந்தினியை சந்திக்கிறார். காதல் வயப்படுகிறார். எழுத்துதுறையில் ஆர்வலராக இருக்கும் இவருக்கென ஒரு தனி பாலிசி. ஒரு நாள் அவர் குடியிருப்பில் பெண் ஒருவர் கொல்லப்படுகிறார். ரோந்து பணிக்காக சென்ற ஹீரோ இதை கண்டு அதிர்ச்சியாகிறார்.

தொடர்ந்து அடுத்தடுத்த கொலைகள். சம்மந்தமில்லாமல் இவர் இக்குற்ற வழக்கில் சிக்க, நடப்பது என்ன? பின்னணியில் இருப்பது யார்? என புரியாத புதிராக நகர்வது தான் ராஜா ரங்குஸ்கி.

படத்தை பற்றிய அலசல்

ஹீரோ சிரிஷ் மெட்ரோ படத்தை தொடர்ந்து 2 வது படமாக இந்த ஆக்‌ஷன் கதையை தேர்ந்தெடுத்திருக்கிறார். கதையில் இவர் தான் ராஜா. ஒரு சாதாரண போலிஸ் காவலர். காதல் ஒரு பக்கம். பழி மறுபக்கம் என அமைதியற்று அலைகிறார். பொருத்தமான கதையை தான் அவர் தேர்வு செய்திருக்கிறார். அவர் முன்பு நேர்காணல்களில் சொன்னது போல இப்படம் பலருக்கும் பிடிக்கும்.

ஹீரோயின் சாந்தினி பல படங்களில் நடித்த அனுபவத்தை காட்டியுள்ளார். ரங்குஸ்கியாக அவர் கேரக்டரில் இருந்தாலும் ஹீரோவுக்கு நிகரான இடம் இங்கே அவருக்கு என சொல்லலாம். கிட்டத்தட்ட ஒரு ஹீரோயினை மையப்படுத்திய கதை போல என்றால் மிகையல்ல.

இயக்குனர் தரணி தரண் ஜாக்சன் துரை படத்தை கொடுத்து மற்ற படங்களுக்கு மத்தியில் இடம் பிடித்தது போல இப்படத்திலும் அவர் பிடித்து வைத்திருக்கிறார். முதல் பாதி சற்று மெதுவாக நகர்ந்தாலும் இரண்டாம் பாதியில் நம் கவனத்தை அதிகப்படுத்தியுள்ளார்.

கல்லூரி வினோத் இப்படத்தில் ஒரு சப்போட்டிங் ரோல் என்றாலும் சில இடங்கள் அடிக்கும் காமெடிகள் படம் பார்ப்பவர்களுக்கு கொஞ்சம் புத்துணர்வு கொடுக்கிறார். வாழ்த்துக்கள்.

சுற்றி வளைக்காமல் நேரடியாக விசயத்திற்குள் வரும்படியான காட்சி நகர்வுகளை பார்க்கும் போது பல படங்களை பார்த்து பழகியவர்களுக்கு கொஞ்சம் Uneasy போல தான். ஆனாலும் சம்திங் மிஸ்ஸிங் என சொல்லவைக்கும். அதனால் ஒளிப்பதிவாளருக்கும் இதில் பங்குண்டு.

இசைக்கு யுவன். நாம் சொல்லவா வேண்டும். இந்த படத்திற்கு அவர் பெரிதளவில் சம்பளம் வாங்கவில்லை என்றாலும் தனக்காக இடத்தை ரசிகர்கள் மத்தியில் பிடித்து வைத்துள்ளதோடு, அவர்களின் எதிர்பார்ப்பை இங்கேயும் நிறைவேற்றியுள்ளார். சிம்பு இப்படத்தில் ஒரு பாடலை பாடியுள்ளார்.

இதுமட்டுமல்ல. படத்தில் நாம் எதிர்பாராத விசயங்களும் உண்டு. அதை நாங்கள் இங்கே சொல்லப்போவதில்லை.

கிளாப்ஸ்

படத்தில் கதை நகர்வு சலிப்படையாமல் நம்மை இழுத்து செல்வது தான்.

இயல்பான காமெடிகள் காமெடி நடிகர்கள் இல்லை என்ற குறையை மூடிவிட்டது.

யுவன் சங்கர் ராஜாவின் பின்னணி இசை கதைக்கு பக்க பலம்.

எதிர்பாராத கிளைமாக்ஸ் Interesting Segment.

பல்ப்ஸ்

ஹீரோ இன்னும் கொஞ்சம் எக்ஸ்பிரஷன்களை கூட்டியிருக்கலாம்.

பாடல்கள் மனதில் இடம் பெறுவது கொஞ்சம் கேள்வியாக தான் இருக்கிறது.

மொத்தத்தில் ராஜா ரங்குஸ்கி ஒரு புதிரான விளையாட்டு. தியேட்டரில் பாருங்கள் மக்களே...

கரு:தடை பல கடந்து, இரண்டு ஊர் பகைக்கு இடையே வளரும் காதலும் அந்த காதலரின் வரலாற்று பின்னணியும் தான் இப்படக் கரு.

கதை: திருநெல்வேலி மாவட்டம், அம்பாசமுத்திரம் தாலுகாவில் உள்ள சிங்கம் பட்டிக்கும், புளியம்பட்டிக்கும் இரண்டு ஊருக்கும் பொதுவான ஒரு மார்கெட் சந்தையால் ஆண்டு கணக்கில் பகை. அந்த பகையை சிங்கம்பட்டி சீமராஜா சிவகார்த்திகேயன் எப்படி தன் புத்திசாலிதனத்தால் தீர்த்து, எட்டு வருஷம் நடக்காத கோவில் பரிவட்ட திருவிழாவை நடத்தி காட்டி, தான் உயிருக்கு உயிராய் விரும்பும் புளியம்பட்டி பொண்ணுசுதந்திரதேவி – சமந்தாவை தடை பல கடந்து கரம் பிடிக்கிறார் என்பது தான் "சீமராஜா" படத்தின் கதையும், களமும்.

காட்சிப்படுத்தல்: சிவகார்த்திகேயன் - சமந்தா ஜோடியுடன் சூரி, யோகி பாபு, 'நான் கடவுள்' ராஜேந்திரன், நெப்போலியன், லால், சிம்ரன், மனோபாலா, ரஞ்சனி,"பிச்சைக்காரன்" மூர்த்தி, சூப்பர் குட் சுப்பிரமணி... ஆகியோருடன் கீர்த்தி சுரேஷும் கெஸ்ட் ரோலில் நடிக்க, 24 ஏ எம் பட நிறுவனம் ஆர்டி ராஜா தயாரிப்பில், டி.இமான் இசையில் "வருத்தப்படாத வாலிபர் சங்கம்", "ரஜினி முருகன்" வெற்றிப் படங்களை சிவகார்த்திகேயனுக்கு தந்த இயக்குனர் பொன்ராம் இயக்கத்தில் வெளிவந்திருக்கும் படம் "சீமராஜா. " படத்தில் காமெடி காட்சிகள் காட்சிப்படுத்தப்பட்டிருக்கும் விதம்.... அசத்தல் எனலாம். அப்படி ஒரு செம காமெடி கதையில் கொஞ்சம் அந்த கால ஜமீன் மற்றும் ராஜா காலத்து கதையையும் ப்ளாஷ்பேக்கில் கலந்து ரொம்பவே'பெப்' ஏத்தி மொத்தப் படத்தையும் எத்தனைக்கு எத்தனை காமெடியாகவும், கலர்புல்லாகவும் தரமுடியுமோ..? அத்தனைக்கு அத்தனை அழகாக காட்சிப்படுத்தி தந்திருக்கின்றனர் "சீமராஜா" படக் குழுவினர் என்பது இப்படத்திற்கு பெரிய ப்ளஸ்!

கதாநாயகர்: சீமராஜா எனும் சிங்கம் பட்டி ஜமீனின் ஜாலி இளவரசராகவும், ப்ளாஷ்பேக்கில் சீமராஜாவின் பாட்டனுக்கு பூட்டன், ஓட்டன்... வீரமிகு மன்னர் கடம்ப வேல்ராஜாவாகவும் சிவகார்த்திகேயன், தனக்கு சாலப் பொருத்தமான செம மாஸான கதையிலும், களத்திலும் கலக்கியிருக்கிறார் கலக்கி.

அதிலும், இரண்டு குதிரை பூட்டிய சாரட் வண்டியில் இளவரசர் சீமராஜாவாக, கணக்கு சூரியுடன் சேர்ந்து பண்ணும் அலப்பறையில் ஆகட்டும், அவரது முப்பாட்டன், ஓட்டன் ஜமீன் மன்னர் கடம்ப வேல்ராஜா வாகஒற்றை குதிரையை ஓட்டிச் சென்று வீரத்துடன் போர் புரியும் போது காட்டும் மிடுக்கில் ஆகட்டும் பலே, பலே.... சொல்ல வைக்கிறார்.

'வாழ்றதுக்கு எப்படி நன்பன் முக்கியமா வேணுமோ அதே மாதிரி எதிரியும் கூட இருந்து கிட்டே இருக்கணும்... அப்போதான் மனுஷனுக்கு ஜெயிக்கணுங்கிற வெறி இருக்கும்...", "உழுதவனுக்கு உளுத்துப் போன அரிசி உட்கார்ந்து சாப்பிடுறவனுக்கு பிரியாணி அரிசியா...? " என விவசாயிகளுக்கும், விவசாயத்துக்கும் ஆதரவு குரல் கொடுக்கும் இடங்களில் கூட சிவா செம அசத்தல்.

அதே மாதிரி, "நம்பிக்கை துரோகம் நான் இதுவரை பார்த்திராத ஒன்று... நான் மீண்டும் வருவேன் என் உயிரே போயினும் இந்த மண்னை மீட்க வருவேன் ...." என்றபடி மடியும் இடத்தில் கடம்பராஜா- சிவகார்த்தி, ஏனோ தெரியவில்லை,நம்மையும் கண் கலங்க வைத்து விடுகிறார்.

மேலும், சமந்தா என்ட்ரி காட்சியில் தன் ஆண் புறாக்களைத் தேடி, வளையல் வியாபாரி கெட்-அப்பில் வாட்ச் விற்பனையாளராக அவரிடம் சிக்கும், சிவா, தன்னை அடிக்க கட்டை எடுத்துவரும் சமந்தாவைப் பார்த்து, "தயவு செய்து முதல்ல கட்டையை கீழே போடுங்க, எது கட்டைன்னு தெரியலைன்னு... " கலாய்க்கும் இடம் உள்ளிட்ட பல காட்சிகளில் தன் பாணி குறும்பு கொப்பளிப்புகளிலும் குறை வைக்காதது... படத்திற்கு கூடுதல் பலம்.

கதாநாயகி: புளியம்பட்டி சிலம்பு செல்வி - சுதந்திர செல்வியாக சமந்தா செம. சமத்தா சிலம்பம் எல்லாம் சுற்றும் வீரப்பெண்ணாக மிரட்டியிருக்கிறார்... மிரட்டி. சிவகார்த்தி, படத்தில் ஒரு இடத்தில் சமந்தாவைப் பார்த்து அடிக்கும் "பன்ச்" போன்றே சமந்தா, "சும்மா சாமுத்ரிகா லட்சணுத்துல சலிச்சு எடுத்த சுகர்ல..." அம்மணி அழகு தேவதையாகவும்வசீகரிக்கிறார்.

பள்ளி விழாவில் உடற்பயிற்சி ஆசிரியையான சமந்தாவுக்கு சிவகார்த்தி நல்லாசிரியர் விருது வழங்கி நல் அழகாக இருக்காங்கள்ள... அதான் விருது என்னும் போதும் தியேட்டர் சிரிப்பொலியில் அதிர்கிறது.

மற்றொரு நாயகி: கெஸ்ட் ரோலில் ப்ளாஷ்பேக்கில், மன்னர் கடம்ப வேல்ராஜா - சிவகார்த்தியின் மனைவியாக தலை காட்டியிருக்கும் கீர்த்தி சுரேஷ், எதிர்பார்ப்பை கூட்டுகிறார்.

காமெடியன்: சூரி - சிவகார்த்தி காம்பினேஷன் எத்தனை பிரசித்தி என்பதற்கு "வ.ப. வாலிபர் சங்கம்", "ரஜினி முருகன்" என ஏகப்பட்ட படங்கள்சாட்சி. இந்தப் படமும் அதற்கு சற்றும் சளைத்ததல்ல... "ராஜா நீங்க ஏமாளி ராஜா.. ", "கொன்னுபுடுவீங்க கொன்னு..." என்றெல்லாம் சிவாவையே கலாய்க்கும் அவரது கணக்குப் பிள்ளை மேத்ஸ் - சூரி, செல்பியை சிலேப்பி... என்று பண்ணும் காமெடி கலாட்டாவில் தொடங்கி, ஆம்பளை புறாக்களைத் தேட வந்த இடத்தில், புறாக்களுக்கு, இதுதான் சரவணபவன் என சோள காட்டை காட்டிடுவது எனத் தொடர்ந்து, "பர்ஸ்ட் நைட் பெட்ஷீட்" விற்பது வரை காட்சி காட்சி சிரிப்பு மூட்டுகிறார்…அதிலும், "நான் உள்ள போய் செல்வியை தூக்க போறேன்.... நாலு பேர் அடிச்சு கேட்டாலும் உண்மைய சொல்லாத...i எனும் சிவகார்த்தியிடம் "நாக சைதன்யாவே வந்தாலும் சொல்ல மாட்டேன்..." எனும் இடத்தில், மிரட்டல்.

அதே நேரம், ஜில், ஜங், ஜக் என மூன்று மனைவிகளின் புருஷனான சூரிக்கு நான்காவதாக ஒரு திருமணம் க்ளைமாக்ஸில் இயக்குனர் செய்து வைப்பதும் சில காட்சிகளில் சூரியை சிக்ஸ் பேக்கில் விட்டிருக்கும் துணிச்சலும் கொஞ்சம் ஒவருங்கோ…

உப நாயகர்: சிவாவின், அப்பா கேரக்டரில் அவமானத்தில் சாகும் எட்டுப் பட்டி ராஜாவாக நெப்போலியன், ராஜாவுக்கு உரிய மிடுக்கு காட்டி அடக்கி வாசித்திருக்கிறார்.

வில்லி: சிம்ரன், வில்லன் லாலின் வில்லி மனைவியாக "நக்கத்தரங்கெட்ட நாயி.. நடு ஜாமத்துல எலும்பு கேட்டுச்சாம்.. " , "நீங்கள்ளாம் வேட்டியில தான்டா சண்டியர் கட்டு கட்டுவீங்க..... நான் புடவையிலயே கட்டுவேன் பாக்கறீங்களா? பாக்கறீங்களா...? என புடவையை வரிந்து கட்டி, இந்த ரீ-என்ட்ரியில் விஸ்வரூபம் எடுக்க முயன்றிருக்கிறார். பேஷ், பேஷ்!

வில்லன்: "என்னால ராஜா ஆக முடியாது... ஆனா நான் இருக்கிற ஊர்ல இன்னொரு ராஜா இருந்கக் கூடாது... " என வீம்பு பிடிக்கும் வின்ட் மில் வில்லன் - காத்தாடி கண்ணனாக வில்லன் லால் ஜமாய்த்திருக்கிறார்.

பிற நட்சத்திரங்கள்: யோகி பாபு, 'நான் கடவுள்' ராஜேந்திரன், மனோபாலா, ரஞ்சனி, "பிச்சைக்காரன்" மூர்த்தி, சூப்பர் குட் சுப்பிரமணி... ஆகியோரும் பாத்திரமறிந்து பளிச்சிட்டுள்ளனர்.

தொழில்நுட்பகலைஞர்கள்: படத்தொகுப்பு, பக்கா தொகுப்பு, பாலசுப்ரமணியெத்தின் ஒளிப்பதிவு. ஒவ்வொரு காட்சியிலும் ஒவியப் பதிவாக மிளிர்கிறது. டி.இமானின் இசையில், வாரன் வாரன் சீமராஜா வழிய விடுங்கடா ...", "மச்சக்கன்னி கொஞ்சம் கேட்டுப்பாரேன் என்னைப் பத்தி... ", "பட்டுன்னு ஒட்டுற பொண்ணுங்க .... வரும் ஆனா வராது.... ", "கொடுத்த அடியதிரும்ப திரும்ப கொடுக்கிறான்....", "உன்ன விட்டா எனக்கு யாரும் இல்ல ....", "கொற்றவனே குலக்கொழுந்தே .... ", "எட்டூரு எட்டும் படி ...." உள்ளிட்ட அனைத்துப் பாடல்களும், பின்னணி இசையும் பிரமாதம். கூடவே, படத்திற்கு பெரும் பலம்.

பலம்: பொன்ராம்- சிவகார்த்திகேயன்-சூரி-டி.இமான் கூட்டணியும் , "சீமராஜா" எனும் டைட்டிலும் பலம்.

பலவீனம்: அப்படி, பெரிதாக எதுவுமில்லை…

இயக்கம்: பொன்ராமின் எழுத்து, இயக்கத்தில், பூமாரங்கைக் காட்டிலும் - பெருமை வாய்ந்த பண்டைய ஆயுதமான "வளரி" பற்றிய பெருமை பேசியிருக்கும் விதமும், நாய் டைகரை சிறுத்தையாக்கிய, காமெடி மூலம் செல்பி வாட்ஸ் - அப் மோகிகளுக்கு வைத்திருக்கும்குட்டும் அசத்தல்! இவை எல்லாவற்றையும் காட்டிலும், .." விவசாயி என்னக்குய்யா லாபம் பார்த்துருக்கான்? ", "தமிழனோட நிலம் தமிழன் கிட்டதான் இருக்கணும்...", "நாம என்ன செய்றோங்கறதை விட எதிரிங்க என்ன செய்றாங்குகிறதை பார்க்கிறது தான் முக்கியம்." என்றெல்லாம் விவசாயமும், வீரமும் பேசியிருக்கும் விதமும் ஹைலைட்டோ ஹைலைட்!

" தல'க்கே தலை புள்ள பொம்பள புள்ள தான்.... பொம்பள புள்ளன்னா அவ்வளவு கேவலமா என்ன?" ன்னு காமெடி. படத்தில் கிடைத்த கேப்பில் எல்லாம் "பன்ச் "சும், மெஸேஜும் வைத்திருக்கும் இயக்குனர் பொன்ராமுக்கு ஒரு ஹேட்ஸ் ஆப்சொல்லியே ஆகவேண்டும்.

பைனல் "பன்ச்": "சீமராஜா' சிவகார்த்திகேயன்படங்களில் மற்றும் ஒரு 'சிறப்பு ராஜா!"

ரஜினி நடிப்பில் வெளியான ‘சந்திரமுகி’ படத்தில் சிம்ரன் நடிக்க முடியாமல் போனதற்கு உண்மையான காரணம் தற்போதுதான் தெரியவந்துள்ளது.

ரஜினி திரைப் பயணத்தில் மறக்க முடியாத மெகா ஹிட் படங்களில் ஒன்றுதான் ‘சந்திரமுகி’. இந்தப் படம் 2005ல் வெளியானது. இந்தப் படத்தில் ரஜினிக்கு ஜோடியாக நயன்தாரா நடித்திருந்தார். மேலும்படத்தில் பிரபு, ஜோதிகா, வடிவேலு, நாசர், விஜயகுமார் உட்பட பலர் நடித்திருந்தனர்.


இந்தப் படத்தில் நயன்தாரா வேடத்தில் முதலில் நடிக்க இருந்தது நடிகை சிம்ரன்தானாம். இந்தப் படத்திற்காக முதல் 3 நாட்கள் படப்பிடிப்பில் எல்லாம் கலந்து கொண்டார் சிம்ரன். அந்த நேரத்தில் நடிகை சிம்ரன் தான் கர்ப்பமாக இருப்பது தெரியவந்தது. இந்த விஷயத்தை இயக்குனர் பி.வாசு மற்றும் தயாரிப்பு நிர்வாகத்திடம் சிம்ரன் கூறினார். அவர்கள் எந்த ஒரு மறுப்பும் சொல்லாமல் சிம்ரனுக்கு வாழ்த்து கூறி அனுப்பி வைத்தார்களாம். அப்புறம்தான் ரஜினிக்கு ஜோடியாக நயன்தாரா ஒப்பந்தமானார்.


அப்போது ரஜினியுடன் இணைந்து நடிக்கும் வாய்ப்பை விட்டுவிட்டேன் என்று வருத்தப்பட்டாராம் நடிகை சிம்ரன். அதற்குப் பலனாக தற்போது ‘பேட்ட’ படத்தில் ரஜினியுடன் இணைந்து நடிக்கும் வாய்ப்பு கிடைத்ததற்கு மிக்க சந்தோஷப்பட்டாராம் நடிகை சிம்ரன்.

தமிழ் சினிமாவில் தற்போது நாயகர்களுக்கு இணையாக நடிகைகளுக்கும் முக்கியத்துவம் உள்ள படங்கள் வெளிவரத்தொடங்கியுள்ளது.

நயன்தாரா, ஜோதிகா, த்ரிஷா வரிசையில் சமந்தா களமிறங்கியிருக்கும் படம் தான் யுடர்ன்.

கன்னடத்தில் வெளியாகி ஹிட்டான இப்படத்தை அப்படத்தின் இயக்குனரான பவன் குமாரே தமிழ், தெலுங்கிலும் இயக்கியுள்ளார்.

இவர் ஏற்கனவே லூசியா என்ற படத்தின் மூலம் அனைவரின் கவனத்தை ஈர்த்தார். இப்படமும் தமிழில் எனக்குள் ஒருவன் என்றபெயரில் வெளியானது.

தொடர்ந்து வெற்றிப்படங்களில் நடித்துவரும் சமந்தாவுக்கு இப்படமும் வெற்றி கொடுத்ததா பார்ப்போம்.

கதைக்களம்

சென்னை வேளச்சேரி மேம்பாலத்தில் தொடர்ந்து பல கொலைகள் நடக்கிறது. இதை பற்றி தொடர்ந்து பத்திரிக்கையாளரான சமந்தா எழுதி வருகிறார்.

இதனால் இவரின் மீது போலிஸ்க்கு சந்தேகப்பார்வை விழுகிறது. போலிசாக ஆதி நடித்துள்ளார்.

இதன் பின் பல பிரச்சனைகளை சந்திக்கிறார் சமந்தா. கடைசியில் அந்த விபத்துக்கான காரணம் என்ன? மரணம் தடுக்கப்பட்டதா? சமந்தா பிரச்சனையிலிருந்து தப்பித்ததா என்பதே மீதி கதை.

பல முடிச்சுகளுடன் சுவாரஸ்யமாக செல்லும் இப்படத்தில் கமெர்ஷியலுக்காக பாடல்கள் என எதையும் சேர்க்கவில்லை.

படத்தை அதிகம் இழுக்காமல் 2 மணிநேரத்தில் முடித்துள்ளனர். யூகிக்க முடியாத பல காட்சிகளை வடிவமைத்துள்ளனர்.

படத்தில் சமந்தா, ஆதியைப்போல மற்ற கதாபாத்திரங்களில் ஆடுகளம் நரேன், ராகுல் ரவீந்திரன், பூமிகா ஆகியோரும் முக்கியமான கதாபாத்திரங்களில் நடித்துள்ளனர்.

பூர்ணசந்திர தேஜஸ்வியின் பின்னணி இசையில் திரில்லரை மெயிண்டெயின் பண்ணியுள்ளார். ஓளிப்பதிவுக்காக மெனக்கெட்டிருக்கிறார் நிகித் பொம்மிரெட்டி.

க்ளாப்ஸ்

சமந்தா உள்ளிட்ட மற்ற நடிகர்களின் நடிப்பு

வலுவான திரைக்கதை, யூகிக்க முடியாத முதல்பாதி காட்சிகள்

பல்ப்ஸ்

இரு மொழிகளில் தயாரானதால் பல இடங்களில் டப்பிங் செட் ஆகவில்லை.

சில இடங்களில் வரும் நாடகத்தன்மையான வசனங்கள்

மொத்தத்தில் வழக்கமான மசாலா படங்களில் இருந்து தப்பித்து புதிய அனுபவத்தை பெற ஒரு யூடர்ன் அடித்து வரலாம்.

ரத்தம் குடிக்கும் காட்டேரிகள் முன், சத்தம் போடாமல் சரிந்து விழும் காதலர்களை பற்றிய கதைதான் ‘தொட்ரா’! தலைப்பில் இருக்கிற கரண்ட், திரையிலும் இருப்பதால் தென்மாவட்டங்களில் தீப்பிடிக்கலாம். வட மாவட்டங்களில் வயிறெரியலாம். ‘நான் சாதிப் பெருமை பேசுகிறவன் தான்டா, அதுக்கென்ன இப்போ?…’ என்று அடித்தொண்டையால் சுவாசிக்கும் அத்தனை பேருக்கும் இந்த படம் சுத்தமாக பிடிக்காது. ஆனால் கட்டுப்பாடுகளை மீறி காதலிக்கும் எல்லாருக்கும் பிடிக்கும். முடிவுதான்… மூளையை சின்னா பின்னமாக்குகிறது. கொஞ்சம் மெனக்கெட்டிருந்தால், ‘காதல்’ பார்ட் 2 வாகக் கூட வந்திருக்க வேண்டிய படம். பட்…?

பழனி அடிவாரத்தில் வசிக்கும் ப்ருத்விராஜுக்கு, அதே ஏரியாவிலிருக்கும் சாதிப் பிரமுகரான எம்.எஸ்.குமாரின் தங்கை வீணா மீது லவ் வருகிறது. கடையில் விற்கும் கை முறுக்கு ரேஞ்சில் காதலை டீல் பண்ணுகிறார்கள் இருவரும். ஒரு எக்குதப்பான நேரத்தில் எஸ்கேப் ஆகிற ஜோடிகளை தேடி, எம்.எஸ்.குமார் அண் கோ அலைகிறது. காதல் ஜோடியை பலவந்தமாக பிரிக்கிற அண்ணன், கோர்ட் உத்தரவின் பேரில் தங்கையை அங்கு கூட்டிவர, கோர்ட்டின் முடிவென்ன? காதல் வென்றதா? இதுதான் க்ளைமாக்ஸ்.

படம் சூடு பிடிப்பதற்கு சுமார் முக்கால் மணி நேரம் ஆகிவிடுகிறது. அதுவரைக்கும் உப்புசப்பில்லாத சீன்களால் தள்ளு வண்டி டிரைவர் ஆகிவிடும் அறிமுக இயக்குனர் மதுராஜ், அதற்கப்புறம் அதே தள்ளு வண்டியை திடீர் பென்ஸ் காராக்கி திகைக்க விடுவது சிறப்பு. அதுவும் காதல் ஜோடிக்கு சங்கர், திவ்யா என்று பெயர் வைத்திருப்பதன் மூலம், அண்மையில் நடந்த ஆணவக்கொலையை கண்முன் கொண்டு வருகிறாரா… பதறுகிறது மனசு. பட்ட பகலில் நட்ட நடு சாலையில் நடந்த அந்தக் கொலை கிளிப்பிங்சை ரெபரென்ஸ் ஆக வைத்துக் கொண்டு படம் பிடித்திருக்கிறார்கள். அந்த நிமிஷக் காட்சிகள் மட்டும் திக் திக்!

ப்ருத்விராஜுக்கு ஏற்பட்ட தொடர் சறுக்கலை இந்தப்படம் முட்டுக் கொடுத்து நிமிர்த்தும் என்பதில் சந்தேகமில்லை. நமது கடைசி துடுப்பு இதுதான் என்பதை உணர்ந்து போராடியிருக்கிறார் இவரும். குறிப்பாக அந்த கல் குவாரியில் அடிபட்டு கதறும் காட்சிகள், பதற வைக்கிறது.

ஹீரோயின் வீணாவுக்கு கதை பேசும் கண்கள். தேவைப்படுகிற அளவுக்கு கவர்ச்சியாகவும் நடித்திருக்கிறார். ஒரு பக்கம் பாசக்கார அண்ணன். இன்னொரு பக்கம் உயிரை கொடுக்கும் லவ்வர். என்ன முடிவெடுப்பது என்று தவியாய் தவிக்கும் வீணா, அடர்த்தியான கதைகளுக்கேற்ற அல்டிமேட் வரவு!

வில்லன் எம்.எஸ்.குமாருக்கு கை கூடி வருகிறது நடிப்பு. அறிமுக நடிகர் என்று சொல்ல முடியாதளவுக்கு பர்பெக்ஷனில் கலக்குகிறார். கடைசிவரைக்கும் இந்த அண்ணன் தன் சாதி மீது தீராத பற்று கொண்டிருந்தால், அந்த கேரக்டர் சறுக்கியிருக்காது. படமும் சறுக்கியிருக்காது. தேவையில்லாத காம்ப்ரமைஸ்!

பணம் பறிக்க என்னென்னவோ வியாபாரம். ஆனால் ஏ.வெங்கடேஷ் செய்யும் காதல் வியாபாரம் புதுசோ புதுசு. (இதெல்லாம் நிஜத்தில் நடப்பதாக இயக்குனர் பிரஸ்மீட்டில் தெரிவித்ததால் மட்டுமே இதை நம்ப வேண்டியிருக்கிறது) பணத்தின் மீது குறி வைப்பவர் திடீரென ஹீரோயினை பயன்படுத்த அலைவதுதான் படு பயங்கர டிராமாவாக இருக்கிறது.

கண்ணழகி சூசன், மைனாவுக்கு பின் இந்தப்படத்தில் முக்கிய ரோலில் நடித்திருக்கிறார். அவரது கோவக்கார இமேஜூக்கு மீண்டும் ஒரு பெருந்தீனி.

ஆர்.என்.உத்தமராஜாவின் இசையில் பாடல்கள் ஈர்ப்பு. புதியவர் என்றாலும், பின்னாளில் தவிர்க்க முடியாத இடத்தை பிடிப்பார் என்று நம்ப வைக்கிற ட்யூன்கள் அத்தனையும்.

ஒளிப்பதிவாளர் செந்திலின் பல்வேறு கோணங்களை விடுங்கள். அந்த கொலைக்காட்சி… அப்படியே கண்முன் வந்து கலங்க விடுகிறது.

தொட்ரா… எலும்பை முறிப்பார்கள் என்று எதிர்பார்த்தால், கொஞ்சம் கொஞ்சம் சுளுக்கி அனுப்புகிறார்கள்!

ரஜினிகாந்த் ஒரு படத்தில் நடிக்கின்றார் என்றால் அந்த படம் இந்தியா முழுவதும் மிகப்பெரும் எதிர்ப்பார்ப்பை ஏற்படுத்தும். அந்த வகையில் ரஜினிகாந்த் சில வருடங்களுக்கு முன்பு இளம் இயக்குனர்கள் படங்களில் நடிக்க விருப்பப்பட்டார்.

அப்படியிருக்கையில் கௌதம் மேனன், வெற்றிமாறன், ரஞ்சித், மணிகண்டன் ஆகியோரிடம் கதை கேட்டார், இதில் மணிகண்டன் கூறிய கடைசி விவசாயி கதை ரஜினிக்கு பிடித்து இருந்ததாம்.

பிறகு என்ன காரணம் என்று தெரியவில்லை, அந்த படம் தொடங்கவே இல்லை, மணிகண்டனும் இந்த கதை ரஜினி நடித்தாலே பெரியளவில் ரீச் ஆகும் என காத்திருந்துள்ளார்.

தற்போது இப்படத்தில் விஜய் சேதுபதி நடிக்க கமிட் ஆகியுள்ளதாக கூறப்படுகின்றது, விரைவில் அதிகாரப்பூர்வ தகவல் வரும் என எதிர்ப்பார்க்கப்படுகின்றது.

பாலிவுட்டில் மிக பிரமாண்டமாக தயாராக உள்ள ‘மாஹாவீர் கர்ணன்’ படத்தில் கர்ணனாக நடிக்க ஒப்பந்தமாகியுள்ள சியான் விக்ரம், அந்த கதாபாத்திரத்திற்காக தன் உடல் எடையை கூட்டும் முயற்சியில் ஈடுபட்டுள்ளார்.

பிரமாண்ட படம்:

‘துருவ நட்சத்திரம்’, ‘சாமி 2’ படப்படிப்பு முடிந்து இறுதிக் கட்ட பணிகள் நடைப்பெற்று வருகின்றன. இதையடுத்து பாலிவுட்டில் ரூ. 300 கோடி செலவில் உருவாக உள்ள ‘மஹாவீர் கர்ணன்’ படத்தில், கர்ணனாக நடிக்க விக்ரம் ஒப்பந்தம் செய்யப்பட்டுள்ளார். முதலில் ப்ரித்வி ராஜ் நடிக்க முய்ற்சி மேற்கொள்ளப்பட்டது. ஆனால் அவருக்கு கால்ஷீட் வழங்க முடியாத சூழல் உள்ளதால், கர்ணனாக விக்ரமை நடிக்க வைக்க ஒப்பந்தம் செய்யப்பட்டது.

உடம்பை கூட்டும் விக்ரம்:

சாமி 2 படப்பிடிப்புகள் முடிவடைந்து விட்டதால், கர்ணன் படத்திற்காக, பீமா படத்தை விட உடல் எடையை கூட்டி, ஆஜானுபாகுவான உடலுடன் ‘கர்ணன்’ ஆக நடிக்க விக்ரம் தயாராகி வருகின்றார்.

இதற்காக வேறு பொது நிகழ்ச்சிகளில் கலந்துகொள்வதை விக்ரம் தவிர்த்து வருகின்றார்.

தமிழ் சினிமாவில் பல தரமான படங்களை கொடுத்தவர் ராதாமோகன். ஆனால், சமீபமாக இவர் ஒரு ஹிட் கொடுத்து ரீஎண்ட்ரி ஆக மிகவும் முயற்சி செய்து வருகின்றார். இப்படி ஒரு நிலைமையில் தான் சில வருடங்களாக விக்ரம் பிரபுவும் உள்ளார். இவர்கள் இருவரும் இணைந்து உருவாக்கியுள்ள படமே 60 வயது மாநிறம், இவர்கள் இருவருக்கும் அந்த வெற்றி கிடைத்ததா? பார்ப்போம்.

கதைக்களம்

விக்ரம் பிரபு தன் அப்பா பிரகாஷ்ராஜை பார்க்க மும்பையில் இருந்து சென்னை வருகின்றார். பிரகாஷ்ராஜுக்கு தன்னையே யார் என்று தெரியாத அளவிற்கு மறதி உள்ளது.

அதை தொடர்ந்து ஹோமில் இருக்கும் தன் அப்பாவை துணி எடுக்க அழைத்து செல்கின்றார் விக்ரம் பிரபு. அப்போது தன் கவனக்குறைவால் அப்பாவை ஹோம் வாசலிலே மிஸ் செய்கின்றார்.

பிறகு தன் அப்பாவை தேடி தெரு தெருவாக விக்ரம் பிரபு அலைய, ஒரு போலிஸை கொலை செய்துவிட்டு வரும் சமுத்திரகனியிடம் பிரகாஷ்ராஜ் சிக்குகின்றார். சமுத்திரக்கனிக்கு எவிடன்ஸ் ஏதும் இருக்க கூடாது அதனால் பிரகாஷ்ராஜை கொலை செய் என பாஸிடம் இருந்து ஆர்டர் வருகின்றது.

இதை தொடர்ந்து விக்ரம் பிரபு தன் அப்பாவை கண்டுபிடித்தாரா, சமுத்திரக்கனி பிரகாஷ்ராஜை என்ன செய்தார்? என்பதே மீதிக்கதை.

படத்தை பற்றிய அலசல்

விக்ரபு பிரபு நீண்ட வருடங்களாக ஒரு ஹிட் படத்திற்கு போராடி வருகின்றார். இந்த படம் அவருக்கு ஹிட் கொடுக்குமா என்று தெரியவில்லை, ஆனால் கண்டிப்பாக நல்ல பெயரை வாங்கி கொடுக்கும்.

பிரகாஷ்ராஜ் நடிக்கவில்லை வாழ்ந்திருக்கின்றார், அனைத்தையும் மறந்து அவர் தன் மகன் பெயர் சிவா மட்டுமே நினைவில் வைத்து சிவா சாப்பிட்டாயா, சைக்கிள் ஓட்டினாயா என்று அவர் கேட்கும் இடம் கண் கலங்க வைக்கின்றது.

சமுத்திரக்கனி ஒரு கொலையை செய்துவிட்டு, அதை மறைக்க குமரவேல் குடும்பம், பிரகாஷ்ராஜ் ஏன் தன் கூடவே இருக்கும் பையனை கூட கொல்லும் நிலைக்கு தள்ளப்படுகின்றார். ஆனால் அவர் எப்படி இதிலிருந்து வெளியே வந்து சாதாரண மனிதனாக மாறத்துடிக்கின்றார் என்பதையும் மிக அழகாக காட்டியுள்ளனர்.

படத்திற்கு மிகவும் பக்க பலமாக இருப்பது விஜியின் வசனமும், இளையராஜாவின் பின்னணி இசையும் தான். அன்பு தான் இந்த உலகம் அதை வெளியில் காட்டாமல் நாம் தான் உள்ளுக்குள்ளே அடக்கி வச்சுகிறோம் போன்ற வசனம் ரசிக்க வைக்கின்றது.

ஆனால், இத்தனை இருந்தும் மிக பொறுமையாக செல்லும் திரைக்கதை, படத்திற்கு இந்த ஸ்லோ தேவை என்றாலும் ஜென்ரல் ஆடியன்ஸ் ஏற்றுக்கொள்வார்களா ராதாமோகன்.

க்ளாப்ஸ்

நடிகர்களின் யதார்த்தமான நடிப்பு, அதிலும் பிரகாஷ்ராஜ் செம்ம ஸ்கோர் செய்கின்றார். விக்ரம் பிரபு- ‘மேயாத மான்’ இந்துஜாவின் காட்சிகள் பிரகாஷ்ராஜ் சொன்ன கதை போல் கிளைமேக்ஸ் வரும் விதம் ரசிக்க வைக்கின்றது.

படத்தின் வசனம் மற்றும் குமரவேல் மதுமிதா தம்பதிகளின் யதார்த்தமான காமெடி.

பிரகாஷ்ராஜ் தன் காதல் கதையை சொல்லும் இடம் கவிதை போல் உள்ளது.

இளையராஜா பின்னணி இசை.

பல்ப்ஸ்

மிக மெதுவாக நகரும் திரைக்கதை.

சமுத்திரக்கனி திருந்தி வாழவேண்டும் என்று நினைக்கும் போது அப்படி ஒரு முடிவு தேவையா...

மொத்தத்தில் கொஞ்சம் பொறுமை இருந்தால் நீங்களும் கண்டிப்பாக இந்த 60 வயது மாநிற மனிதனை தேடலாம்.

அஜித்தின் விசுவாசம் படத்தின் ஃபர்ஸ்ட் லுக் போஸ்டர் மற்றும் விஜய்யின் சர்கார் படத்தின் டீசர் ஆகியவை ஒரே நாளில் வெளியாகயிருப்பதாக தகவல் வெளியாகியுள்ளது.
அஜித்தின் விசுவாசம் படத்தின் ஃபர்ஸ்ட் லுக் போஸ்டர் மற்றும் விஜய்யின் சர்கார் படத்தின் டீசர் ஆகியவை ஒரே நாளில் வெளியாகயிருப்பதாக தகவல் வெளியாகியுள்ளது.

கத்தி மற்றும் துப்பாக்கி ஆகிய படங்களைத் தொடர்ந்து ஏ.ஆர்.முருகதாஸ் – விஜய் கூட்டணியில் 3வது முறையாக சர்கார் படம் உருவாகி வருகிறது. தளபதி விஜய்யின் 44வது பிறந்தநாளை முன்னிட்டு சர்கார் படத்தின் ஃபர்ஸ்ட் லுக் போஸ்டர் வெளியானது. மேலும், இப்படம் வரும் தீபாவளிக்கு வெளியாகும் என்று ஏற்கனவே அறிவிக்கப்பட்டுள்ளது. இதையத்து, இப்படத்தின் டீசர் மற்றும் டிரைலருக்காக ரசிகர்கள் காத்துக்கொண்டிருக்கின்றனர்.

இந்த நிலையில், வரும் விநாயகர் சதுர்த்தைய் முன்னிட்டு இப்படத்தின் டீசர் வெளியாகயிருப்பதாக தகவல் வெளியாகியுள்ளது. சர்கார் படத்தின் டீசர் வெளியாகும் தேதியன்றே அஜித்தின் விசுவாசம் படத்தின் ஃபர்ஸ்ட் லுக் போஸ்டரையும் படக்குழு வெளியிட திட்டமிட்டுள்ளதாக தகவல் தெரிவிக்கின்றது. அஜித் – நயன்தாரா நடிப்பில் உருவாகி வரும் விசுவாசம் படத்தின் படப்பிடிப்பு விறுவிறுப்பாக நடந்து வருகிறது.

அஜித் படத்தின் ஃபர்ஸ்ட் லுக் போஸ்டர், விஜய்யின் சர்கார் படத்தின் டீசர் வெளியாகும் நாளன்று பொன்ராம் – சிவகார்த்திகேயன் கூட்டணியில் உருவான சீமராஜா படம் திரைக்கு வரவுள்ளது என்பது குறிப்பிடத்தக்கது